Gualzawh nading in akisam lungsim puakzia ~ CS Dal

Gualzawh nading in akisam lungsim puakzia ~ CS Dal

Leitung ah apil asiam khempeuh gualzo in lawhcing khin gai lo uhhi. A khuasuak zolo mipil misiam zong tampi tak om hi. Tua mah bang in apil asiam pen a hih loh hang gualtung a tuang zong tampi tak om veve hi.

Gualzo ding, lawhcing ding cih ciang in mi lian, mi thupi, mi minthang suak ding cihna hi pah lo hi. Sepna khat peuh ah atawp dong sem zo ding, masuan khat peuh matut zo ding, vaikhat peuh zosiang ding cih na a hihi.

Tua a hih leh sepna khat peuh ah gualzawh na ding, maban khat peuh ah matut zawhna ding bang kisam pen hiam?

Dr Carol Dweck in sepna khat peuh ah gualzawh na ding, matut na ding in lungsim puakzia thupi pen hi ci hi. A mah pen lungsim khangtoh na lam sinna (development psychology) ah a madawk a minthang mahmah khat a hihi. Stanford, Columbia leh Harvard sanginn pi te ah professor a sem ngei khat hi.

A ma muhkhiat na ah lungsim puakzia tungtawn in gualzo ding maw, guallel ding cih ki gen thei hi ci hi. Lungsim puakzia a dik nak leh apil pen, asiam pen te hih loh hang in nasep na leh masuan khat peuh ah lawhcing na ki ngah thei hi. Lungsim puakzia a dik kei leh apil pen asiam pen te zong khuasuak zolo thei uhhi.

Lungsim puakzia nam nih

Leitung ah mihing te lungsim puakzia nam tuamtuam om mah ta se leh, a bulpi in nam nih in kikhen thei hi.

Pawlkhat te in pilna siamna cih pen Pasian in a tuam vilvel in hong piak hi a, sintheih leitheih hilo in pianpih talen hi ci in upna nei uhhi. Tua bang mite pen Tualsuak lungsim (fixed mindset) a nei te kici hi. Genteh na in, laipil laisiam te, music siam te, tuukpeng suihsiam te, limsuaih siam te cih pen a tualsiam ngiat, a tuamdang ngiat hi ci in upna nei uhhi.

A dang pawlkhat te in a pilsa, a siamsa in kisuak lo hi. Pilna siamna cih pen hanciam in sin leng a kingah thei, a kisiam thei thu hi ci in upna nei uhhi. Hi bang mite pen Akhangto lungsim (growth mindset) nei te kici hi.

Tualsuak lungsim maw, akhangto lungsim maw?

Ei leh ei mahmah zong Tualsuak lungsim maw, Akhangto lungsim koi nei zaw cih a kician in kitel khin lo hi hang. Na tel nop leh na hamsat hun, vaipi khat peuh sem ding in na kipat hun ngaihsun kik in. Tua bang hunte ah Tualsuak lungsim nei te pen lung himawh baih leh patau baih zaw deuh uhhi ci hi. “Mite bang in pilna siamna lah nei lo; thahat na lah kicing lo; hoihna lah nei lo; hauhna lah nei lo” ka semzo mawk tam maw cih bang in ngaihsun masa thei uhhi. Tua ziak in, hamsat na leh lungkiat na a tuak uh ciang; sepna khat peuh ah a tangtung zawh loh ciang, “ka pilna in ban lo/ tuk lo hi” ci in, lungkia in hanciam nuam nawnlo uh a hih man in, a gualzawh zah ding in gualzo zolo uhhi.

Tua ban ah Tualsuak lungsim a nei ten a mau dinmun leh midang te dinmun tehkak phadeuh uh a hih man in, lungkim na sang in lungneu na leh thanem na cih te zong hau zaw deuh uhhi.

