Innkuan ading kua thupizaw ~ Lian Tuang

Innkuan ading kua thupizaw ~ Lian Tuang

“Tate tawh kisai bel ei makaih siamna zong hi khin tuan kei e, Pasian thupha hi zaw. Abeisa a pi a pute thupha le a diakdiak in innkuan sungah Nute mah thupi sa ing. Inn nupite mah a siam ciangin innkuan sung a nuam hi.”

Hih kammal pen leitung nuntakna le innkuan sung nuntakna ah a lawhcing le a en huai mahmah innkuan tampi lakah khat in a kihel hamtang dingin ka lamet innkuan khatte pa tawh kihona kammal ahi hi.

Tuate innkuan pen Khalkha khuapi a teng Pa Vei Suan Paute innkuan ahi hi. Tapa khat le tanu nih nei hi. Ta upapen pen siavuan hi in specialist sin beh a, tu in zo ta hi. Anihna in GTC ah siamah sem hi. Anautum pen in State zumpi ah na sem hi. A vekpi un Officer vive hi zen hi. A nu in kumpi sung mah ah nasem lai in a pa in zong UNOPS ah nasem hi.

A tate pen pilna le panmun lianpipi aneih hangun kiniamkhiat hithiat lel uhi. Inn sungah Nu le pa khawng hawmthawh sese loin lawmta bangin kikhawl hialhial uhi. A thei ngeilote in lawm kingai khawng a kisa ding zah in nuam kisa mahmah uh hi.

Inn le lo a kipan nek le dawn kicingin min le za nei lipliap uh ahih manin leitung thu in thupha sang mahmah cih ding ahi hi. Ahi zongin tuate sangin thupi zaw ka sak thu in innkuan sung khat le khat ki it diamdiam in khangual lawmta bangin om hilhhelh in nuam kisa mahmah uh ahihna pen etlawm sa in hampha ka sa diak hi. En huai ka sa diak hi.

Tanu u zaw mokhak a, siavuan khat tawh kiteng hi. Tapa upen ading mo la leuleu in siavuan khat mah la leuleu hi.

Khat vei Khalkha ka pai khat in pa Suan ( Vei Suan Pau ) te nupa tawh mei-awi kawm in ka kihoho uhi. Pa Suan kiang ah “ Naupangte pil mahmah in mi thupi suak bek tham loin nu le pa ong it ngiat in kiniam khiat mahmah sa ing. Picing lua mai uhi. No nupa bel thupha sang taktak uh teh. Hampha ong sa mahmah ing” ka ci hi.

Tua banah hih bangin thupha na san theihna uh pen bang hang hi pi pen in na lamen hiam ci in ka dong beh hi. Tua ciangin pa Suan in “ Tate tawh kisai bel ei makaih siamna zong hi khin tuan kei e, Pasian thupha hi zaw. Abeisa a pi a pute thupha le a diakdiak in innkuan sungah Nute mah thupi sa ing. Inn nupite mah a siam ciangin innkuan sung a nuam hi” ci in ong dawng hiathiat hi.

Ahi zongin nu Mang in meibung a khoihkhoih kawm in “ Kei ngiahsutna leuleu ah bel innkuan sung vai le tate vai khawngah bel ei inn nupite sangin inn pate mah hi zaw sa ing. Den a a pa ( pa Suan a cihna ) cih mah bangin Tate tawh kisai bel Pasian thupha hi mah e. Tua khitteh abeisa a pi a pute thupha le a diakdiak in inn papite makaih siamna hang mah hi sa pen zaw ing” ong ci leuleu hi.

Hih kammalte nih ka zak ciangin bangmah ka pau beh nawn kei hi. A nih tuak in thupi ka sa mahmah hi. Kei hoihna kei siamna kei hanciamna ci het loin a niamzaw ding kituh uhi. Khat le khat siam kipaih zaw uhi. Aman a khial khentat ding sangin khat le khat a ki-it bawlzia, a kithupi bawlzia, a kizahtak bawlzia, a kipahtawizia uh ka muh ciangin thupi ka sa semsem hi.

Amaute gel lungsim puakzia le kizopzia ka muh ciangin ettehhuai le noptuak sa in hampha ka sa semsem zaw lai hi. Hih thusim pen mi tampi thei tek leng lunggulhhuaisa i hih manin lai in a gelhkik i hi hi. Lian Tuang