Thupulakna: ZIUSA 2015 Kumcin Khawmpi Lawhcing Takin Kibawlzo

Thupulakna: ZIUSA 2015 Kumcin Khawmpi Lawhcing Takin Kibawlzo

Zomi Innkuan USA (ZIUSA) kipawlna in Thukhunpi leh Ngeina Dante zui in, July 3 & 4, 2015 (July 4th Week-end) nite, zingsang nai 9:00AM pan nitak nai 5:30PM hun sung tengin Oklahoma Gamkee, Tulsa khuapi a om, Gateway International Church (Rev. Suan Za Lian) biak-inn sung ah lawhcing takin kibawl hi. Khawmpi ah US gam sung a om Zomi Innkuan kipawlna tuamtuam pan Makaite, Tangmite leh ZIUSA kipawlna tha apia khuanu khuapa, sia siamate, u leh nau mimal vekpi (70) val nisim in kikah hi. ZIUSA Board Member (74) sung pan (44) kah ahih manin Khawmpi lawhcing mahmah hi.

Khawmpi sung ah abeisa kum khat sung a ZIUSA kipawlna Maban kalsuannate pulakna leh kikupna hunte kizang masa hi. Tua ban-ah Zomi Innkuan kipawlna tuamtuam pan thusunte leh Executive Committee (EC) pawl thusunte kikupna kibawl a, Khawmpi akah mipi atam zaw thukimna tawh thu khensatnate kinei hi.

Khawmpi sung ah mipi thukimna tawh Zomi-te ngeina puansilh nikten tawh kisai anuai a bangin thukhensatna kibawl hi.
· Zomi Innkuan USA kipawlna in Puanlaisan, Tangciin, Tualpuan kici ngeina puante pen Pasal Puansilh ahi hi ci in kikipsak phakik (Re-affirm) hi.
· Zomi Innkuan USA kipawlna in Puandum, Khephiau, Zonik leh Tualpuangial Numei Puan-ak cih ngeina puante pen Numei Puansilh ahi hi ci in kikipsak phakik hi.

July 4, 2015 ni Khawmpi hun sung, sun hun in ZIUSA kipawlna kum (10) cin’na Pawi leh pawi muakna in Special Anniversary Luncheon limci mahmah khat picing takin kibawl hi. Pawi sung ah Khawmpi akah mipi khempeuh ban-ah, khua leh tui sung leh mun tuamtuam pan a hong pai Zomi Sia/Siamate, khuanu khuapate, abeisa hun a ZIUSA kipawlna Makaite mimal vekpi (100) val in pawi ankuang umkhawm hi. ZIUSA kipawlna Makai luite in kum (10) cin’na lungdamna thupha pulak uh a, ZIUSA kipawlna ahong piankhiatna leh lawhcinna tangthute kisuut hi.

Kumcin Khawmpi thukikupna a kizawhkhit ciangin Ngeina Dante tawh kituak in Kiteelpi Tanupawl vaihawmna tawh Kiteelpi picing takin kibawl a, ZIUSA kipawlna kum (2) sung makaih in a Mabante ah a madawk ding EC Pawl panmunlen Makai (15) kiteelkhia hi. (Kiteelpi Tanupawl in atuam in Thupulakna bawl uhhi)

Khawmpi sung ah ZIUSA kipawlna kum (10) acin’na muakna in mipi tung pan Tedim Sangpi (State High School No. 1) Tan Sawm Sangnaupangte’ Tutphah Sabuai bawlna ding huhna sum kikaikhawm a, $3,100 val kingah hi.

Zomi Innkuan USA kipawlna in Kum (10) cin’na Khawmpi panin kiptak leh picing takin kumsawtpi dingtang in, gam leh minam, khua leh tui a’ding maban lianpite lawhcing takin apang zo semsem dingin anungta Pasian tung ah thu kingenkhawm hi.

Chairman
Kumcin Khawmpi 2015
Zomi Innkuan USA

Tulsa, OK, USA