Dr. Chin Do Kham kiangpan kangah khanlawhna – Part 2

Dr. Chin Do Kham kiangpan kangah khanlawhna – Part 2

Ni Thumna :: July 24 2013- Dr. Do Kham le Mary Dal (Melbourne, Aussie) a teng Dr. Do Dal ii tanu tawh kithuah in UNHCR, KL zumpi ah 9am-11:30am dong ulian thupiteng tawh kimu uh hi. A manteh zum mai pan in ka na dawntuah lian in a hotel ah kiciah kik uhhi. Tuapan in KL sungah om makaai pawlkhat a hi, ZAM pan Lutangpi Tg. Hau Suan Khai, Lutangpi-huh Pa Kam Khan Mung, Vangil kemcing Pa Divid Mungno le Sumkeem Pa Joseph Kamsang, ZRC pan Lutangpi-huh Pa Thang En Hen le thuvaanpi Tg. Kai Sian Pau @ Paupi, Tonzang Lawm pan Lutangpi-huh Pa Tawnlek le Tg. Lalpi hihteng tawh sun ankuang umkhopna kanei uhhi. Hih sun an pen ZAM pan citpiakna a hihman in hotel an ne ka hih uhhang hongpia pen Malaysia Zomi bup aitang in hong kiluikhia ankuang a hihman in limphadiak le ka lungdam phadiak lai sawnsawn hi.

Zomi ading phattuamna nading UNHCR zumpi ah Dr. Do Kham in vagenteng pen a nuaiteng hi. A ma genna ah;

Ka va kimuhpih teng: UNHCR-Malaysia aa tu laitak a lian pen pa Mr. M Nissa, Senior Protection Officer Mr. Gonzaga leh IOM Senior Operation Officer Mr. Ogul, te ban ah UNHCR pan Community Development aa sem Ms. Brittocia leh Ms. Joanne cih te tawh nai 2 leh a lang sung holim na ka nei thei uh hi. Officer dang te zong va sam uh aa, khual zin leh a pua lam aa vak cih teng tawh a dang te hong kihel thei lo uh hi.

A masa in, GZA General Secretary ka hih na leh Zomi te thu a tom in genna– keileh kei ki pulak na nei masa ing.

Tua khit ciang, UNHCR tungah lungdam kohna:

(1) Tu ciangciang Zomi tampi tak gam 3 na ah hong puaksak na uh lungdam kohna,

(2) Zomi damlo te zato kahna leh kibawl na tampi hong huhsak na uh lungdam kohna,

(3) Thong kia tampi te UNHCR in hong tat khiatsak na uh lungdam kohna, leh

(4) Refugee naupang tampi te lai hilh nading hong vaihawm sak na hong huh na uh lungdam kohna cihte nei masa ing.

Tua ban ah, nung lam deuh aa KL sung ah, lutuam biak na bia pawl leh milim bia te ki tot ki thah na hang in, a kisai lo pi aa Zomi te in mi khutlum tawh a thuak khak ding uh patauh na thu ka pulak hi.

Hi bang aa a patauh huai dinmun ah om uh a hih man in, UN card ngahsa kawlgam mi khempeuh, a deuhdeuh in Zomi te gam 3 na ah a manlang aa hong puak sak mengmeng nading uh ci in nget na ka pulak hi.

UN Card ngahsa te bek hilo in, a ngah nailo tul tampi te zong Malaysia aa a nuntak na uh haksa leh lau huai a hih man in a manlang thei pen aa UN Card hong piaksak zawh nading uh deihna thu pulak na zong ka nei hi.

DOT NA:

1). Tun Kawlgam kumpi hong kikhel mahmah ta a hih man in, kawlgam mi te UNHCR card piak na tawh kisai policy a kikhel ah om hiam? cih thu kadot leh, Tu ciangciang policy kikhelna om nailo hi cih tawh hong dawng uh hi.

2). Tua a hih leh, card ngah nailo te na lakbeh baih ding uh hiam ci aa ka dot leh, Fund ki ngak lai hi. Fund om dan zui in ki khensat thei pan in teh cih tawh hong dawng uh hi.

3). Card ngahsa tul tampi om lai ci leng, card ngahsa teng a vekpi in gam 3 na a ki puak khin taktak ding hiam? cih ka dot leh, pawl khat kipuak in cin, a vekpi in kipuak khin lo kha ding hi. A hizong in US kumpi makaih na tawh P2 Group resettlement program a kibawl August 17, 2010 ciangciang aa card a kipia teng bel ki pai suaksak hamtang ding hi.

Leitung gam tuamtuam gam 3 na aa a kipuak khempeuh ii 80% pen USA ah a kipuak a hihi ci uh hi.

Malaysia UNHCR zum pan kum khat in mi 10,000 (tul sawm) gam 3 na ah a kipuak hi in, a sum lah kicing lo, zum nasem zong kicing lo ka hih man un, kum khat in tua zah kan ki paisak zolo hi hong ci hi.

