Titanic tembawpi ~ Tdkhen

Titanic tembawpi ~ Tdkhen

Kum 1912, April 25 ni-in Atlantic tuipi sungah, a tuang mi(passenger) 1513 teng tawh a tumcip ta hi. Titanic tembawpi a taihatna pen naikhat sungin knok 20(tai 25) hat-in a tai mua-mua hi. Niangtui-sai, an sai, ettheih tuamtuam, kimawlna tuamtuam, cimphawng ding tampi om a, passengerte lungmuang takin a om zihziah uh hi.

A zingciang Nipi ni ding hong hita a, khua zong vot lua mahmah ahihmanin Tembaw hatna naikhatin knok 22 in khanto-in a tai mua-mua mai hi. Zan 11:00 ciangin Tembaw hong kilok geih hi. Vukkhalpi khat a palkha na hita hi. Sia-lua lawmlawm lo ahihmanin a kilang-thamin kithei lo hi.

Tembaw nasemte in tua thu a theih ciangin passenger khempeuh tualpi-ah pusuak sak hi. Tua tembaw in kigalginna-in mi 50 ta-bang a pua zo 16 a keng hi. Tua sunga a khakkhiat dingun naupang leh naupaaite a tentuahtuah ta uh hi. Tembaw ukpipa Captain Smith zong Wireless khan sungah hong tai cintengin, Wireless pa’ kiangah, “Manlang takin Atlantic tuipi tung khempeuh-ah patau kona ging sak in” a ci samsam hi.

Tua thu a kizak ciangin tembaw khempeuh Titanic omna lamah hong delh naunau uh hi. Tuate lak panin, kumpinu in Titanic a huh dingin a bawl’, Titanic’ nau’nu a cih Olympic a cih pen hong hat penpen-a, naikhatin knot 24 hat-in hong delh vangvang hi. Ahizongin a U Titanic mu man lo hi. Tai 400 hong tung man bek hi.

Tua khit deuh London thu kisakna Daily Express in a gen dan-in, “Vukkhal a nawk’khak manin Titanic kisia! Leitunga tembaw lianpen in siatna tuak! Tumcip taktak mah a hiam?” Cih thulu in zangin news a suahkhia hi.

Kum 73 khit Sept 6,1985 in Daily Express in, “Vanluite a zong a kaikhawmkik pawl in Titanic tumkhinsa Atlantic tuipi taw Ft 13000-a om kimu kik hi” ci hi. Tuipi taw tai 2 leh a lang athuk, mi 1513 te laktoh kik ding thu a kikup laitakin, mi tampi mah in a om nasa mun mah-ah a om hithiat ding a utzaw uh hi. Tua mite’ lakah Titanic tembawpi kiat-a na lamdang a piang a mu khat a om hi.

Tua tuahsiatpi laitakin a mah pen kum 8 a pha numeino khat hi-a, a min pen, Mrs Winifred Van Togerloo ahi hi. Amah pen naupang kihotkhiatna tunga kihel thei ahi hi. Tua thu a kikup ni, Oct 6, 1985 in amah zong a kihel hi. A nalamdang muh a genna ah, “Tembawpi kisiat laitakin mikhat, vanthemte khat tungah hong kilawn kawikawi-a, ‘Jesu na nei nai hiam, Jesu na nei nai hiam’ ci-in tuitunga a laamlaite’ kiangah a kihot kawikawi hi. A sawtna teh amah zong koi lam tung hiam thei nawn keng” a ci hi.

Hih tembawpi(Titanic) tawh kisai a kigenna om kawikawi…Khristian ENCYCLOPAEDIA sungah, tua tembaw vanthem tungah tuanga a awng’kawikawipa pen Scotland mi Pasian thuhilh minthang Rev. John Harper hi kici hi. Tua pa’ kikona a za kha, kihutkhiatna tungah a kikha, naupang suaktate’ laka khat in lamdang salua-in, tua kikona a zak ciangin a piangthak hi. Tua zawh a sawt loin kiko-pa kimu nawn lo hi. Tua piangthakpa pen Philpot Tabernacle Hamilton ahi hi, ci-in page 382 na-ah kigelh hi.

