Sahkhua Khangkhaanna Tawsawn ~ Pu Zokhai

Sahkhua Khangkhaanna Tawsawn ~ Pu Zokhai

Sanggam Ngaihteng, Laaisimna leh laaibawlna nangawn hong nawngkaaisak zahdong-in Zomi-tawh kisai tusungteng thupiang tuamtuamte-in hong-hencip ahihman-in veina bupite hong suahsuk zeelkha ka’hihman-in alungluut khollote-in na’ piicinna dungzuui-in hongna telsiam sak-un.

Amasa-in, Zomite mihing khuasakzia-tawh I-kalsuan hunpen moilaai, tomlaai mahmah-a, a-uangpen-in kum 150 cing naailo ahihlam I-thei ciat-hi. Leitung khang paizia-tawh I-tehkaak ciang-in Civil khuasakzia tuma kum tuulsawm-a apai khinsate en baanzo takei lehang, tuma kum tuul kim-a kipan thusinna leh thukanna leh sepsinna azangh Mikaangte ataangpi-a tuhun’ ading aki enteh ahihman-in themcik I-kitulh, I-kibaak nuam-hi.

Tulaaitak adamlaai, England-ah ateeng Sociologist (Sahkhuasiampi) Anthony Giddens’ laaibute tuma abeisa kum tuul kiim-a akigelhsa Greek mipilte’ laaibute leh Mikaang miluuite’ laaibute-mah bulphuh-in ama’ muhthak thuthuukpite gelhkhia-a asuut khiatna bangzah-in sah, tam khin-hiam cihthu I-mitmuh theihpak ding-in anuai-a nahvawh-ah nana meeklek lecin: http://www.google.com

Anthony-pen Mikaang khempeuh lak-ah laaibu agelh tampen hilo laai-hi. Ama’ laaibute leh ama’ pulaak thuluante (theory)te leitung buppi-ah kizangh cihzong hi naailo laai-hi. Adiak-in Sociology pupite Greek mipilpa Plato, Aristotle, Auguste Comte, Karl Marx, Emile Durkheim, Herbert Spencer, Max Weber, Georg Simmel cihte-a kipan khuaklianpi aneituam mite’ thuluan pan-in ngaihsutna leh muhna, saanna leh leptuahna, sepsinna leh agah etna pan-a akisuut laaigelh mipil tam cihtak-in tam-a, tua laaibute-mah saaikaak-a sepsinna (practice) ziak-in Mikaangte (English), Piancit (French), German, Russian, Seen-a kipan minamlian (pute’ hunlaai pekpan-a akiza) te-in tuhun-in leitung-ah tungtuangzo, lawhcingzo uhhi.

Zomi minam taangthu-ah Sahkhuasiamzil (Sociology) siamsinna genloh Zolaai piicing tak-a gelh theihnazah ciangding nangawn akisinlo, Zolaai leh Tedimlaai nangawn-tawh abuailaai, minam minkipding nangawn akitukalh laai zahdong-in I-tualniam uh-a, saangkah sunsunte nangawn-in siam taktak takeileh Kawlpau mah-tawh, Kawllaai mah-tawh ahihman-in naakpi-in kitualniam-hi.

Thamlo-in, saangkah sunsunte’ siamsinna bulpi-pen Kawlte’ thuluan hipahphot ahihman-in naakpi-in niam-hi, banghanghiam cihleh Kawl Gamukte-in akhangkhin gamte’ democratic kalsuanna kalh ahihman-in tuabang gamliante-ah akisin thuluan thupite leh laaibu hoihte tanh (khwey-daan; share) ngahlo uhhi. Tua ahihman-in Kawlgam a-ihmutcip sung-in gamdangte vaanlaai-ah leengta uhhi. Tua sung-in Zomite-in Kawlte’ vagil sung-ah tangciak-in nunlehmual-pen sial khekhaap sung-a uiphuk’ mun sang-in atoizaw-ah awkcip-hi.

Tua kawmkaal-ah, saangkah sunsunte-in Kawlte’ limited source bekpan-a akisin ahih-tawh kizuui-in siamsinna agah khempeuh Kawlgam’ ading bekmah-in kizangh pah-hi. Tualo gamdang-ah bukaan khia-in siamsinna ava-zomzo sunsunte-in ataangpi-in Theology hongsin uh-a, tua siamsinna pan-a agah khempeuh Zogam-ah pawlpi athak pianna guipi hongsuak leuleu-hi. Tuabang-in sahkhuasiamzil (sociology), silkansiamzil (science), khuaklamsiamzil (psychology), kiukna (politics), sumsinna (economic)-a kipan tualsung, tualpawl, tualleenphung (society) leh minam khantoh nading thaguipite khatbeek Kawlgam pan-in pianglo thamlo-in gamdang pan-inzong hongki ciahpih lo-hi.

