Khuabup in a hau sak Nu ~ Lian Tuang

Khuabup in a hau sak Nu ~ Lian Tuang

Tuithangte na hihleh mihaute nai ve vua maw cih kammal pen ka za kha zelzel hi. Theih ngei loh khat peuhpeuh tawh i kiho ciangin na khualui bang hiam i kici ciat hi. I khualui zui in i kiho ding kammal a zong toto pawl ihi hi. Tuithangte hau hi a kicihna pen ataktak in mi tampi hang hi loin unau innkuan khat hang hi lel hi.

Amau unau hau in mi lakah ong kidawk mahmah ciangin khuabup nangawn in mihaute ong kici ahi hi. Amau unau pen pasal 6 le numei 5 pha uh a, a vek in mihau cih ding vive ahi hi. Avek un ci thei mahmah uhi.

1) Anautum pen Thomas Khanno hi a, tu laitak mahmah in zong sum hau mahmah khat in i theihsa ahi hi. Midangte tungah itna lainatna thukhualna nei ngiat in pil le cim a thuahkawm khat ahi hi. Piakkkhiatna hat in Pasian a it mahmah khat ahi hi. Zangkong ah teng hi.

2) Rev. Go Nang (AMC) in biakinn innmun thu a gen ciangin Mandalay a pa Ginno a cihcih pen Thomas Khanno’ u hi a, Tuithang khua ah lainatna sang phut in genthei hamsa mi tampite pilna le Pasian thu tawh a pantah ngiat pa ahi hi. Tu laitak mahmah in kawlpi ah mikang sia/mah te tawh IELTS a hilh te pen pa Ginno tapa makaihna mah hi lai hi.

3) Tuithanga vanleng inn neite a kicici pen pa Tungte hi a Thomas Khanno u mah hi leuleu hi. Pa Tung pen hausa makai siam in khua le tui a deihsak mahmah khat ahi hi. Khua le tui a ding ama neihsa sum le paite itsit het loin piakhia den hi.

4) A u pen Pa Kap hi a, mi nuam sa mahmah khat ahi hi. Tedim nangawnah mawtaw hoih a tam nailoh laitakin Tuithangah a mawtaw tawh a teng hithiat ngiat khat hi zel hi. Kum tam pian ciangin kawlpi ah lal suk hi.

5) Pa Khampi pen sum bawl siam in a hangsan mahmah khat zong ahi hi. Pawlhuai mahmah in lawm le gual hau mahmah hi. Tulaitak Zangkongah teng hi.

6) Pa Dalmung pen gankhawi le lokhawh singpuak nasep nuam sa in Tuithangah a teng hithiat khat ahi hi. Neihsa lamsa kicing takin nei zihziah lel hi. Tuithangah teng hi.

Sanggam numeite 5 om a khat pen nu tawh kikhawl suak in a dang tengin pasal nei in tu le ta zong tawi tek ta uhi. Hih teng khempeuh pantah in a khansuahpi pen Pi hi a, tu in kawlpi inn panin ong nusia ta hi.

Pi pen hampha ka sa mahmah hi. Tu nei in tu sawn zong mu man lai hi. A tate a tu ten it in, it dan zong siam mahmah uhi. A tu a tate a it zaw ding kituh ziahziah uhi. Amote in zong it in nuam kisa mahmah uhi.

2009 kum May myo ka pai khat in Pi in GSM phone na tawi mawk hi. Tua hun lai in Zangkong, Mandalay khua sung nangawn ah GSM phone nei kitam lua nailo hi.

Tua hun lai in pitek kum 80 gual GSM phone a tawikha pen kawlgam sung nangawn ah tam hetlo dingin ka lamen hi.

Hih bangin tute tate it in a pantah siam mahmah pi Sian Za Cing (95) in 27 July in kawlpi inn pan ong nusia ta hi. I dah mahmah hi.

Amau innkuan sung kimakaihzia tungtawnin i et i ciin ding thu tampi om dingin ka lamen hi. Pi Sian in a om nawn loh nung nangawn ah mi tampite ong makaih toto lai ding hi ta hi. Lian Tuang