Ni Kum-a Ka Sermon-te Koi Ah Om? ~ Rev. Zam Khat Kham

Ni Kum-a Ka Sermon-te Koi Ah Om?

Khatvei, pawlpi kem siapa khat in a zi tawh a laibute laibung sung ah guangguang hi. A inn uh a kituah ding uh hi a, pastor khat’ neih lakah a gilpen mah ahi a laibute mah lunghimawhpen hih tuak hi.

Thuhilhsia a suah cil a kipanin a sermon manuscript-te peuhmah limtakin kem cinten den-a kum khat khit kum khat file sitset den hi. A kum a kum-in tuam kep sinsen-a a tuamna tung ah a kum gelh pahlian-in a zon kik nop ciangin haksa het lo zawzen hi.

A khut sung ah a beisa kum thum sunga a sermonte kikepna file-te tawi leetlaat sa-in zonzon khat nei niloh hi. A ni kum sunga a sermon-te mu zo pak lo ciitciat hi. A zi kiangah, “Ni kum sung buppi-a ka sermonte koi ah om mang ta aleh?” ci-in dong hi.

A zi in bel, a nuih kawm piansa-in, “Ka ci mah ve! Na thuhilhnasate, na sermonte bang suaksuak hiam a ci den mah kai ve!” ci-in phin phot se hi.

A cih takpi zong hi pian mawk hi. A lawmpa in hun tampi pia a, nai tampipi sung a kigin tantan a sermon-te a gen khit teh bang suak ahi tam? ci-in ngaihsun kha zel hi. Pasian’ thu vanglian hi, cih bel a um lo hi het lo hi. Lungdamna thu Gospel in mite’ nuntakna khel lua hi, cih zong a theih mah ahi hi. Ahi zongin khatveivei bel, tua sermonte a kigen khit teh huih lak ah maimang mawk maw leh, a cih nop dekdek hun om ahi tam maw!

Eimah ciat in zong ngaihsun mah lehang e! Sermon khat i zak khit teh bang i cih a leh? Nung Nipi Ni a siapa’ sermon bulphuh Laisiangtho mun i thei lai hia leh? A thugente i phawk lai hia? Peuh kithei nawn lo thei mawk hi ven. Ki phawk nawn lo thei lua hi ei! A lungkiathuai mai hia leh? Lungkiathuai peuhmah lo hi.

Zan-a nitang koi ah om ahia? cih dotna tawh kibang ka sa hi. Zan-a nitang tuni-in tang nawn lo mah hi. Om nawn lo hi. Ahi zongin om lai hi, zong kici thei veve hi. Zan-in tua nitang a tan lai-in anteh theipuamte, singgahte sungah lut-in khangsaka, tuate tuni-a i nek zong om-in zing leh thai-a i nek ding zong om ding hi. Tuate in nuntakna piangsak hi. Tuni-a i nek singgah sung ah tuma ni bangzah, kal bangzah, kha bangzah hiamkhat lai-a nitangte, guahtuite, tuikhute a kihel hi gige hi.

Tua ahih leh a kigen/hilh khinsa sermon-te koi ah? Tuate koilai tung mang uh ahia? A beimang khin tawh a kibat hangin Pasian’ hehpihna tawh Pasian’ kamciamsa a om bangin a sep ding uh sem khin-in a gah dingteng gah khin hi (Isaiah 55:11). Pasian thu peuhmah a mawkna-in kilehkik ngei lo hi. Nungta-in vanglian hi (Hebrews 4:12).

Hun khat lai-in America i cih pen gam thak hi a, Europe khawng a khantoh sim mahmah khit cianga kisat pan ahi hi. A kisat zawh a sawt lo-in gam thupi khat suak pah mawka, Piancik-te (Frenchman) Alexis de Tocqueville kici khat in bang hangin America hihzah-a thupi ahi hiam, cih a kan dingin America ah pai ngei hi. A paina thu pen, “to study what had made America great” cih thu hi ngiat hi. Mun tampi pha-in mi tampi tawh kimu-a thu a dot kawikawi khit ciangin:

“I sought for the greatness and genius of America in her commodious harbors and her ample rivers, and it was not there; in her fertile fields and boundless prairies, and it was not there; in her rich mines and her vast world commerce, and it was not there. Not until I went into the churches of America and heard her pulpits aflame with righteousness did I understand the secret of her genius and power”
na ci ngiat hi, ci-in kiciamteh hi.