Japan ah 5.6 Magnitude thahatna tawh zin lingkik leuleu

Japan ah 5.6 Magnitude thahatna tawh zin lingkik leuleu

Northeast Japan ah Thursday (November 24) ni in 5.6 Magnitude thahatna tawh zin lingkik leuleu cih US Geological Survey te’n genkhia uhhi. Abeisa ninih hunlai inzong Japan gamsung Fukushima Nuclear Power Plant gei ah zin nasiatak in alingkhinlian hi a, Tsunami Alert zong omman hi.

Tuni Thursday ni zinling pen zingsang 6:23am hun in aling hi a, zandiak in zinlingzah in khauhlo, innsia losia cihzong omsamlo cih AFP pan kiza hi. Zinlinna munpen Tokyo khuapi panin Kilometer 210 agamlatna mun aom Fukushima Prefecture sungah ahihi.

Geological mipil te genna ah Japan gampen Tectonic Plates 4 akituahna ah omkha ahih manin, kumsim in zin alingden hi ci uhhi. 2011 kum inzong Japan gam ii Northeast Coast ah zin nasiatak in linggawp ngei hi. Tsunami zong piangsak a, mi 18,000 bangin sihlawh, manlawh hi. Tuaban ah Fukushima Nuclear Plant aom Reactors 3 tezong siacipsak hi.

Tukumsung April kha inzong Southern Japan, Kumamoto Prefecture ah zinling khauhmahmah nihveitak in nawk ahih manin, mi 50 val in sihlawh hi. ZD Sawltak #zomidaily