**Tu laitak mahmahin zong Titanic tembawpi tunga tuang mah bang i hi hi. Na pumpi Titanic in bang phul’ kha ding na thei khol kei hi. Na lamet mahmah laitak, na lungmuan mahmah laitak, na kiguankhual mahmah laitak, a bul na patphat mahmah laitak, na tupna na tun dekdek laitak, kuama’ nuntakna na phawkloh laitakin na nuntakna in vuukzawlpi na taih kha thei hi.

Na lungmuang hiam, na khamuang hiam, sihna tuipi hong lian khaleh, bang na ciding hiam? Na piangthak nai hiam? Vangam na tun ding na kitel nai hiam? Nungak 10 te bangin namgimtui(Kha Siangtho)na sungah na neih lam na thei hiam? Tua bang theihtheihna na neih keileh a hun lai-in namgimtui zuakte(Lungdamna thu=Gupna thugente)kiangah a man piak kul lo-in va lei in. Nungak 10 lakah 5 pilin, 5 hai hi ci hi. Nang a koi lamah na om zaw hiam? Tu laitaka eite’ aadingin hong genkholh sakna ahi hi.

Nungak 10 te in i Biakna, i Pawlpi genna hi a, meivak bung, meivakbu’ bang ahi hi. A pil nungak 5 te in meivak bung sunga namgimtui(Kha Siangtho) neite ahi hi. Tua pen i biakna a thuthuk’na, i biakna zungpi, tua Biakna tua Pawlpi neipa Jesu ahi hi. Biakna, Pawlpi a neipa Jesu a neite nungakpil 5 te ahi hi. Biakna, Pawlpi sungah i om’hangin Jesu kineilo thei cihna hi. Tuate pen nungak hai 5 te hiding hi.

Bangtan biakna na zui khin zongin, bangzahin biakna na hahkat zongin, bangzahin Pasian’nasem lawhcing na hita zongin na sungah namgimtui(Jesu) om leh omlo na tel’keileh lunghihmawh huai teh! Namgimtui(Jesu) a neite in thei a, a theilote a neilo hipah hi.

Jesu bek hi lampi, Jesu bek hi nangaa’ dinga hong si! Jesu bek hi biakna guipi, Jesu na neih keileh bang Biakna, bang Pawlpi-ah na om zongin gui leh zaam a neilo hiziau teh…Jesu na neihleh na Biakna, na Pawlpi pen nangaa’ dingin a man nei hipan ding hi. I biakna a thuthukna in Jesu hi. I biakinn sungte Jesu’ sisan gim a namh keileh i biakpiaknate Pasian in namtui a sa tuan ding hiam? Ei’aadingin man nei tuanlo ding hi.

Tua ban-ah, na zin na vahnate ah Pasian’mite tawh kithuah den kha lo ding cin a, biakinnte a om’lohna mun zong na hi kha ding hi. Nang bek om in, gamdai na kisa kha ding hi. Nangbek omlo hiteh, nang’ na theihloh hangin nang’ theihma-a hong thei khat na om hi. Na zakkhak loh man bek hi a, amah in ‘Lawm’ hong ciden den hi.(John 15:15-16). Na dawntheih ma sung amah in nang hong zuizui den ahi hi. Amah’n hong zuihzuihna hangin na dau zong a paipai hithei lai hi teh!

Ahi zongin ama’ aw na zak ding a deih manin, na muh na etet-te leh na ngaihngaih a ging na zaknopte hong off sak phot thei ding hi. I lawm, i it mahmah khat in hong phawk tuan kei henla hileh, i kihil’nop teitei hong bang ding hi. Tua sese sangin thupha hong piakpiak sung mahin amah zuan mai in. Na thuphate a zahnih-in hong pung ding hi. Nang na kha a muang lai ding hi. Sih kihtak keeina na nei nawn kei ding hi. Hunsia hong tung mah lezong, a sia-no bekkhat tung tawnin mite na khamuan thei lai ding hi. Hih in Titanic tembaw vai’ ahi hi. “Topa in thupha hong pia hen!” Tdkhen