Tuma adiak-in Kawlgam-in suahtaakna angah 1948 nungsang nangawn Zomite-in Zolaai-tawh kician tak-a akigelh laaibu gina khatbeek neilo-hi. Akigelh sunsunte Mualsuang, mualsuang, mualsung cihbangpeuh hi-a, minam phattuam nading kihello zahdong-in tawm-hi. Tuabaan-ah, minam minsel thupuak, thuthang (news) kician nangawn bangmahtham omlo-hi.

Thupuak, Laaitaai cihdaan anengneng a-om sunsunte nangawn-in sahkhua lamsang hitaleh kiukna lamsang hitaleh Sahkhualam Thutanna (Social Justice) lamsang kammal khatbeek kihello, hel ngamlo uhhi, ahangpen I-telsiampih ciatsa ahihi. Tuabang-tawh Zomi minam kalsuanna kum 100 sung-ah khantohna-pen “gamdang-ah sponsor zong-a Laai Siangtho sinding leh ciahciang-a pawlpi phuhding” cih longal khatbeek omlo-hi.

Pasian’ geelna sung-ah 2000 kum kiim-a kipan gaaltaai (refugee) minpua-in Zomite honkhat gamdang adiak-in akhangkhin gamhau gamliante-ah tuntheihna lampi-khat hongpiang-hi. Tua lampi atawnkha Zomi om sunsunte-in leitung sahkhua khangkhaanna lam-a thuguipite mitsuan lo-in “seppak ngahpah” tepawl bekbek-ah kituhteh-in minam’ ading maailam saaupi khual-a kalsuanna sang-in tumahmah-a neekpah lawhpah lam-ah ki-phuul keei-hi. Naakpi-in dahhuai-hi.

Ka’ zaakkiau khat-ah, Zomi sungpan-in USA-ah sanggampih khat-in MCWS ngah-in, England-ah sanggampih khat-in MCSS ngah cihthu-in themcik hong khamuangsak tuam-hi. “Seppak ngahpah” kalsuanna-pen khua-a I-sanggamte huhna lam-ah ahoih mahmah-tawh kisuun mah-hi. Ahizong-in, “Khua-ah mihau, minuamsa ka’hi-uh…” ci-a aciakciakte mahmah-in, “seppak ngahpah” tepawl hongbawh ciang-in paammaih sak-huai mahmah-hi.

Zomi minam buppi sung-ah ataangpi hualpi nih kipha-a, Zogam bulphuh-a khuasa pawlte leh gamdang bulphuh-a kalsuan pawlte cih-in ki-en thei-hi. Zogam-ah atung-a I-gensa mahbang-in siamsinna lam-ah kikhangkhaanna kician bangmah om naailo-hi. Gamdang-ahzong tuabangmah ahihi, banghanghiam cihleh “seppak ngahpah” mun pan-in bangmah pilna siamna adiak-in sahkhuasiamzil-tawh kizom siamna kidang kilkel lo-hi. Hih Zomi Hualpi nih kaal-ah buaina nangawn atawn atam-in piangkhin ahihlam kilangh ta-hi.

Abulpi-ah, gamlian akitun ciang-in Zomi tualniam lungsim ataangpi-pen siamsinthuahna anei hilo kimlaai mipil mahmah bang-in, laaisiam mahmah bang-in internet maaitang-ah ngalliam (hero) aseem hongpung mahmah-a, kipawlna tuamtuamte thulah (adivice) khawng pia giapgiap, thukhen giapgiap, mimal-a kiko giapgiap cihbang hongkhan ciang-in Zogam ahihkeileh Kawlgam huam-a kalsuan Zomite’ lampan “hihte bangmah hikei, minam it hikei, itleh hongciah in the, eima’ masuan eimah’n theipen hihang” cihlam-tawh huihlak daatlak-ah pankhopna khauhtak akineithei kimlaai gi (boundary) guhpi khat kikhung khiinkhian mawk-hi.

