India gamsung aom ATM sungah zusa lutin $18,000 manneiding petsiagawp

India gamsung aom ATM sungah zusa lutin $18,000 manneiding petsiagawp

India gamsung aom ATM (Automated Teller Machine) khatpanin sum ki lakhia theilo, Withdraw theilo in tawlkhatsung siacip hi. Tuaciangin ATM set apuahdingin Bank Technicians te kisawlkhia a, ATM bungsung akihonkhiat ciangin zusa te’n sumteng apetgawp ahihlam kimukhia cih Reuters pan kizasawn hi.

ATM Kiosk aki honkhiat ciangin asungah India sum (Indian Rupee Note) bekbek zusa te pehzawngawpsa in kimukhia a, tuasung te akigawm in $18,000 bang phading hi. Zusa asisa a uih mahmah khatzong om hi ci’n State Bank of India (SBI) in Thursday ni in genkhia hi.

Hih ATM set aomna pen India, Assam State sung aom Tinsukia Town sungah ahihi. SBI Branch Manager asemlaitak ahi Chandan Sharma in agenkhiatna ah “tua ATM pen asiatzawh, aki zattheih lohzawh sawtsim pianta hi. Bank panin apuahding in Technicians te kipaisak a, ATM Kiosk aki honkhiat ciangin asungah Indian Rupee Notes bekbek aki petzansa in omzihziah hi” ci’n genkhia hi.

Bangci bangin ATM Machine sungah zusa luttheihiam cihpen hoihtak in kikankhiading a, tuaban ah mailam ah hihbangdan in buaina aomnawnloh nadingin ki vaihawmding hi ci’n genbeh hi.

State Bank of India (SBI) akici pen India gamsung ah Bank agolpenpen “India’s largest bank” ahihi. India gamsung ah SBI te ii ATM Machine bekbek akigawm in 50,000 bang aom kawikawi ahihi. India gamsung aom ATM Machine atamzaw pen Security aomnading in agei ah CCTV aki thuahpahpah ahihi.

Ahi zongin hih zusa alutna ATM ah akithuah CCTV sung aki etciangin zusa alutlam kimulo ahih manin bangcilut cihpen kitheilo cihi.

More: ATM sungah RM800,000 thunbehding in apai Security Guard mi 4 te damiah kitaih

Tua ATM Machine sungah akigawm in India sum 2.9 million rupees ($42,685) akikoih hi a, tualak ah asialo zusa petsiatloh pen 1.7 million rupees ($25,022) ki ngahkikthei hi.

Zusa ii petzangawp tepen Reporter te’n Photo zaihkha uh a, tua Photo sungah India sum 500 Note leh 2000 Note honkhat aki petzawngawpsa in kimuthei hi. Sawltak #zomidaily