I omna munding ah i omtheihding kisam ~ Dong Mung
Kala-oh (Camel) nutate mun khat ah hong lupkhop hilhial laitak un, Kala-oh no in a nu kiangah dotna pawlkhat hong dong hi.
Kala-oh no: “Nu dotna pawlkhat kong dong thei dia?”
A nu: “Bang in hong lunghimawhsak ahia ka ta…dong lua o Boih.”
A ta: “Ei Kala-oh-te’n banghang thuvuum(nungzang vuum) nei ihia?”
A nu: “Ee… maw Boih… Eite pen sehnel gamkeuna a nungta nam ihih manin tui i khol nadingin thuvuum i kisam hi. Banghanghiam cihleh tui tawh loin sawtpi kinungta zolo ahih man ahi hi.”
A ta: “Aw…aw…himaw…Tualeh…banghang i khete sau zeza in, i khepeek dingte pum(beem) sese ahia leh Nu…”
A nu: “Hih i khete pen sehnel gamkeuna mun ah lam saupi i pai(kalsuan) zawh nading ahi hi. Hih i khete hangin a dangte(ganhing dangte) sangin sehnel gamah sawtpi, gamlapi lam a paizo ihi hi.”
A ta: “Aw..aw…Nasia si e…Tua leh banghang i mit khute a vuun sah in om theuthau mawk hiam? Khatveivei bang ciang ka mit hah ding hong nawngkaisak sa in hua simsim mai ing.”
A nu: “Ka ta aw…tuate pen ei ading a manpha mahmahte ahi hi. Banghanghiam cihleh sehnel gam sungah huihte hong nungin piingpeeite khawng hong kipei ciang, i mit sungah niin(sehnel) khawng hong lutloh nadingin hong dal hi. Adangte’n(ganhing dang) tua bang neilo uh hi.
A ta in tawlkhat thu a ngaihsut khit ciangin, “Sehnel gamah kalsuan laitak dangtaakna pan kidal nadingin tui kholna thuvuum om, tua sehnel gam sungah nuamtakin kalsuan theih nadingin khe gina khat nei; banah sehnel gamkeuna sunga huihpi piingpeite hanga hong piang haksatna pan hong dal ding mitkhu vuun gina tak nei… Tua hi-a GANHING KHAWINA ah bang hih himawk ihiam?”
Lungngaih ding
- Siamna kivakna tampi nei…
- Theihna thumuhna tampi nei…
- Tuahkhak thuakkhak pilna tampi nei…
- Hihtheihna bukim tawh kidim…
Pil, tei, ciim…kician..ihi phial zongin eima omna ding mun ah i om khak keileh tuate’n manna neilo hi.
Na sunga om Pasian hong piak na siamna, na hihtheihna, na pilnate a mun lian ding mah ah zangkhia thei lecin, nang ading lawhcinna, midangte ading thupha suak ding hi.
Bangzah takin siamna, theihna, pilna ciimna, bucing bukim ihi phial zongin eima mun dingah i om khak kei leh… ei ading lungkiat huaina, midangte ading thanemna piangsak lel ding hi.
Kala-oh a pii (a nu) in ama sunga om hihtheihna, thupitna, ginatna, thahatnate angtang takin a ta(a no) kiangah a gen hangin, amau Ganhing Khawina sungah omin, huang tawh ki-uumna mun ah a hun uh bei ahih manin manphatna omlo tawh kibang hi. Ama gengen hihtheihnate pen tangthu bek hong suak mawka, amau adingin phattuamna, manphatna neilo hi.
Kala-oh no bangin eima sunga om hihtheihna, siamna, thahatnate telcian in manpha takin zangkhia leng…tangthu bek hinawn loin a taktak hong hidinga, thupha i sanna bulpi hong suak ding hi. Dong Mung Source: Baby Camel and Mother
Comment piaknop aomleh...