Akhangto lungsim a nei te pen vaikhat peuh a sep ding ciang, pilna siamna a kicing in a nei kei ta phial zong un, thum masa lo in sep ngamna (hangsan na) lungsim nei uhhi. A gual lelh ding (failure) zong lau lo; khialhna a bawl khak ding zong kihta lo uhhi. Ka khial kha tam maw, a hoih kei kha tam cici lo zaw in, a theih huai a kisam thute sin pah uhhi. Hanciam na leh thalawp na tawh hongsem pah uhhi. Tua ziak in lungkiat hun, thanem hun leh hamsat hun a tuak uh ciang in zong thuaksiam zaw deuh pah uhhi. Lungsim cidam in thuakzawh na (resilience) hau uh a hih man in, tam veipi a puuk/tuuk uh hang in a tawpna ah gualzawhna hong ngah thei uhhi.

Gamhau gamlian a om mangkang te in Akhangto lungsim puakzia neih ding pen thupi sa mahmah uhhi. Tua ziak in a naupang te un ‘‘akhangto lungsim’ a neih theih na ding in lai sinna sanginn te bek ah hi lo, innkuan sung mahmah pan in a neu tung a kipan in pantah uhhi.

Akhangto lungsim puakzia neih nang naupang te pattah zia ding

Mipil tampi tak te muhkhiat na ah lungsim puakzia pen upmawh sang in kikhel baih mahmah zaw hi ci uhhi. Naupang te in Akhangto lungsim a neih theih na ding in nu leh pa te, lai hilh sia te leh thu hilh sia te in a sep theih ding tampi tak om hi.

1) Ngimna sang/lian pipi neisak ding

Ngimna leh lam-et na a niam ciang in hanciam na, thalawp na zong tawm zaw pah thei hi. Tua a hih man in, na ta ten a ngah zo kei phial ding zong in, ngimna sang pipi a neih theih nang hanthawn in. Ahi zong hanciam na leh thuakzawh na a kisap lam zong phawksak in.

Genteh na in tuukpeng suih a siam hetloh hang, “hanciam in nisim sin den” peuh le cin ni khat ni ciang a siampen suakzo ding hi teh cih bang in thapia in. Tua in ama a ding in thalawp na leh hanciam nopna te khangsak ding hi. A suakzo het kei takpi phial zong in a hanciam na tungtawn in a hoih ciang khat hong tung zo thei ding hi. Mangkang ten ‘self-fulfilling prophecy’ ci in nuihciam tonglel te zong taksa suak thei takpi hi. Kampau in a khap tawn hi. A hoih in na kampau leh a hoih ki ngah takpi thei a, a sia in na pau leh a sia ki ngah thei hi cih na hi.

2) Phatsiam ding zong kisam hi

Leitung ah phatna a ngaidam lo kua mah omlo hi. Tuaziak in phatna pen naupang te lungsim puahphat na ding in a muibuun penpen galhiam khat a hihi. Banghang hiam cih leh naupang te pen phatna a ngaidam mahmah te hi. A phadeuh in nu le pa te phat ding, sia/ siama te phat ding pen ut mahmah uhhi.

Ahi zong in phat dan siam kei leng a dik ding sang in siatna zong piangsak thei hi. Ei Zomi te ngeina ah naupang khat peuh i phat ciang in, tangval mah si, nungak mah si, pilmah si, siammah si cih ciang bek in kiphat thei hi. Tua in hoih khin lo hi.

Phatna na piak sim in, banghang in phatna pia na hiam cih theih sak ding thupi mahmah hi. Tua hi leh naupang ten mailam ah phat ding a ut ciang in, bang sem ding, koi ci bang in gamta ding cih thei pah uhhi. Na phat ciang in zong, a pilna a siamna (result) te na phat sang in a hanciam na te, asep abawl zia te (process), a ngaihsut zia (idea) te phat ding thupi zaw lai hi. Tua in nasep hanciam nopna lungsim leh thu ngaihsut siamna ding a guanguan na hihi.

