Malaysia pan hawlkhiat athuak North Korean Ambassador ciahkhia takpita

Malaysia pan hawlkhiat athuak North Korean Ambassador ciahkhia takpita

North Korean Ambassador Kang Chol pen hawlkhiatna angah himawk ahih manin ciahkhia takpita hi. Tuni Monday (Mar 06) nitak 4:45pm hunin Kuala Lumpur International Airport (KLIA) ah aciahkhia dingin tungtakpi hi.

Malaysian Government in nitak 6pm ma in agampan aki hepkhiatding thu apiak himawk ahih manin, aciahkhiading in azitawh, ata kum 5 aphapan khattawh vanlengtual ah aciahdingin kithawi uhhi. Malaysia Airlines, Economy Class tawh Kuala Lumpur panin China, Beijing City zuanin 6:25pm in lengkhiading cihi.

Beijing City panin North Korea, Pyongyang City pan bangci bangin Transit ding cihpen ki theicianlo hi.

Ambassador Kang Chol pen thumanglo ahih manin Saturday ni in “persona non grata” ci’n Malaysia gampan nai 48 sungin aki hepkhiatding thu akipia giap ahihi. Kim Jong Nam ki suamlupna vaitawh kisai in hihciang atungto ahihi.

Nai 48 sungin Malaysia pan ciahkhiatding akibingthawi ahih manin, vanpuakzong haumahmah kici hi. Vanlengtual ah Checkin abawl ciangin avan valgawp a, RM7000 bang aval in piakbehkha cisawnsawn hi. Luggage agolpi 4, Box agolpi 4 leh TV Box cihteng puaneknak hi.

Vanlengtual atunphet in Journalists honpikhat in na dawntuahpah uh a, Media te’nzong hihvai pen tawlngak hun neihetlo in asulzuih thapai uh ahihi.

Malaysia leh North Korea gamnih kikal kizopna pen Kim Jong Nam hongki suamlupkhit ciangin honglemnawn hetlo hi. Malaysia in sihnavai akankhiatzia uhpen Kang Chol in mawhsak, hawmthawh mahmahden hi.

Malaysia Minister Datuk Seri Najib Tun Razak akipan kumpi ulian tuamtuam te’nzong North Korea in agam uh akobawlna tepen diksa hetlo uhhi.

Tuahangteng mahtawh nidangin North Korea leh Malaysia gamnih khualzinte Visa lakkullo, Free Visa azat uhzong nung Monday ni akipan phiatmaita uhhi.

Hih Ambassador papen agam ah North Korea makaipipa Kim Jong Un in bangci bangin ana vaidawndiam cih lunglut huai leuleu khading hi. Amaipha amuhleh hoihding a, amaipha mulo in, aheh asuaksak khakleh lauhuai mahmah khading hi. ZD Sawltak #zomidaily