Huilak aa lam dengdeng thuman thutang’na ~ Peter Suumpi

Huilak aa lam dengdeng thuman thutang’na ~ Peter Suumpi

“Pil tei” cih mikhat in “thuman thutang’na” tuisung ah hong paisuk hi. “Thuman thutang” in zong hong zamhzamh in tuikulh tung khat hong tung hi. Tua tuikulh tungah atawlngak kawm in ahuh ding khat peuhpeuh angak hi.

Tawmvei khit ciang agamla pan la kisa aw khat aza hi. Amah zong thoto in tua la kisakna lam agal et hi. Gunkuang no khat hawt kawm in ama lam hong zuan khat amu hi. Tua gunkuang tungah “Lungdamna” ci in akigelh amuh ciangin galsap in kei “thuman thutang” hing ci in agal-awt hi.

“Lungdamna… lungdamna aw… kei thumanna hing ei. Hehpihna tawh na gunkuang ah hong tuangsak ve.” ‘Thuman thutang’ ii huh ngetna pen ‘lungdamna’ in azak ciangin nuikawm in…

“Ha… ha… bang hithei mawk ding. Thuman thutang omleh kei bang ci lungdam theih nawn mawk ding. Hih leitung ah ensin… thuman thutang gen aa alungdamlo mitampi… Sorry peuh mah ei… nang bel hong huhzo lo hi mai ing ei.”

Acih kawmkawm in ‘lungdamna’ hong paikhiat san hi. Lungdamna apaikhiat khit ciang in ‘Mun’ akici mikhat hong tung leuleu hi. ‘Mun’ amuh ciangin ‘thuman thutang’ in…

“Mun… mun… kei thuman thutang hing. Hehpihna tawh na gunkuang tawh tuipi nawl hong puak ve.” ci in athum leuleu hi.

Mun in agunkuang agamla lam ah hawt in… ‘hithei kei… hithei kei… nang pen ka gunkuang tung hong tuangsak zokei ning. Hibang in kei zong mun kangah ding abaih hikei. Nang hongsam mawk leng hi ka mun nangawng zong tanlawh kha ning in” ci in paisan leuleu hi.

Thuman thutang zong lungkia takin anungzang dapphah in sehnel tung ah hong kipai suk in mun ii nungzang hong gal-et hi. Tua bangin a etkawm in tellohna le lungkaatna hong kihel hi. Tua kawmkawm in angak tentan lai hi.

Asawtlo in atah amanlo aw ging pawl khat tawh ‘Kidemna’ hong tung leuleu hi. Thuman thutang in lungdam kikpak takin asam hi.

“Kidemna… kidemna aw… na gunkuang kong zui thei diam oo?” “Nang kua na hia? Nang ko ading bang phattuamna hong pia zo ding nahia?” ci in kidemna in dong hi.

Thuman tuntang in kei kua cih hong gen nuam keng. Hong genleng na gunkuang hong tuangsak kei kha niteh. Ahihang thuman thutang ihcih pen thuman thutang mah hi mawk aih ciang aa. Atawpna ah kei ‘thuman thutang’ hing ci in hong gen hi.

“Aw… nang thuman thutang hi mawk maw… nang kei haksatna hong guan tawh kibang kisalo nai hia? Kidemna hizah aa atam laitak ko ii thuman loh kidemna te ah nang hong kihel mawk lecin bang hithei mawk ding”

Acih kawmkawm mahin kidemna in zong hong paisan leuleu mawk hi. Thuman thutang zong lam-etna bei in bei in bei dipdep in a om laitak agamla pan aw khat hong za hi.

“Hei khangno… hong pai inla ka gunkuang tung hong tuang o” Samkang, khamul kang puteek khatin agalsap hi.

“Keipen ‘Hun’ hing ei.” “Bang hang kei hong honkhia nahia” “Thuman thutang bangzah aa thupi cihpen hun bekin thei ahihman hi.”

Tua aciahna lam lampi ah gunkuang kibung lungdamna, mun le kidemna te amuh ciang in puteekpa in akhuisat kawm in… “Hmm… thuman thutang om kei leh lungdamna zong sauvei lo, mun zong sawt kiplo in kidemna zong agual lelh ding mah hi” cih san ziau hi. Peter Suumpi (Source: Zijui)