Dr. Chin Do Kham kiangpan kangah khanlawhna – Part 1

Dr. Chin Do Kham kiangpan kangah khanlawhna – Part 1

Hihthu pen Dr. Chin Do Kham, Malaysia gam Khuapi Kuala Lumpur hongpai lai in ni thum sung kithuahna ah ka khanlawhna te hong hawmsawnnuam ka hihi.

Amah pen ka it mahmah ka Nu ii Pu te hi a, ka neulai in Zogam Khuapi, Tedim hongciah sim in Pu Do Kham hongpuak hi ei ci in zanpuan (blanket), niik le puan inn ah hongciahpih zei hi. Zongeina mahbang in kenzong Pu Do Kham mah ci in a min kasam hi. Nungkalsungteng ko pu tu nuamtak in kithuah thei ka hihmanin Pu Do Kham in keitung hongmuanna le deihsak tampitak honggen a hihman in ka lungdam mahmah hi.

Zomite makaai pa tawh kithuah kha ka hihmanin ka angtang phadiak hi.

A masa in amah pen ihtheihsa mahbang in Global Zomi Alliance ah thuvaanpi a semlaitak a hihman in kician kasa mahmah hi. Zomi te ading hanvaan taktak hi kaci masa nuam hi. Amah pen thupi bek hilo in miciim, mi thumu le minam itna a nei makaai khat hi ci in ka mukhia hi.

Kawlgam kumpi laivuan tan 10 a zawh khitteh Zomi sungah Ph.D thuap nih (Theology & Social Science) ngahding in Pasian hongpiak ‘Ama (Pasian)’ nasempa a hihi.

‘Leitung gam 37 val phakhin ing in tualak ah Malaysia gam hongphawk phadiak ing. Banghang hiam cih le Zomi te tamna pen gam khat a hih man in hong vei mahmah ingh’ cih kammal pen ko bangmah a hilo Malaysia gamah cimawh dongtuak a om gambeel mitampitak te lungsim hong lawng mahmah hi. Hih gam ah kei tawh kibang mipi tampitak te honkhiapa le gumkhiapa ding a hihna lamtak pen kei mimal in katel mahmah hi. Dr. Do Kham ngiat in zong a kampan honggenna ah ‘Zomi te phattuamnading a hihnak le a bulpan in a dawndong kongpanpihding hi’ hong ci ngiatzen hi.

Ni thumsung ka kithuahna vaiteng hong hawmsawn nuam ingh.

Ni khatna:

July 22 2013- Malaysia hongpai sung in a tupa pa Tg. Mungno ii tawmveisung omna a hi Langkap camp ah kapaikhawm uhhi. Camp ka tun uhteh camp sung a om Tg. Mungno le a lawmpa, eimi nih tawh kakimuthei uhhi. A thapiakna tampilakpan in ka sisan hongloksak pen kammal in “bangbang na hizong un, Zomi na hihna uh le Pasian thu-um na hihman un kong itna pen themcik cihthadah malkhatzong kiam vetlo hi” cih Dr. Do Kham kammal kazakciang in ka khitui hongluang mawk hi.

Aw kei, bangmah ka hihloh, ka theihloh hang in ka minampih te in tuadan mah in hong it veveding hitah maw ci in lungdamna khitui hongluang hi. Nuamtak in kimuthei bekthamlo in Camp sungah thuneite tawh nuamtak in kiho in Tg. Mungno hongsuahtak theihnang vai kisamteng ka vanthei uh hi. Note: UNHCR ulian te thusiamna tawh July 24 ni in Langkap camp pan hong suaktapah hi.

Nitaak lam 8pm pawl in KL ka tungkik uh hi. Tuapan in Lasa minthang a hi, Nu Lunsan in Siapa aw ka inn ah thungetna hongneihsak in ci a hihman in a innvuah kapaai uh a, thunget khitteh ZCF- Kota Damansara Pawlpi kem Rev. Gin Do Khup @ Sia Khuppi ii sapna tawh kizui in Monday nitaak kikhopna omlo himahtase le Dr. Do Kham thugen ngainuam ngiat in thu um mimal 300 valbang in biakinn dimlet liang in thugen ngaiding hongpai ngeingai uhhi. Thugenna man khitteh mimal thungetsakna tawh hun nuamtak kizo thei hi. Rev. Khup ii thusiamna tawh nitaak an 11pm in sensai ah gilvah phitphet in hongciahsak hi. ZCF Kota Damansara upa te le pawlpi mi khempeuh Topa in thupha hongpiaksak ta hen! 12pm pawl in hotel ka tungkik uhhi.

Ni Nihna

July 23 2013- Tuani pen 1pm in a zintunna Armada Hotel ah ka vandawn a, tuapan in ZAM (Zomi Association of Malaysia) zumah Palaai teng tawh hun nuamtak in kazangthei uhhi. Palaai khempeuh inzong thutuamtuam dotna neihkhitciang in a nuai ateng pen ZAM pan huhna kingenteng a hihi. Zingciang in UNHCR ulian te tawh kimuhciang in Zomibup huamding ngetnateng pen a nuai a bang hi.

