Vondeih Kep Ding – 14
Kong it Tawngno,
Lokuan tung leng tawlnga man nai lo-in, “ Pa, tangthu hong gen in,” hong ci, innlakvak ciah leng lah, “ Pa, tangthu hong gen ve” ci, Kawl pai ciah leng zong, “ Pa, tangthu hong gen ve maw,” hong ci-in, nitak kikhop tuak ciangin lumbaih nuam hang, zinglol kul ding cita leng zong hong lumbaih thei sak lo-in, “ Pa, tangthu hong gen kik ow,” mah hong ci, annek ding sangin tangthu a zanuam zaw, ih mut ding sang’ na ngawn in zong tangthu mah a zanuam zaw Tawngno aw, na pa’n tutung in tangthu khat hong gen nuam ing.
‘Nikhat Kumpi pa in a zai mahmah a kumpi gam sung teng vel dingin a kumpi huang sung panin hong zin khia hi. A gam sungteng a vel khit ciagnin hong ciah kik hi. Kumpi inn hong tun ciangin a khualzin cil ahih si tawh a lam paipai na hangin a khe na in bawkgawp ahih manin a lungkim loh na khat hong gen khia hi. Gamsung Ulian, Makai teng kaikhawm in gamsung lampi teng khempeuh aman lang thei pen in savun a phah na dingin thu hong pia hi. Tua hi leh a khualzin kik ciangin lampi teng hoih in a khe hong na nawn lo ding hi. Tua bangin gamsung lampi teng khempeuh ah savunphah ding hi leh bawngvun ahih kei leh lawivun ahi zongin Savun tampi kisam ding a, sum tampi tak hong bei ding ban ah haksa mahmah lai ding ahih manin a mipil u lian te hong lung kham mahmah uhi hi.’
‘Tua bang laitak in a mipil a nasem pa khat in Kumpi pa kiang ah, “ Ka Topa leh ka Kumpi pa aw, na khansau ta hen! Bang hang in hih a kisam lopi hangin sum leh paai tampi tak mawk bei sak sawm na hi hiam? Ganhing nuntak na tampi tak a bei loh, sum tampi tak abei loh in a piang thei ding thu hilo hi.” “ Na khualzin na ah na lampai na in na khe na ahih leh zong savun tawm at keek in na khe tuam ziau leng a piang thei ding hilo hiam?” ci-in hongsan tak in hong gen hi.’
‘Kumpi pa zong tawlkhat hong lungngai in, a nunung ah hong thukim hi. Gamsung lampi khempeuh ah savun a phah sangin ama adingin a khe tuam nang’ savun tawm ak keek in ‘ Savun Khedap’ khat hong kibawl sak hi.’
Tawngno, hih tangthu pen mi khempeuh zak theih dingin gen thei leng maw ka cihcih khat hi. Tangthu deihna bel, na pa’n hong gen beh nawn dah ning. Ka kiim kapaam gamdai ta ahih paukhankapmanin tawlnga in lumta ning ei!
Hong it,
Napa
May 20, 2013
Columbus, Oh, U.S.A.
Comment piaknop aomleh...