Puuksakna tawh kisai theihhuai thu ~ Rev. Fr. Damian Dal

Puuksakna tawh kisai theihhuai thu ~ Rev. Fr. Damian Dal

“Puuksakna” ahih kei leh “puukna” pen Khasiangtho nasepna in angaihsun mitampi omhi. Laisiangtho sungah Khasiangtho in mite anunglam ah puuksak hi cih honghilhloh na thu theih masak ding athupi ahihi. Hihthu tawh kisai in, Leon-Joseph Cardinal Suenens, former Head of International Charismatic Catholic Renewal (ICCRO) ii agelh laibu ibulphuh dinghi. Ama laigelhna sungah, puuksakna asem pawltuamtuam pan Pastor tampitakte tawh maitang kimu in adotngiat akanngiat thute, laitawh dongin, adawnna uh leh amahmah in amuhkhiat thute ahihman in, atheihhuai mahmah thutampi honghilh hi.[1]

Amasa penpen in kuate puukthei hiam cihciangin, mi akua mapeuh puukthei lua hi. Ahizong in, kua te puukphadiak hiam cih thu in athupi akhat ahihi. Apuukphadiak mite in,

• (i) Numei te tampen in puukpha diak hi.
• (ii) Lungsimnatna, lungkhamna, buaina leh lungkiatna anei mite.
• (iii) Midangte tungah mudahna leh thangpaihna anei mite.

(iv) Haksatna thu khat peuhpeuh thuakin, tua haksatna pan suahtakding hanciamciam napi in, asuakta zolo mite (gentehna in, nupa kal kilemthei lo te, innkuan sung abuaiden te).

(v) Khat veivei kum 18 cingnai lo naupangte puukthei hi. Ahizongin tuabangnau pangte tam puuklualo hi. Tuabanga naupang puukte in innkuansung nuntakzia haksa asa phadiakna, aki taaitaai, aki hawlhawl, akhasiasia naupang te hithei phadiak hi.

(vi) Pumpi natna sangin, lungsim tawh kizop natna nei mite. Lungsimtawh kizom natna te lakah gentehna, gilpi uum natna, luvaivai, lutang nangetngut den, mang sia mandenden, cihkhempeuh kihel hi. Theihdingin, hibang natna te khempeuh lungsimtawh kisai hi cihna hilo in, lungsimnatna hangin tuabang natna nei omthei a, tua mite cihna bek ahihi.

Bangci puukhiam?

Bangci puukhiam cih enleng, amai lama tuukcih omngei lo zaw in, anunglam vive ah tuukzaw uhhi. Nungpuuk cihciangin, ei le ei kilel cihna hi a, i zawhloh khat in hong puuksak cih na thu ahihi.

Tuabang puukna hangin bangthu hongpianghiam?

Tuabang a apuuk mite pawlkhat in, amaute lungsim gimna, natna pan kadam uhhi ci uhhi. Pawlkhat te in ahihleh kawngna, gilpina, lutangna cihte pan kadam uhhi cithei hi. Pawlkhat te leuleu in ahihleh, mudahna, hehna thangpaihna kanei nawnkei hi ci in tetti pangthei uhhi. Pawlkhat in ahih leh lungnop acih in nuamin, bangmah tawh gentehtheih lohding lungnopna kangahhi ci thei uhhi.

Adangpawl khat leuleu in ahihleh, kisikikna lungsim ngah in, pawlkhatte in Laisiangtho simnopna tha thungetnopna tha thak kangah uhhi ci in, genthei pen uhhi. Pumpi natna (physical healings) adamlian ci in, tetti pangpen tawm mahmah in, zong tua bang tetti pangte zong, tetti apanzawh khanih kiimkiim bek dam ci in, tuakhitciang angei mah ngeikik zaw hi ci uhhi.

Laisiangtho sungah tuabang puuksakna thu om hiam?

Laisiangtho sungah tuabang puuksakna thu kigelhna i mu kei dinghi. Topa Jesu ahi a, Paul hi in, Peter ahi a, nungzuipite khat peuhpeuh in ahizongin, mi apuuksakna thu Laisiangthosung ah nakigelhlo hi. Pentecost pawini in Khasiangtho kumsuk a, ahizongin, nungzuipite leh thu um mite puuk hi cih thu naki gelhlo hi (Sawltak 2).

Khupna: Puukna in Khasiangtho nasepna hi masa lo in, lungsimthu tawh akizop nasepna namkhat hi cihthu ahihi. Rev Fr. Damian Dal

[1] Leon-Joseph Cardinal Suenens, A Controversial Phenomenon: Resting in the Spirit, (Bublin: Veritas, 1987).