Hihbang kitoknawi hun (chaos) sung-ah, Zogam lam bulphuh mapangte’ saanna avekpi-in akhialhloh hang-in avekpi-in maan tuanlo-a, gamdang tungsate’ mapanna leuleu ataangpi-in khial simtham dektak-hi, banghanghiam cihleh I-tunna gam-ah mite hau-in pil uh-a, siamsinna naakpi-in saang theimahmah-uh ahihna-pen ei mimal asiam apil ahau I-kisakkhaak man-in I’ muhlehsaanna, uplehsaanna khempeuh ataangpi-in kitukalh simtham-hi.

Atelsiam ding-in kong lamen-hi. Gamlianpen leh gamhaupen-ah I-teenkhaak zenzen hang-in lolam (farm) kuanna khawng pan-in, setzung (factory) khat khawng-ah, sasemna, gan-gawhna phual khawng-ah, innlamna, buuklamna phual khawng-ah kum tampi I-om zenzen hang-in siamsinna I-zonthuah keileh I-pilna I-siamna bangmah kibehlap khollo ahihna Zogam-a mipihte-in atheih man-in internet hero te’ laaigelhte tung-ah khensatna leh sehna pia uhhi. Tua sehna leh khensatnate-in huihlak daatlak-a mapankhawm theihna lampi khaaktan-hi.

Zomi minam khangkhaan nading-a mapankhawm theihna omsunsun huihlak daatlak mapanna nagawn-ah pangkhawm theiloding dinmun akitun man-in pangkhawm cihleh kipumkhat cih peuhmah mualmong-et banglaai cihna ahihi. Zogam-ah siamsinna lamsang adiak-in sahkhuasiamzil lam-ah bangzah-in niam cih I-theihsa hi-a, gamdang atung sunsunte-in tuate mitsuan lo-in “seppak ngahpah” bekbek amitsuan man-in minam’ maailam-pen khuamial-in hongliah liitliit ahihi. Khangkhat-ah I-mapanna bangzah-in muiibun theiding cihpen eima’ thukhualna atom leh asauna tung-ah kinga-hi.

Minam sahkhua phalammanawh khantohna a-om nading-in mipil misiamte’ laaigelhte adiak-in Mikaanglaai asiamte-in naakpi-in sim-a vawhkhiatding kisam-hi. Zogam-ah tuabang thuguipite vawhkhiatna om ngeilo zah-in tawm-hi. Aneupen zatpahtheih ahi suhlehciinsiamzil (agriculture) nangawn I-theihloh man-in bangzah-in Zogam keu-in tul ahihiam! Zomite bangzah-in tualniam ahihiam! En-in. Tuuk hongtun ciang-in vaaimiim gau leh vaaimiin gaap-huan bekbek banghang-in kine-hiam?

Aalu leh maaiteh a-om sung-in aalu leh maaiteh bekbek-mah ninhuai zahdong-in kimeh-hiam? Taang tuuktun hun-in banghang-in taangciim leh taang taaksih bekbek sungtholh liang-in kine ahihiam? Ankam akilawhtheih-a kipan ankam bekbek, gualkhadi akilawhtheih-a kipan banghang-in gualkhadi bekbek-mah kimeh-hiam? I-gamlei pan-in tuhlehciinsiamzil a-omloh man-in, neekzia dawnzia ahzong khingkhai theihna omlo pah-a, atuahtuahna-a lono peuhpeuh ane bawng leh sakolte-tawh kilamdanglo liangzah-in Zomite I-khuasa khinzo-hi.

Hihtengmah sawtpitak I-thuak khitsa ahihman-in “seppak ngahpah” tepawl nawlkhiin pakthei lehang-a, maailam asauzawdeuh ngaihsutna-tawh siamsinna lam-ah naakpi-a taai kidemna I-neih kuulta hilo-hiam? Tualo-in akipaksak mahmah Democracy I-cih bangci bang-in I-gamlei sung-ah hongpo theiding, hongpaak theiding, honggah theiding ahihiam?

Sahkhua khangkhaanna sahkhualam thutanna (social justice) bangci bang-in vawh theiding I-hiam? Democracy’ guipi khat ahi nuupaa tamkimna (gender equality) thuguite-in bangciang huam-a akisuut leh aki sepsuah ahihiam cihte koici theihding I-hihiam? Tualsung kihuuttuahna (social welfare) bangci bang-in I-gam-ah kivawh theiding ahihiam? Hihte omlo-in Democracy cihbang akhiatna omlo ahihi.