Genteh na in gualzawh na khat peuh angah leh, “pilsi cia, siamsi cia” na cih sang in, “na hanciam na mahmah thupi sa ing”, “na cihtak na, na kuhkal na mahmah hong pakta ing”, “nasep dan/ na thu ngaihsut zia mahmah thupi sa lua ing” ci zaw in.

Tua mah bang in a gual-lelh hun ciang in zong thapiak theih ding kisam hi. Genteh na in tai kidem na ah, a tawpna a ngah phial zong in, “lungkia lo in a tawp (finishing line) dong na tai tantan mahmah angtang lua ing”, cih bang in ki phat thei hi.

Hibang dan in phatna na piakciang in mailam ah hamsat na (failure/ difficulty) a tuak uh ciang in, lungkiat loh na ding leh thuakzawh na a kisap lam a phawksak na hihi. Hanciam na om lo, thuakzawh na om lo in, gualzawh na omlo hi cih lungsim a guanguan na hihi. Mailam ah bangbang a tuak zong in semzo ding cih lungsim nei pah ding uhhi.

Tua hi lo in, pilsi cia, siamsi cia in ci in na phat ciang in apil takpi, asiam takpi kisa kha thei uh a, amau sang apil zaw, asiam zaw khat tawh a kituak ciang, haksak na khatpeuh tawh a tuak khak uh ciang, hanciam ding sang in thanem in lungkia thei zaw uhhi.

3) Mi minthang te tangthu tawh hanthawn in

Leitung ah hamsat na tuak kha lo, lungkiat na tuak kha lo in a minthang, a gualzo kuamah omlo hi. Tua a hih ciang in a minthang te tangthu pen hanthot na in ki lim zat mahmah hi. A minthang lak pan in, na tate in kua deih pen hiam cih theih sawm in. A lungkiat hun leh hamsat na a tuak hun ciang in, tua a minthang te nuntak na tangthu te hanthot na in zang in, gen zel in. Genteh na in Lai siangtho sung ah mi siangtho nungzui pi Paul pen Pasian thu-um nungzui a suahma in thu-um mite a that, a bawlsia sia mi khat ahih lam cih bang ahi zong; US President Abraham Lincoln tangthu cih te ahi zong; Scientist Stephen Hawking tangthu cih te ahi zong; Sengam ah mihau a minthang Alibaba company nei pa Jack Ma tangthu cih te ahi zong zat theih ding in hoih mahmah hi.

Kimawl na lam ahi zong, lai sinna na lam ahi zong, sumbawl na lam ahi zong, kumpi nasep na lam ahi zong, Pasian nasep na lam ahi zong genteh na ding in zat theih ding tampi tak om hi.

4) Khialhna te ah mawhsak kei in

Khialhna khat peuh a bawlkhak ciang in tai gawp in mawhsak pahpah le cin mailam ah a khialhkhak ding lau na tawh bangmah hong semngam nawn lo thei ding uhhi. Na thu hilhna te zui nuam lo in, khialh na khat peuh hong bawl in nat leh sat a thuak kha phial zong in, mawhsak na kammal zat khak loh ding hanciam in. Nang gen kul loh in amau leh amau zong na kisuang khin mahmah ding uhhi. Kawlten liamma tung ah ci sawhbeh nawn ken ci uhhi.

Leitung ah a khial ngeilo kua mah omlo a hih lam phawk tawntung in. A phadeuh in naupang te in khialhna a bawl ding pen a ngeina mahhi. Khialhna a om ciang bek in khantoh na om thei pan hi. A khilhna te phat in, thapia zaw in. Genteh na in, temta zanglo ding cih na genkhit ciang temta hong zang teitei in hong ki-at kha in a khut hong liam ciang, “ka thu nong man loh na thuak pah na”, ci in na mawhsak sang in, itna tawh a liamma tuam sak in la, mailam ah temta a zatciang a kidop siam ding a thupit lam gen pih zaw in.

