Nu: Minam thupi ~ Kap Za Khai

Nu: Minam thupi ~ Kap Za Khai

Thupatna – 2016 Kumin Northern Kalay Valley Baptist Association Men Department vaihawmna tawh “Pa: Minam Thupha” cih thulu tawh laigelh kidemna ah ka kihel a, Topa’ thupha tawh a khatna ka ngahna panin ka lungsim sungah hong suak thu in, PA bek minam thupha hi lo a, NU zong minam thupha ahihna ka phawk semsem ciangin hih thulu tawh thului khat gelh ding a lunggulh ka hi hi. Ka mimal ngaihsutna ah Pa bek minam hisam lo hi. Pa’ thupitna le thupha hihna huang a om bangin Nu’ thupitna leh thupha hihna huang zong om hi. Khat bek i tuam gen leh thubulpi kicing thei ngeilo ding ahi hi. Pasian in Adam leh Eve pen kikhen dinga a bawl ahih loh mah bangin eite’n zong Nulepate’ thupha naak ahihna uh khen ding hilo hi.

Nu Kammal

Nu cih kammal pen a khum mahmah leh a ngaih mahmah kammal ahih bangin, kammal thukpi zong ahihna tawh kizui-in a khiatna kicing in kigenkhia theilo hi. Pastor Neil Phelan, Jr., in a genna ah, Nu cih pen innkuan kiheenna leh innkuan lungtang hi, na ci hi. Pa pen innkuan lutangpi, makaipi ahih bangin Nu pen innkuanbup kiheenna, innkuan a kip a nungtasak lungtang ahi hi. Pa pen leenggui ahihleh Nu pen leenggah kung leh a hiang hi a, tate pen a gahte ahi uh hi. Bangbang ahi zongin Nu cih kammal pen a khiatna tampi kipia thei mah dinga, ahi zongin a kicing in a khiatna kikhia theilo ahi hi.

Innkuan Sunga Nu’ Dinmun

Lai Siangtho sungah Pasian in Eve pen Adam ading a bawlna tungtawnin Eve kici numei tavuan pen Adam ahuh ding kici ahih manin numei dinmun pen pasal huh ding hong suak hi (Pian. 2:18, 22-24). Pasal ahuh ahih bangin innkuan sung panin mihing nam kipeh zom toto theih nadingin naupaai nau neihna leh tate pahtah kepcingna tavuan nei uh hi. Innkuan sunga tate tungah tavuan lianpi a neih bangin a pasal lungnop tawldam nading, a nasep gualzawh nading a panpih lai hi. Tua manin leitung mipilte in nute a pahtawina un “nauluai a vei khut in leitung a uk hi” ci uh ahi hi. A cihmah bangun hi takpi a, innkuan lutang pen pasal ahih hangin innkuanbup khempeuh lungsim le pumpi tawh a kem ahum, hong khoi pen nu ahi hi.

Tate innkuan lungsim a neih nading ahi zongin, innkuan sung panin a pualam nuntakna gualzo khuasuak nading ahi zongin nute bekin pantah in matut zo ahi hi. Tua bek tham loin inn sung le inn pua kilem nading leh daihna ngah nading zong nute’ tavuan mah hi lai hi. Pa in innkuan lamin Nu in innkuan kipsak hi. Pa in inn sung vanlenate kicingsak in Nu in inn sung zemin hoihsak hi. Pa in innkuan makaih in Nu in nungzuih ding panpih hi. Pa in an zongin Nu in tua ante huan in innkuan gilvah sak hi. Cih bangin inn sunga Nu’ dinmun pen limci mahmah in, lum mahmah hi.

Mihing Kipawlna Sunga Nu Dinmun

Leitung a om ngeina khempeuh sungah numei a thupi bawl ngeina a om loh mah bangin, Zo ngeina in zong numeite thupi ngaihsut in mun piakna om khollo hi. A beisa hun a kipan tuni dong mah ahi hi. Adam ukna thuak dingin Pasian in Eve a samsiat a kipanin numeite pen pasal ukna nuai-ah dai takin kikoih lel a (Pian. 3:16b), leitung tangthu khempeuh pasal vive in at in, makaih in, numeite ahihleh anbuk sungah kikoih, kizang hi. Ahi zongin hunte hong kikhel toto a, mihing kipawlna sungah numeite dinmun kilap sang nadingin kihanciamna tawh kizui-in, numeite’ pilna leh thahatnate ki-awlmawh loin ki-om thei nawn lo hi.​​

Pasalte bekbek in kumpi a sepna panin numeite zong kumpi hong semta uh hi. Gam makaipi, thuvaanpi, hong suak semsem uh a, pasalte sep zawhloh a sem zote ahi uh hi. Gentehna in Topa Jesuh kimanin a kithat ding laitak a nungzui papi lomtang tengin Topa Jesuh a taisan hangin, amau thusim loh numeite in Jesuh Khrih nungmah na zui ciatciat uh a, singlamteh phung dong ah lau het loin na zui uh hi. Leitung tangthu sungah zong hih bangin numei hangsan, numei gualzo tampi om hi.​​

Lungdamna thu hangin i minam sungah Nute’ dinmun kilamsang mahmahta hi. Anbuk sung panin biakinn sungah ahi zongin, sanginn sungah ahi zongin, party kipawlna sungah ahi zongin nute hong kizang semsem hi. Tuciangciang Kawlgam sung bangah pasal sangin numeite laihilhsia mimal tam mahmahta hi. Numei kihel lohna nasep, panmun leh zaa leitungah om nawn lo phial hi. Tua manin 1 Esdras 4:17 sungah “Men cannot exist without women: Numeite loin pasalte om thei lo hi” ci-in na kigelh ahi hi. Mihing kipawlna sunga Nu’ dinmun pen zai mahmah ahihna kimu thei hi.

