Mi hampha ~ GS Pau

Mi hampha ~ GS Pau

Leitung khang khat nuntakna sungah a nuai-a bang mite mi hampha taktak cih ding ahi uh hi.

1. A ngaih tawh kiteengkhate

Mihingte pen i ngaih a tuam, i teenpih a tuam hi theipha mahmah hi. Kawlte in “A kingai khempeuh kiteengkhalo a, a kiteeng khempeuh zong a kingai hi tuanlo” ci uh hi. I ngaih khempeuh zong kiteenpih ngamlo a, i teenpihte zong i ngaihpente na hi khol lo hi. Nupa khempeuh zong a kingaih manun a kiteeng na hi khin peuhmah lo uh a, a kingailopi mah nu leh pa’ thuman’na leh thu khatpeuh hang tawh a kiteeng khawng zong ki-om hi. Nupa hi khin gegu napi khan tawnin a kingai thei kiuhkeuh lo, a lungleeng thapai khawng zong ki-om tuak mawk hi. Hih bang mite pen leitung khangkhat nuntak sung adingin mihamsia taktakte ahi uh hi. Tua hi a, a ngaih tawh a kiteengkhate mihampha taktak ahi uh hi.

2. A uuk a seemkhate

Mihingte pen i uuk a tuam, i nasep a tuam hi theipha mahmah hi. Zomi siavuanpi khat in,”Keima’ uuk taktak pen lokhawh hi, siavuan ka sep pen ka pa’ hong deihsakna hang hi,” ci-in gen hi. Kumpi ulian khat in zong,”Keima uuk taktak pen sumbawl hi, sumbul ding nei zolo uh ka hih manin uuklopipi-in kumpi na a seem pong hi ing,” ci-in gen hi. Zomi biakna makaipi khat in zong,”Keima’ uuk taktak pen galkapbu hi, ka nu leh ka pate’ hong deihsakna hang tawh Pasian’ na a seemkha hi ing,” ci-in gen hi. Sumbawlpa khat leuleu in,”Keima’ uuk taktak pen kumpi ulian hi, ka pilna in a cin’loh manin a suak zolo hi ing,”ci-in gen hi. Hih bang mite pen mihamsia cih ding ahi hi. Tua hi a, a uuk mah a seemkhate mihampha taktak uh ahi hi.

3. A duhduh ne thei-in a ne zote

Mihingte pen i duh a tuam, i neektheih a tuam hi theipha mahmah hi. Mi pawlkhat in a duh uh ne zo lua mahmah ding hi napi, a cidamna uh tawh kituaklo ahih manin ne theilo mawk uh hi. Gentehna-in voksa bang duh mahmah napi, sikhang natna nei uh ahih manin a ne ngam lo khawng ki-om thei a, niangtui bang zong duh mahmah napi, zumkhum natna nei uh ahih manin a ne ngamlo khawng zong ki-om thei hi. Pawlkhat leuleu in a duh uh ne theilua mahmah napi, zawn’ luat manin ne zolo leuleu uh hi. Hih bang mite mihamsia uh ahi hi. Tua hi a, a duhduh ne thei a, zong a ne zo mite mihampha taktak ahi uh hi.

4. Ama’ nopsak pawlpi ah a omkhate

Mihingte pen i nopsak pawlpi a tuam, i omna pawlpi a tuam hi theipha mahmah hi. Pawlkhatte tanau vai hangin nuamsalopipi-in pawlpi khatpeuh ah om geigai thei uh hi. Pawlkhatte leuleu, sum leh paai khat bek ngaihsutna hang tawh ama’ sanzia tawh a kituaklo pawlpi khatpeuh ah om kenkan pong thei uh hi. Numeite bang pawlpi dangah pasal a va neih uh ciangin ut ta kei leh a pasalte’ pawlpi sung mahah a om tentan uh hong kul mawk hi. Hih bang mite mihamsia cih ding hi. Tua hi a, ama’ lunggulh pawlpi, ama’ nopsak pawlpi sungah lungkim takin a omkha mite miham taktak ahi uh hi.

5. Ama’ nopsakna khua ah a teengkhate

Mihingte in i teennopna khua a tuam, i teenna khua a tuam hi thei mahmah hi. Kawlte’ paunak ah “Na nopsakna munah om ke’n la, a kilawmna munah om zaw in,” cih khat a om mah bangin nuntak zon’na tawh kizui-in nop i sak khollohna khua peuhah zong kiteeng kha thei hi. Pawlkhatte leuleu amau’ utna khua, amau’ nopsakna khua mahah teengkha uh hi.Tua bang mite pen mihampha cih ding ahi hi. GS Pau