Lungdamkohna:

(1) Tu ciangciang Zomi tampitak gam 3 na ah hong puaksakna uh lungdam kohna,

(2) Zomi damlo te zato kahna leh kibawlna tampi honghuhsak na uh lungdam kohna,

(3) Thong kia tampi te UNHCR in hongtat khiatsak na uh lungdam kohna, leh

(4) Refugee naupang tampi te pilna sintheihna le lai hilh nading hong vaihawm sak na hong huh na uh lungdam kohna cihteng;

Deih ngetna:

· UN te’n Registration hongbawl ciangin minam min ah Zomi akici pen Zomi mah in hong ciaptehsak nading,

· Zopau tawh kamphen akicing in hong hoihsaklo a hihman in Zomi kampheen a kisapna mun ah hongguansak nading,

· CO Class (Culture Orientation) ah Zolai tawh Handbook aki Translate khin pen hong zasaklo a hihman in phalna tawh hongzatsak nading, (CO Classs ah zatding in ZAM pan akibawlsa Handbook Cover Print khia in Dr. Do Kham pia)

· IOM (International Organization for Migration) khutnuai ah kampheen ding in Lai te bek om a hihman in eipau tawh kam hong letsakding in Zomi kampheen hong koihsak nading,

· OPE Enquiry ah Phone tawh sapciang in Mangpau, Laipau, Kawlpau bek tawh hong ki zasak in, Zomi tampi in tua pau namthum ki tello, pau theillo hi. Tua munah zong Zokam tawh hopihtheihding in hong vaihawmsak nading,

· RSC pan October khaciang Internet Online tungtawn in Status Inquiry bawlna ah azatding in Zopau hong helsaklo a hihman in hong helsak nading cihteng ZAM Lutangpi Tg. Haukhai in honggenkhia hi.

Tua khitciang in ka nasepna a hi ka hawhpih a, ka boss pa lah a hi, Dr. Do Kham ii lawmpa, Pastor pa tawh nuamtak in kihothei in mailam ah koici kalsuanding cihkhawng hong kigen kawm uh a, khantohna tampitak om hi. Tualakpan in kawlgam ah ih gam puahding (Zogam) in Pasian deihsakna le lamlahna te zong tampitak kikum thei in tuma kumtampisung khualzin kawikawi in ka om hang in tu madeuh sungteng (kal nih, kal thum sung) in Pasian a lamdang lamlahna dungzui in mi thupi tampitak tawh hong kimusak in nasemkhawm theiding bek thamlo in lawmhoihtaktak vive tampitak hongpiazaw hi ci in genbehlai hi. Mailam ah kawlgam ah mimal khantohnading a kipan kipawlna, sumbulzonna le biakna pawlpilam/kha lam ah lampi honna tampi kaneiding hi cih nasep lian tampitak neihbehding a ma lungtupna le lainatna taktak hi cih hongtelsak mahmah hi. Zomi te lamsang dingin Pasian ka nuntakna lampi hong helsak hi ci ngiat hi. A lamsang theiding ih Biak Pasian in Dr. Do Kham thupha hongpiaksak ta hen!

Tuapan kamankhit uhciang in ZRC (Zomi Refugee Committee) ah ka vahawh uhhi. Kamkupna neihkhitteh dotna le dawnna te bawlna hun nuamtak in kizothei hi. Tua khitciang in Dr. Do Kham in“Ei Zomi te pen mi 3 le 4 pha peuh leng kipawlna khat a neinuam phadeuh minamte ih hihi. A hizong in no kipawlna phuatthak pen ei Zomi te panpihding le a huhding in kipankhia nuam na hihman un thupi hi. A hizong in mi namdangte khutnuai ah omding pen hi theilo hi. A diakdiak in Zomi kipawlna tawh hongding suakding cih ngimna takpi a hih le Chin te khutnuai limlim ah om nawnlo in amau te tawh hong kipawl sawmnawn kei un. Zomi na cih vua le Zomi te zingvai hawmding bek hong mapang unla, Chin min nuai ah pangbeel kipawlna in hong dinsawm kei un. Zomi mintawh kipawlna tampitak ih om hang in ih minambup in kipumkhatlkhoptheihding tuamahmah lunggulh mahmah ingh” ci ngiat hi. “Nidang ciang in khang tangthu ihsuut kik ciang in minam ki pumkhat sak makaai te ci in tangthu ah ih lai in ihsuaksak ding pen ei makaai te ii mawhpuak hi” honggen pen thangah huai kasa mahmah hi. Hih ni zong hun nuamtak in minam makaai teng tawh kimuh koikoi khitteh nuamtak in hotel ah ka kha kik hi.

(zoplaiding…)

Francis Khampi
2013-08-04