Cingno kiangah Laikhak – Thumna ~ Tg. Kham Khual

Cingno kiangah Laikhak – Thumna ~ Tg. Kham Khual

Lia Cingno aw, Tuni Tun kha ni kua, kum tulnih le sawm nih, nitak nai giat in phalbi lai khua vot lua ahih manin kum sawmthumbang aki zangnawnloh khitnungin, ka Pu in amah khut ngiat tawh a bawl lengla khan (sitting room) inn dei nawlah inn zepna dingin akisuang meiphu lui, lakhia suk in, singthem tamlo tawh meiphu ka cih hi. Nidang in i pu i pate in innsung van zat ding ciangciang amau khut tawh ana kibawl theih mawk uh lamdangsa in, a pilna a siamna uh thupi ka sa semsem hi. Hih van luite kep pen i khangtangthu kep cingna, khang paisate in hong nuntakpihna uhahihmanin ikep suaksuakding kisam kasa mahmah hi, Cingno aw.. (Tonzang a Innpi zong omlai leh muh noptak in teh aw)

Meiphu ka cih leh innsung hong lumtuam sak mahmah ahih manin, Tedim khua a Nelson topa hong omlai in lai a-at ciangin a ‘tutphah’, Tedim khua panin lasukin ka kep tutphah tawh meiphu kiangah ka khethuap letlat sa in ka ‘kawl hai’ (burmese cup) dim tuilum dawn kawm in na thelnah na tongdam nemte guk vei bang kasim suaksa ahih hangkasimpha kikkika,na awsuah ding zia bang bawl tawm in, kei bek tunglam ento in ka nui heihai pong hi…haha… mi’n hong mu le a haizo hita hong ci lua unteh, haizo ning… (nang tua bang na ngaihsun ngei tam? hehe).

Tung solkha lah a tan ngei in tang a, a vangtang nuai ahhuihdam nung siausiau in lia leh tangte in zong lungzuan zai deih awi khawm in, lungdeih cin sinthu sut khawm uh ahih manin kei zong ka loh ding dan dang theilo in kalaikung le gelhloh laidal mah la in na thelnah ding at kakipan hi,’Ka Galdot Zolia’ aw. Agam vangla hi tan a mel a muh loh,lenpih lungtuak na tongdam,ken sang inge. Na tongdam leh zotuibang hong luang ve aw, na hem sinthu a hi zong, lungzuan law’nge…

Khuapi ah om, kiim le pamah mawtaw ging ng ennga ng,mihing kileh vengvung,kua pen kua hiam cih zong kitel manlo,innvengte mel na ngawn kum khat in khatvei bek kimukha ahihmanin veng le pam holungkum cihte omnawnlo hi. Ahizongin lamdang kasak mahmah maw Cingno, hong kum ning maw, tua bang in abuai vengvung tengmah in khattang kisakna kinei ngeingai mawk hi (kei bel nang omlo in kim theilo ka hih man hi kha tham dinga midangte hiveh aw ka lunghimawh..haha..!!).

Nidangin vengta meh kikholh, ankhing peuh ki domin,ka tawhtang na kepsak in maw ci- in i kimuan hun laite uh ka ngaihsun theizel a, eite zong ‘Western Individualism’ in hong zo luata ahi kha tam kaci a, tu i bat toh semsem le: neih le lam kicing mahmah, kiim le pam ah mitam mahmah, social media lawm hau mahmah napi, ‘khattang le hawm’ kisak luatna hangin deihloh pen (suidcide) hong tungin, nahteh pulh bangin i pulh ding a, manta khalgah nekha i hiam kici kha ding hi, ka lau mai hi, Cingno…

2017 in Britain ah mi 90 million valte in khattang kisakna (loneliness) tuak mun mahmah ahi kei leh tuak gige ahih manin 2018 in leiting bup ah amasa pen dingin ‘Minister of Loneliness’ hong koih khiat petpet uh ciang bel, kei poh- gam khangto napi a mite in koilam manawh aitam ci’n ka leel vangvang a, S.T. Hau Go in “Bang ici Gamtat Ding Hiam?” (How then shall we live?) a cih vangvang bang ka phawk hi,”Ni aw, tuana Thangho Liando te lah kihi lo a bang kong nekpih tammaw ka ci a,’tuai ngalliam aw sunggil kial man laitual hong leng kei ing, lungzuan vangngaih sinthu hi e,” ci khong in i kikholh lai nite uh ngaih huai si inteh maw..

