Pulpit tungah khedap asuah kulhiam?

Pulpit tungah khedap asuah kulhiam?

“…Mite in hih mual tung (Gerizim) hitaleh Jerusalem hitaleh ah Pa Pasian a biak nawn loh hun hong tung ding hi, na ci hi. Pa Pasian ii deih pen thumaan le kha tawh biakna hizaw hi” (John 4:24). I gennop thu ahih leh Jesuh Khrih ma khua hun le Jesuh Khrih khitzawh Tapidaw khua hun ahi hi. Tanglai-in Pasian in sawlbawk kuang tawh Mosi a na hopih hunin a khedap suah sak hi. (Paikhiatna 3:5). Jerusalem biakinn sung zong mipite le siangtho pen mun kidalna puan om hi.

Ahi zongin Jesuh khit ciangin tua dalna puan kekin phel nih suak khin ta hi (Luka 23:45). Khedap suahna mun, singlamteh phuhna mun, biakna tau bawlna mun cihte tawh sianthona i zon leh mun khempeuhah Pasian a om thei lo, mundangte ah Pasian a kibia thei lo dingin a ciangtan i suak zaw ding hi. Gerizim mual tung le Jerusalem biakinn tawh Pasian zon hunte bei ta hi.

Christian Suahtakna (Christian Liberty)

Christian suahtakna tawh kisai Rom laikhak a lian 14; 1 Kor. 8 le Galati 5na cihte sim huai hi. Voksa ne thei ding a ci pawl, anteh bek ne ding a ci pawl; milim biakna sa ne thei a ci pawl, ne thei lo a ci pawl; vun at kul lai hi a ci pawl, at kul nawn lo hi a ci pawl; ni khat peuh a dang nite sangin siang zaw hi a ci pawl, ni khempeuh kibang hi a ci pawl; mun khat peuh a dang munte sangin siangzaw hi a ci pawl cih bangin ki-om hi. Paul in bel upna a neu lai pawl a puk nading ahih leh milim biakna sa ka ne kei ding hi, na ci hi. (1 Korin 8:13). Upna neu a cih pen kuate hi ding hiam cih leh a kibiakna misak mahmah teng ahi hi.

A kibiakna misak i cihte

A kibiakna misak i cihte pen Pasian hong sawl loh tata ahi, Pasian phawkna le zahtak piakna ci-a Siklamteh khawng a phutphut pawl, suai lamteh ngawng awh khi khawng a thupi sak pawl, milim bawlbawl pawl, hun lui lai daan-a biakna tau bawl sansan pawl, sa nek theih nek theih loh a omom sak lai pawl, biakinn sung khawngah gi a bawlbawl lai pawl, ni le kha kumte a thupi sak pawl, mun le mual tawh Pasian a zongzong lai pawlte le pawikham a thupi sak mahmah pawlte ahi hi.

Khedap vai

Khedap suah le suah loh vai zong a tunga daan mah hi. A suah ten Mosi’ khedap suah bulphuh. A suah lo te’n Jesuh Khrih zawh ah Khrih sunga suahtakna bulphuh hi. Khedap na suah nop leh suah thei cin-a, ahi zongin tua na khedap suahna hangin a suah lo te sangin Pasian tawh kinai zaw tuan peuhmah lo hiteh cih theih huai hi. Pawlkhatte in biakinn sungah gi bawlin pulpit tung bekah suah sak a, biakinn sungah bel suah sak lo uh hi. Hih tawh kisai – Jesuh a sih laitak kidalna puan kibalkek ahih nung sangin pulpit tung le biakinn sung khempeuh a kizom a kibang hita hi, cih phawk huai hi. Pawlkhatte in biakinn sung mahmah ah zong khedap suah sak hi.

Khedap suah kul lo

Pulpit tung hi taleh biakinn sung hitaleh khedap suah kul peuh mah lo hi. Pasian in a puatham en loin lungtang en Pa hizaw hi. Tua bang i cihteh a suahte mawhsakna hi pah lo-a, Christian suahtakna a gen ihi hi. Ahi zongin amau puk nading ahih leh khedap suahte’ pawlpi ah i kikhop leh amau mah bangin suah theih ahi hi. A theih huai-ah, Muslim te Kawlte banga khedap suah zawh thu tawh dikna kingah lo hi cih thei ni.

Lam khat leuleu ah, a khangto nai lo gamte, khuate le biakinnte ah leivui, buan, ek cihte khedap nuai-ah baang nuam mahmah ahih manin tua bang munte ah upna vai tawh hi loin pumpi cidamna le sianthona khualna-in biakinn sung hitaleh mi’ inn sung hitaleh khedap suah huai mahmah leuleu hi. Upna, zuihna le Christian suahtakna tawh kisai-ah bel pulpit tung le biakinn sungah khedap suah kul peuh mah lo hi.

Pulpit tung le biakinn sung ninsak

Pulpit tung le biakinn sung ninsak pen khedap hi peuh mah lo hi. Pulpit tung nin sak pen Thuhilh maan lo Syate sum guai-a i zaknop tuanthu tangthu, eimau thumaan lohna teng hong gumgum thuhilhna, tulai daan le ciamnuih cihtak teng gengen saknate khawngin pulpit ninsak hizaw hi. Biakinn sung siangtho sak pen khedap suah hi peuh mah lo leuleu-in lungsim khempeuh tawh Pasian’ thu kigente ngai-a, a kigente maan taktak hiam cih Lai Siangtho tawh sittelna khawng hi zaw hi (Sawltal 17:11). Pulpit tungah khedap a suah kul hiam? Suah kul lo hi. Evan. Suangh Dal