4). Tua ah omlai teng, a pai ma in kawlgam hong hoih mahmah man leh, a vekpi in na paisak lai veve ding uh hiam? ci aa ka dot leh, Kawlgam hong hoih taktak aa leh … a ciah nuam te a ciah na ding un han thawn ding hi ung. UN card ngah sa a hih hang, na UN card uh gam 3 pai nading in kizang thei nonlo ding hi cih ki tangko ding hi. Gam tuam tuam ah zong, a gam uh hong hoih kik mahmah ciang in tua dan aa a ki sep na gam tampi om khin hi ci uh hi. (Kawlhgam mite tawh kisai tua dan khensat na om nailo hi. A thu paizia hong gen na uh a hihi)

Gen teh na in, Indonesia gam pan Malaysia a pai Ace pan refugee te bang, a gam uh hong hoih ciang, tampi ciah kik uh aa, a ciah nuam nonlo te, Malaysia kumpi leh UNHCR ki thukim na tawh Malaysia ah WORK PERMIT (nasep theihna phalna) pia aa om theih nading ki vai hawm sak hi. A hi zong in, hi bang dan ciang in, a hun hun aa ki vai hawm hi in, mailam aa ding ki gen khol thei lian lo hi cih tawh hong dawng uh hi.

Lung Hihmawh na Pulak na leh Deih Ngetna:

A beisa hun in, Zo pau tawh kam phen deih zah in kicing ngeilo a hih man in, Zomi kam phen hong behlap sak zawh nading uh ka gen hi.

Gam 3 na len khiat kuan ciang aa thusin sakna (tentan piakna) ah Zo lai ngiat tawh hong bawlsak nading uh zong lunggulh na ka pulak hi.

Tua ban ah, a beisa hun in, Zomi a hilo pawl khat in Zo pau tawh kam phen uh aa, Zo pau siam tatak lo uh a hih man in, a man/dik phalo aa kam kiphen sak pawl khat om a hih man in ka lung hih mawh na limtak in ka pulak hi.

Kipawlna tuamtuam nuai ah a om hang un, Zomi (khua pau nam tuamtuam a zang Zomi te) tampi te in paudang thei lo in ko pianpih pau a hi Zo Pau bek mah pau thei uh a hih man in, tua te aa ding ko pau lian bek mah tawh kamphen kician tak aa a sem thei ding mi a kicin ding a thupitna leh USA gam aa Immigration Court khawng ah, a mau tel chindokhammahmah tawh kam phen ding a om kei leh tel mello loh pau tawh thusit ngeilo uh hi cih zong ka pulak hi.

RSC Call Center (Phone tawh thudot theih na) line sam leng, computer in, pau nam 3 tawh hong dawng hi. English, Lai, Burmese … mek in cih tawh hong kidawng a hih man in, tua teng khat zong a theilo Zomi tul tampi om a hih man in, Zo Pau zong hong behlap sak un cih zong ka gen hi.

Pawl khat a min kibang om a hih man in, a nih un a vai uh a kum aa sim ziakai thei cih thu za ing. Tua bang a om leh a min man te in a mau mawhna omlo pi aa ziakai lawh uh a hih man in, a thu a ki tel theih khit ciang, a min man nei tatak te a man lang thei pen aa na vaihawm sak ding uh kisam ding hi cih zong gen ing. A mau zong hoih sa uh hi.

Ka lim gen beh thu khat ah: Zomi pawl khat a ki interview ciang in, ka minam min ZOMI hi ci na pi in, kamphen pawlkhat leh ah interview officer te in a mau cih bang in computer ah khumsak lo in, Chin or Tedim cih tawh khumsak hi cih thu za ing. Tua dan pen UN te ii sepding in a kilawm hetlo thu hi. Mihing khat in ka minam min tua hi a cih leh a mau cih bangbang aa ki khumsak ding hi cih Washington DC aa Refugee Resetlement aa a lianpen te in kei tung ah hong gen uh hi. Tu aa kipan thuman tak aa record a kibawl nading in limtak in na mite uh na gen un, ken zong follow-up hong bawl toto ding hing cih vai khak ing. A mau zong a maisuah dan uh nuam sa pha kei.

Hibang thu te ka gen ciang in, Zomi a kici lo te, Zomi a hilo te gal bawl ding, mudah ding a ci ka hi peuhmah kei hi. Ei hihna din mun midang te in zong hong telpih aa, ei leh ei ih ki cih bang aa hong cihpih ding uh ka thupi gennop na a hihi. Nampi lungsim nei in, Zomi te ih it bang mah in mi namdang te zong it in, a mau aa ding zong ih deihsak ding pen Christian lungsim a hihi. A hi zong in, a hilo pi aa hong ki nem niam ding zong kiphal tuan lo hi hang.

Sun an nek khitciang in Subang airport ah Singapore paiding in Zomi makaai pawlkhat in teksi nih tawh Zomi hong deihsak le thu le la khempeuh ah hongvansak GZA thuvaanpi Dr. Chin Do Kham ka va kha uhhi.

Khanlawhna ka cihciang in a omsa tungah zatsiam nading khanlawhna hi. Ih minam makaaite pahtawi in ei minautaang teng in thapia, lamsang leng ih makaai te koikoi ah guaksuak ngeiloding hihang cih khanlawhna kangah hi.

Minam ading nasem takpi te panpih in, thapia ciat leng Zomi cihpen mi nuai ah a omding a Siansiam hi zenzenlo hihang. Ei le ei kithutuak nailo-deuh le ngimna tupna, muhdan te kibang nailo-deuh, khat le khat kitheihpihlo, ki awlmawhsaklo cih virus in hong susia hi tadih phot lai.

Khat le khat ki thupi bawl in, ki lamsang in, kizataak hileng a piangtheilo omloding hi. Tua virus a sisak/thatlum/beisak ding pen ei mimal khatciat ii mawhpuak a hihman in mimal khatciat ii hihzawhding lah hipah sam nailo a hihman in, Zomite kipumkhatna bek a satmaai zobekding a hihlam angpomciat in hanlungciam khangto diam!

Francis Khampi
2013-08-04