Sahkhua khangkhaanna thuguipite I-theihloh man-in biakna pawltuam (denomination) te khatleh-khat kizop ziading kitheilo ahihman-in gaalbang-in kibawl, sa bang-in ki-geem, bangcih nawnding? Makaai tutphah atu sunsunte inlah pawlmite bangci bang-a huaituahding cih’ sang-in amau’ lam-ah penglam gaalkaap ahite humpah tinten, thumaan deih-a thaneemna pulaakte langbawlpah, tutphah pia nawnlo-pah, paampaihpah,…. bangcibang-in thumaanthutak Zomite’ sung-ah nungta theiding? Hihte naaakpi-a lungngaihhuai thute ahihi.

Pasian’ thu cihthadah leitungthu mahmah-ah thumaanna (righteousness), muanhuaina (faithfulness: kamciamsa bang-a sep takpina, hiai-ah asan ahihleh huai-ah asan-mah hihna, khuttung lumleh bang-a hiah avom huah akaang cihbang omlohna), thumaanthutak (truth) ngaihna, lawmbawltheihna (friendliness), lungsianthona (honesty), lungsianna (sincerity), muhkholhsiamna (transparency), midangte’ ading sepsakna (serving others), midangte’ ading-a nuntaakna (living for others), laaizom kihuaina (brotherhood care) lungpuak neihna, gammi hoih suah nading haanciamnopna (willingness to try to be a good citizen) lungsim-a kipan mihing leh ganhing, singkung lopate mahmah ciangdong aphatuamsak lungsim puakzia naakpi-a akisam leh minam tuamtuam sung-ah akivawh thapaai ahihi.

Hih hoihna khempeuh Pasian’ deih masate-mah ahihi. Hihte I-theihleh I-sepding ahihi. I-theih keileh theihding haanciamding ahihi, banghanghiam cihleh theihloh-in kizuui/kiseem theilo-hi, “Ye shall know the truth, the truth shall set ye free: thumaanthutak na-thei ding-a, thumaanthutak-in nang hong suakta sakding-hi” (CIA Motto).

Thuhoih thupha, sahkhua phalammanawh khantohna’ ading thugil thuguipi tampite naakpi-a kan-a sim-a sepsin kipat-hun mahmah-hi. Gentehna-in, Laaitui Khua sung-ah tualpawl (community) khangkhaan nading-in Laaitui Khuamite mah-in sim kuul, zon kuul, sep kuul ahihi, Tedimte-in alampi leh apaizia lam honglah keileh cihloh agaal pan-in hong sepsak theilo-hi. Kitel ding-in ka’ lamen-hi.

Pulehpate-in “mi’ bawl-in kidaii-kei, ei’ kibawl-in kidaii” acih mahbang-in I’ minam’ daiina, tualniamna khempeuh Kawlte Vaaite I-siatsiat sang-in ei-mahmah kipan-in I-septheih bangbang seemto, kihuh, pangkhawm, asiate kihilh, kihilhte kihehlo, khut kileen, kalsuan, mual-ah suakkhawm (mualsuah dektak ciang-in khatkhawng lamkhang-ah khia sese-lo, lehsawn sese-lo, kengkal sese-lo, tonkhawm), tua ciang-in Zomi ci-a mi’ lak-ah ot-ot, kikoko-zong kuullo-in I’ minam sung-ah amaan pianthakna hongtung ding-a, eite’ Piangsakpa’ Maaipha I-muhlawh laailaaiding uhhi.

Zogam-a Zomite leh gamdang-a Zomite akuamapeuh-in bangbang hileh siamsinna sahkhua lamsang siamsinna, sumsinna, kiukna lamsang siamsinnate naakpi-in I-tu I-tate I-baak, I-tulh, I-tah kuul-hi. Ziakaai simsimta hihang. Ahizong-in Pasian’ Thu leh Kiukna Thu-ah laplo cihbang om ngeilo cih thuciin omngei-hi. “Lap keini” ci-in I-kipat keileh “lap ngeilo” ding-a, “ziakaailua tahang” ci-in I-kipat naakleh I’ kipat hunhun-a I’ lap zahzah alap I-hihi. I’ sihma ahih hamtangding kisam-hi. Zomi Pasian’ Thupha! Zokhai

Hih nahvawh-ah, laaigelhsiampi Peter Saunders-in laaigelhsiampi Jonathon Haidt’ laaibu a-veelkiikna themcik aveelnuam I-omleh: http://www.petersaunders.org.uk