US kiteelna etna: Makai thak in vaihawmna a let hun ta hi: Trump

US kiteelna etna: Makai thak in vaihawmna a let hun ta hi: Trump

Nov. 4, 2016: US presidential election ni ding taktak Nov. 8 hong naih tektek a, tu-in vote a ma khiat (early voting kici) ah million 30 in a vote pia khin ta uh hi. States 37 leh District of Columbia (DC) ten vote khiatni taktak (Nov.8) tun ma-in vote nei ten amau mimal khiat theihna dingin leh mail panin vote a khiat theihna dingun phalna pia uh hi. Opinion poll ah hat zawk deuh mah manin Trump zong kimuang pian ta a, “Mai Pithai (Tuesday) ni ciangin thuneihna i la ding a, thuneihna America mipite tungah i pia khia ding hi.

I khualzinna nuam uh (vote zon hun) a bei ding hun tun dek ta a, makai thakin vaihawmna a let hun ta hi. Mivomte, Hispaticte, mikangte leh mi khempeuh a tawpna ah i kipumkhat ding hi. Mailam hun ding en in, i daih dide leh kamdam i zat hun ta hi. Mailam ding en in hanciam lai ni. Pha hi, Donald aw, migi in la, hoih hithiat in om in,” ci-in nui phempham in gen hi.

Kuamah a hat zawkna a om mel lohna “battlegound States ahih kei leh Swing States” a kicihnate ah Trump, a zi leh a ta ten vote zonna nasia takin nei lai ding uh a, tawl khat amah a langpang ngei Mexican mi Republican Senator Ted Cruz in zong vote zonsakna nei ding hi. Democrats pawl pawl nasia takin vote zong dingin kithawi ngeingai lai uh a, tu ni a kipanin Obama, Bill Clinton leh a tanu Chelsea, Senator Bernie Sanders leh Vice-President Joe Biden in zong state giat kiim ah nasia takin vote zonna nei lai ding uh hi.

US leitaw lam (Southern States) – Texas, Oklahoma, Mississippi, Alabama, South Carolina leh mid-Western States – Kansas, Nebraska, South leh North Dakota cihte pen US khangthu adingin Republicans partyte hatna hi a, Washington, Oregon leh east coast State kicihna state a hun khop pen Democrats partyte hatna ahi hi. Kuamah a hat zawk mel lohna “Swing States” lak panin Ohio leh Florida state-te pen 2008 leh 2012 in Obama in ngah ahih manin Hillary in zong hih munte ngah ding mitsuan in nei hi.

Obama’ hunin khangnote, mivomte, Hispatics leh Asian mi ten Democrats adingin vote na nak piak mahmah uh a, ahih hangin tu kum in hihte pawl vote piak ding lawp nawn mel lo uh hi kici hi. Republicans partyte pen biakna lam a uuk diak tengin a taangpi in pia hamtang uh hi. Ohio leh Florida ah Trump leh Hillary kidem thei mahmah uh a, Trump in vote nei tamna pawl state-te ah hih hoih pian hi kici a, Swing State lak-a kihel Ohio leh Iowa ah hat ding lametna tawh Trump in vote nak zong mahmah hi.

Democrats lamah a awn den Pennsylvania cihte pawlah Hillary in hih hoih mahmah hi ci-in kigen a, Republicante lamah a awn den pian North Carolina, Arizona, Colorado cihte ah vote a ngah theihna dingin Hillary nasia takin hanciam lai hi. Trump a minthan’ luat loh hangin amah langpang Republican party gum (GOP supporters) ten Trump deih bawl pian ta uh hi kici hi. -The Hindu/ Thang Khan Lian