Nute Thupitzia

Pasian’ hoihna pen kam-a gen zawh hi lo ci-in la in i saksak mah bangin, Nu’ thupitna leh hoihna zong kigenkhia theilo hi. Rev. Dr. Saw Ya Ma Laylay in Nute a thupitna a gelhna en le’ng a nuai a bang ahi hi.

• 1. Nute pen Pasian bawl hi-a, Pasian’ nasep a panpihte zong ahi uh hi.
• 2. Nute in mihing khanggui kepsak uh hi.
• 3. Nute pen mihing kipawlna-ah thuguipi hi-a, mite’ ngeina a kepsakte zong ahi hi.
• 4. Nute pen kilemna leh daihna i ngah na dingin a sempipente ahi hi.
• 5. Nute pen itna, hehpihna leh deihsaknate khempeuh tate tungah a piakhia masa pente hi.
• 6. Nute pen mite ading in leitung gimna athuakzo pen te ahi uh hi.
• 7. Nute pen biakna leh thudangte hong hilh masa pente ahi uh hi.
• 8. Nute pen aneel pen, a ciim pen leh ahoih pen te bek tate tungah hong pia-te ahih bangin tate leh leitung ading in cihtakna, thumanna, hahkatna, thahatna kicingna pipente ahi uh hi.
• 9. Nute pen leitung a uk dingte a phuangkhiasak te ahi hi. Nauluai a vei khut in leitung uk hi.

Minam Thupha

Pianna naak ahih manin:​​

Pasian in Eve pen naupaai leh nau nei dingin a samsiat bangin, Eve tungtawnin Abel leh Cain bek tham loin tuni dongin mihing tampi leitungah hong piang ahi hi. I pianna nu’ gil pen Pasian thupha piak ahih bangin, amah pen i pianna naak hong suak a, amah pen minam tam semsemna, minam pianna naak ahihna tawh Nu pen minam thupha ahi hi.

Leitung pasian ahih manin:​​

Lai Siangtho sungah nulepa zahtak ding hong kihilh bangin, nulepa zahtakna in nopsakna leh khansauna ci hi. Nulepa pen Pasian in ama’ zia muh theih dinga hong piak i leitung pasian ahi hi. Leitung pasian zahtak leng Pasian hong ciamsa leitung thuphate kingah ding pelmawh ahi hi. Nu’ khitui taak a luangsak tate cikma hunin ma pai ngeilo kici hi. Nute in thupha hong piak theih bangin, zong samsia thei hi. Hih in ama’ leitung pasian hihna kilatna hi a, tua hangin amah pen minam thupha ahi hi.

Mihing zunte ahih manin:​​

Innkuan sungah pate in sum zong zaw uh ahih manin tate pantah, zun man lo uh hi. Nute in tate a suak a kipan un nawizuu leh anmuap tawh khangcingsak in a gol ciang zong Pasian thu leh leitung thu tawh hoihtak hong pantah, hong zun uh hi. Nute’ khut pen paak suan khut ahih bangun tate nuntakna a zun thei khut neite zong ahi hi. Minam a piangsak bek tham loin minam gina, kician i suak nadingin inn sungpan, sanginn sung pan leh kipawlna tuamtuam sung pan hong zunte ahih manun minam thupha ahi uh hi.

Tawntung Secretary ahih manin:​​

Pa pen minam sungah president ahih bangin Nu pen zong minam sungah tawntung secretary ahi hi. Pa ii sep theihloh leh sep zawhloh khempeuh in nu in geel in sem ziahziah thei hi. Innkuan ading leh minam ading a kipiakkhiatna uh pen lian mahmah hi. Nekledawn, silhleteen, sumlut sumzatna, sum zonna, innlelo zepna, tate khangcingsakna cihte ah kicing takin tavuan la zo, vaihawm zo uh hi. Nute kanin minam leh innkuan adingin a kician, a kipiazo, leh deihsakna tawh nasem zo secretary om lo hi. Tua manin amau pen minam thupha ahi hi.

Thukhupna

Nute minam thupha ahihna uh gelh ding hileng bei thei lo ding hi. Laidal tungah a kigelh khin zawhloh hangin i lungsim leh i nuntakna tawh amau thupha hihna i theiciat hi. Nu cih kammal a khum ngaungau mah bangin i lungsim hong neemsak in, lungmuanna,​​ kha muanna leh lungnop tawldamna hong pia uh hi. Nu’ manphatna bang tawh kiteh zo ding hiam? Vanlelei bei dongin kiteh zolo ding hi. Nu om keileh leitung minam om lo ding hi. Tua ahih manin minam thupha ahi i Nute it in, hehpih in, don in nisim pahtawi ni. Nu hong pia i biak Pasian​​ tungah nisim lungdam ko den ni. Kap Za Khai (Photoh)