Naupang te pen hun piak ding kisam mahmah hi. Leitung ah mihing khat a khantoh theih na ding, a lungsim picing na ding in khialhna, gual-lelhna, hamsat te tuak khak ding zong kisam hi. Tua te tungtawn in leitung nuntak zia ahoih lam a sinkhiat theih ding thupi hi. Tua in a khan tawntung in zuisuak ding hi. Taina/ mawhsak na in launa leh maizum na suaksak a, tomkal sung thumang na piang sak bek hi. Sau vei lo hi.

5) Lunglau loh nang hanthawn in

Mihing te khuak pen nisim hunsim in a thakthak a sin den hi a, theihsa sang in theihnai loh thu tamzaw hi. Genteh na in muh ngei loh na khua dang, gam dang khat peuh i pai ciang, theih ngei loh mipawl te tawh i om khop ciang, nasep thak khat peuh i lut ciang, lai sinna te ah laihuan hun hong tung ciang, ki lungtau (nervous) thei tek hi.

Lung patauh pen a ngeina hi a, mikim in a kinei tek hi. Tua bang hun ciang in, “a hoih pen ding in nasiam tawp in hong sem in, a piang bangbang tawh lungkim ding hi ung” cih bang, gen theih ding ki lawm hi. Khamuan nang, lungmuan nang thapia in cih nopna hi.

6) A khangual te tawh tehkak ngei kei in

Sepna khat peuh ah gualzawh na i ngah zawh loh ciang in khat veivei nu le pa, sia le siama te in, “lawm lawm aw, na lawmdang ten bawl thei uh, siam thei uh, ngah zo uh, nang bang a ci pha deuh” a hi zong, “midang te khangto mahmah eimi te lah kiam suk tektek” cih bang in midang te tawh hong ki tehkak thei zel hi. Hong deihsak man leh hanciam ding a deih man uh hi mah tase leh, midang te tawh tehkak na pen a hoih hi lo hi. A lungsim uh nawngkai (pressure) sak zaw thei hi.

Mihing te pumpi khantoh zia pen khat leh khat ki bang kim khin lo hi. U nau a kipeeng te na leng zong ki bang khin lo ding uhhi. Tua a hih ciang in lungsim khantoh zia zong ki lamdang a, a tei baih deih, a siam baih deuh a om ding a ngeina mah hi. Lungneu na ding leh lungkiat na dingin, cikmah hun in midang te tawh tehkak ngei kei in.

Thukhupna

Leitung ah a pil deuh, a siam deuh cih pen a om mah hi. Tua ziak in leitung ah a minthang deuh, a gualzo deuh, a hau deuh, a siam deuh zong om pahhi. Ahi zong hanciam na leh thuakzawh na a omloh man in a khuasuak zolo mipil misiam tampi tak zong leitung ah omhi. Tua hi a, mite zah in pilna siamna i neih loh hang, lungsim puakzia a pha neih ding thupi hi. Gual-lelh hun, hamsat hun, lungkiat hun te ah puk lo in, tho kik tantan ding, thuak taitai ding, hanciam tangtang ding, kuhkal takin sem teitei ding – tua hi peuh leh ngimna leh sepna te ah nikhat ni teitei ciang gualzawh na ngah ding cih pen lamet na tam mahmah hi. (C.S Dal – Zo ngeina Khuado Pawi 2018, Zomi Innkuan UK ah thu genna sungpan)

Etkak ding leh simbeh theihding laibu pawlkhat, Manglai tawh asim nuam ten anuai a mun te pan in a kicing zaw in kisim thei hi.

• 1. Mindset: The New Psychology of Success by Carol Dweck
• 2. https://www.bbc.co.uk/cbeebies/grownups/help-your-child-try-new-things?fbclid=IwAR3zU0nIiuc3K6lOqcGH4XJ3CJyT8DdQn7ruhXvET72_BZdhd_TEBLKB3uo
• 3. https://raisingchildren.net.au/toddlers/connecting-communicating/connecting/praise