Gamvangla Aom Ka Ngaih

Gamvangla Aom Ka Ngaih

Kong it lawm,

Ngaihno aw, tu laitak in hih ka lai-at na sim khak loh hangin khat vei teitei sim kha dingin hong um ing. Kawlte paunak ah,“ paakte’ thu huihdam in pua , mi’ thu mi in pua,” acih bang mah in e. Nasim khak ni ni-in hong ciah in maw! Ih kimuh nawn loh ding ka lau man hi.

Ka kiangpan in na paikhak khit ciangin nang tawh ih om khop lai hun te, i kholhkhop hun te ngaihsun in khat veivei ciangin keiguak nui thei zelzel hi.

Tun i pate in kei pen hua a gam la pi pekpek (mawtaw tawh ni nih bang pai kul ci) zato khat ah hong om sak ding ci. Ken zong amun thei lo in maw mi in kum khat bang om thei, tuasang zong sawt zaw thei hong ci lai e! ‘Ut keng pai kei ning’, ka cih hang pa te in hong pai sak sawm veve in ka vai ding zong a gelgel laitak hi.

Ahang pen ka om na peuhpeuh ah sun hita leh zan hita leh mawk nuihnuih ci pong e. Tua hang a zato ah om ding ci. Zato ah om leng nuih lo ding ai tam, bang cidan hiam a vaihawm dan uh. Pa in maw,“ na lawmnu sam in, amah hong ciah kik leh zato hong puak lo ding,”ci hiven! Ahi hang tukha bei ma-in hong ciah kei leh zato ah hong puak teitei ding ci. Hih lai nasim khak nini in hong ciah vingveng o maw.

En ve tua hih kei leh pa te’n zato ah hong puak dingin kei guak bek tua ah a tawmpen kum khat bang om thei kha ding ci lai hiven. Nang tawh bang ci kimuh kik ding. Tua bang dan hi leh zong nuntak zawh ngap keng! Ke’n lungleng haksa sa lua ing!

Tua ciang e maw, ken kasam zong kua mah metsak lo in, ka khutcin zong kua ma tan ding phal lo. Pa bangin,“ mihai bang a, om kengh! Na sam met in la, na khutcin khawng tan in, hoih tak ki puah sitset in,” hong cici ei! Ken bel nang bek hong ngak, amau kiang ah zong bangmah gen se khang kong ngak lam.

Zingsang zii khawng ah pai leng mi’n moh khawng, puan khawng hong pia ziauziau e! Nidang tawh kibang lo, mi’n zong hong it thei peuhmah ta hiven! Ulian te’n hoih tak hong hopih na pi-in naupangno te’n,“ mihai pa, mihai pa, mawk nuihnuih kawh,” ci-in ka gal pan hong ci pahpah e maw! Ken bel amau bangmah paupih kik se keng, nuihsan ziau lel e maw! Innpua pai khia nawn lo-in innsung ah omcip leng a nop zaw kei tam ci simsim ing. Nang om hi le cin mite’n hong koko in, hong simmawh bawl nawn lo ding cih ka ngaihsut ciang nasa ing!

A manlang penpen in hong ciah o maw. Tua hileh kei zato pai kha lo ding! Ih kimu khak nawn loh ding zong lau lua ing. Hong ciah kik o maw, Ngaih!

Na u.

August 23, 2013

Columbus, Oh, USA