A lang lamah,taangpi taangta kutna le vai (societal pressure/ activities) hang in bangmah tan i tunloh ding, eimah nuntakna na ngawn i kicimtak ding ka kihta leuleu hi, Cingno aw.

Lia Cingno aw, thu nong dot ciang na kisuan zia na gen a,dotna hau lua ka hih manin piangthaklo kai tam na ci liang hi (thu nong dot ciang kei na guk nuam khinkhian in na nui thimthiam hiveng, hih pen na muhloh ding a ka gelh hi!!). Tua bang hi peuhmahlo hi, lai thei- pilna neita hang a,minam dangte ngaihsut zia tuamtuamte zong theita ihih manin dotna tampi a nei ding mah ihi ta hi. Dotna neih pen a sia hilo a thu i theihnop manahih manin ahoih a hizaw hi, Dotna (questions) le Uplahna (doubt) kici kibanglo hi.

Topa Zeisu neisa khat in, i theihna kicinglo ahih manin dotna (questions) kinei tham a, ahi zongin Topa i umlah (doubt) kei hi. ko Pasian nasemte nangawn in Topa maitang ka muh madong uh ka telsiamloh ding uh thutampi a om hi. (Jacob Pasian tawh na kibuan a, Habakkuk in bang hanginPasian neilote hau in nuamsa tektek hiam cih na telsiamlo ahih maninna dong hi- Thu dot ding a ut,kikup ding a ut Pasian- Pasian in i nei a, a hampha ihi zaw hi. Isaiah 1:18). Ka meiphu singtum bei dawn hong behlap pak tong maw.

Meivak ah lenglate tutsak, mei awisak pen Zomite ngeina ah lenglado siam cih ciamtehna hi a, tu a ka meiphu awi na mun pen no inn hizaw henla, Dr.Cinpu le a lawmnu kiho bangin ‘no inn lo mahmah hawhna ding thei khang ei’ kong cih ciangin nang ‘nong vak loh ding ka lauh luat hi a’ ciin maitai takin hong hopih in phalbi zan do khawm le nuam zen si inteh maw, kei zong kamaizumna leh ka kisuan lah giaugiauna teng hong bei hiau mah dinghiven…

Ko gamdang a om khangnote Uplahna tawh buai mahmah ung na ci hi, a takpi in ci le kolamah zong khangnote sungah zong thu ngaihsun mite ka buai mahmah uh hi, hih pen kipantahna om khalo ahih man hi zaw a,ka dah mahmah hi. I khangnote University a lut ma un, sangsia le lai at Pasian umlo (Atheist, Secularist Proffessors le authors) te thuhilhna le simmawhna (radicule) pan in amau le amau kihut (defend) zo ding in kithawi kholh sakna i neih ding, Khristian upna tawh kisai kosiatna (mockery) le kalhna (supposed refutation) a zak dingte uh hilh kholh a, tuate a dawng kik sese kei zong un tua thute in a huzap (influence) zoh loh na ding in tuate pan kihut dingziahilhkholhnakisam mahmah hi.

Hih bangin i hih kei leh tu zawh kum 10 (sawm) khit teh i khangno laipil te biak bukah i mu nawn kei kha ding hi,ka dah mahmah hi Cingno aw… Koi mun koi mual ah na om zongin thungetnana khahsuah ken maw, kum zalom sawm le giat (18thcentury) lai: kipilsakna le thangtatna a suk mahmah,England gam, a khel Pasian in ei zonghong khel theilua hi,lungkialo ding hi hang maw.

Ka Cingno, eh, sorry, Lia Cingno aw, i tatna kuam kidangin dawnbang tuah ding a mual leguamte in hong hal, lung aa bawl bang dawh in taamsak na ding in, Tung Sianmang kiangah, ‘van thak le leithak’(Mang.21-22)ahnang tawh gam khat ah ka om khak ding ka kun hi.

Tang ngalliamkhatkahihbuang, hih lai ah Zola khat nang a ding hong paih leuleu ing, “ A nicin in siing tongdam za in tam ven,ka san heisa bang a paal,lo nuam ing e. A nicin in tuktaang bang a tung zongin, lunggulh sing dang ang ka baang, lo ding hie.” Deihsakna tawh, Tg. Thangno