Dinmun Nam 3 ~ Khup Lian Thang

Dinmun Nam 3 ~ Khup Lian Thang

1) Galkap ukna/Minampi khat ii ukna/ Kipawlna lianpi khat ii ukna/ Makai khatbek ii thuneihna a deihlo, leitung bup tuni ciang dong a huampi in a hoih pen a kicithei mipi’ bulphuh mipi’ deihna masuan ki-ukna deihin hih theih na bangbang tawh nasem pawl.

(Hih dan dinmun bekin a dik taktak khantohna ah ong tun’ bek ding hi.)

2) Kuakua in a uk zongin awlmawh keng, a gitlohna a hoihlohna uh zong kilamdanna thei keng, ei ii zing huan nitak huan ding lem ding, ei innkuan ei khua ciang lem peuhleh paupau kul kei, ei hamphatna ngah na ding ahih nak leh kuakua in ong makai in bangci ukna zia ong zat hangin phamawk kei a ci pawl (Angsung khualna lianlua deuh, ei bek a lem ding kisa kha. Ki-ukzia kibang lel cih bang omlo, nitumna lam ong paipih gaklap mangpa paizia pen sau pai semsem khuamial gam tawh kinaih semsem ding.

Mipi’ deih ki ukna pen tuletu in kisapna hoihlohna tampi omlua ding. Ahih hangin nisuahna lam khantohna lam manawh in a paipai ahih manin gam le lei damdam ong nuam tektek ding, a kumkum in khangto hanhan ding. Nikhat ni teh i tu itate hun leh sangkah na ding zatui kibawl na ding cih tawh buailo in mei pailo tui pailo cih cih dihdih te tawh kibuai nawnlo toto ding hi. (Hih lai a sim thei khemepuh in kum 2010 hun ma, 2010 – 2020 kikal le 2021 – 2022 kikal kilamdanna thei kim ding ihih manin a tunga ih thusun bel telhak lua hetlo ding hi.)

3) Hih gambuaina metdok in ei ii gam leh minam in hamphatna a ngah ma dingin nasem ding. A kisap leh ei deihna a tangtun na dingin galkap te tawh zong nasem khawm lel ding, a kisap leh ei le ei zong kinawk mang lel ding. A kisap leh i gam veng te tawh zong kinawk lel ding. Gambup kikhelna pen ei vai hilo. Ei tawh zong kisailo, a ci pawl in ki om.

(Hihdan sanzia pen galpi nihna lai in leitung bup in na nusia khin uh, 1990 khitteh khatvei kinusiat beh leuleu, en tu dong puapua lai, ei bek hilo Kawlmite in zong tua lungsim nei. Picing zolo uh, tuahangin upi lungsim nei ding pen in namtom lungsim ong neih cianga minam bup, khuabup, gambup a kibuai toto ahihi.

Tua bang sansia kalsuanzia tawh gam khangto leitung ah khatzong kimu nailo phial hi. A om leh zong buhkung maikuang pak bang lel hi. Gamkhangto minam khangto ih cih te in tua bang lungsim puakzia na nei nawnlo uh, nei ngei kha mah unteh, ahih hangin na nusia khin uh hi.) Zomite pen No. 2 & 3 ah honpi khat omlai ihih manin kikhel in kiphuahpha toto lai ni. Khup Lian Thang