Huaihamna in hongpiak supna @ Kumpi Midas

Huaihamna in hongpiak supna @ Kumpi Midas

Nidang lai pekpek in Greek gam ah a hau mahmah le a lian mahmah Midas kici kumpi khat om hi. Amah pen huaihamna le lungkimna a nei theilo, kham (gold/suai) a pakta ngiat, a deih ngiat kumpi khat ahi hi. Amah pen kumpi ahihna tawh kizui-in hau mahmah a, innmun golam, neih le lam kicing mahmah a nei mi khat ahi hi. A inn sungah zong kham le ngun tampi a nei, a khol zihziah khat ahi hi. Tuate banah a ithuai mahmah tanu khat zong a nei hi.

Ama neihsate in amah lungkimsak theilo a, kham (gold/suai) deih behbeh mai hi. Huaiham behbeh lai hi.

Zan khat a kham (gold/suai) kholna ah lut in enen mai-a, lungkim zo kisa nai mahmah lo hi. Tualaitak in mi khat (vantung mi a bang) a kiangah hong ding a,

“Kumpi Midas aw, na lungkim hiam? Na neihsa zong kicing mahmah ta ahih manin bangmah kisam nawn kei niteh maw,” a va ci hi.

Ama’n, “Ka lungkim nailo hi,” ci-in a dawng hi. “Bang hong hihsak thei ding ka hi hiam,” ci-in a dot kik ciangin,

Kumpipa in, “Ka khut-a ka khoih/lawn khak peuhpeuh kham (gold/suai) hong suaksak in,” a ci hi.

Tua ciangin mipa in, “Na takpi ahi hiam,” ci-in a dot ciangin ,”Ka takpi ahi hi. Tua bangin hong piangleh ka lungkim in ka lung nuam ta ding hi,” ci-in a dawng hi.

Mipa in, “Na deihna bangin hong piang tahen,” a ci hi.

Tua bang tawh zan a ihmu hi. Hong khanlawh ciangin zan nitak a, a kihona uh phawk kawmsa in, a lupna a koih/lawn leh kham (gold/suai) a suak pah hi. Tua ciangin nuam mahmah a, a maitai seusau pah hi. Lamdang zong sa in nuam zong nuam mahmah hi. A lungkim ding le a lungnuam mahmah ding a kisa hi…

A den ciangin a gilkial ahih manin an ne ding a kithawi hi. Sikkeu a let leh kham (gold/suai) a suak hi. Moh ne dingin a lak leh kham (gold/suai) a suak hi. Tui dawn dingin tui hai a lak leh kham (gold/suai) a suak hi. A lawn a khoih khempeuh kham (gold/suai) a suak hi. Lungmang kisa lua in, a annek sabuai ah a khut a ngak suk leh annek sabuai zong kham (gold/kham) a suak hi.

A huaihamna, a neihzah tawh a lungkim theihlohna in ama ading haksatna a pian’sak lam a theih ciangin, kisik kik le na sa lua in a kap hi.

A pa kahna awging a zak ciangin a tanu zong a pa kiangah hong pai a, “Pa aw, bang lunggimna le khasiatna nei na hiam,” ci-in a va dong hi.

A pa in kapkawm sa in a tanu a kawi leh a tanu zong kham (gold/suai) milim a suakziau hi.

Tua ciangin nakpi in kiko a, tua bangin a lawn khempeuh a piang dingin thu a piapa (mipa/vantung mi a bang) a sam hi.

Nakpi takin, “Hehpihna tawh hong huh in, ka neihsateng tawh ka lungkim thei ta ding hi. Tu-in ka huaihamna le ka lungkim theihlohna hangin ka nuntakna ah ka it ka ngaih, ka deih ka pahtakteng a sumh ding ka hita hi. Hong huh tapeuh in,” ci-in a kiko hi.

Tua ciangin mipa(vantung mi a bang) hong kilang kik a, “Kumpipa aw, bang hong hihsak ding ka hihiam,” a ci hi.

>Kumpipa in, “Ka khialhna a lian lua hi. Ka kisik mahmah hi. Hehpihna tawh ka tanu hong nungta sak kik, a ngei hong bang kik sak inla, ka khut zong a ngei hong bangsak kik ta in,” ci-in a thuum hi.

Tua ciangin mipa (vantung mi a bang) in, “Kumpipa aw, mihing nuntakna sungah huaihamna le lungkim theihlohna siatna tampi hong piak banah supna tampi hong piak theihzia tel ta na hih manin tu-a kipan lungkimna tawh nungta ta in. Na lunggulhna om bangin kong sepsak kik ding hi,” ci-in kumpipa tanu damsak kik a, kumpi khut zong a ngei bangin a koihsak kik hi…

Ngaihsut ding

I nuntakna ah eimau khom tekin neih le lam i neihte tungah lungkim theileng lungnopna i ngah ding hi.

Huaihamna le lungkim theihlohna in ei ading supna hong piangsak in dahna hong guan thei hi.

Tuni a na neihteng tawh lungkim thei inla, thupha hong pia Pasian tungah lungdam ko in…

Lungdam
Dong Mung

Note: Manglai tawh a tangthu kicing a sim nuamte adingin Google ah King Midas’ Golden Touch cih tawh zong lecin na mu thei ding hi. Hih taangthu tungtawn in i nuntakna ah kipuahphatna i neih theih ding lunggulhna tawh deihkaih kawmin kong teisawn ahi hi.