Naki ngaihsutna sangin azah nihin na pilzaw hi

Naki ngaihsutna sangin azah nihin na pilzaw hi

Hihbang thulu tawh laiat i kipat ciangin ki mawkphatna tawh kibang na sa thei ding hi. Vanzuak mihonpi ki muhkhopna khat ah ‘na kingaihsutna sangin a zahnih in na hoihzaw hi’ ci in ki gen hi. Mi khat in tua thu a mantakpi maw, a piangtheilo thu cih lahkhiat ding kipan hi. A nasep khempeuh en kik aa a hihtheihna khempeuh tawh a hoihzaw ding hanciam hi.

Hih mipa ki lamdang dingin na um hiam? Na um zo kei phialzongin kha khat hong cin ciangin a beisa a vanzuak sangin a zah sawm hong khangto sak zo hi. A sumlut khangsak mahmah hi. Inn thak khat a deihpa hi nawnlo in inn thak khat a leizo pa hongsuak ziau hi. A mawtaw zat te a hoihzaw in hong kilaih aa a puansilh te uh hoihzaw pah hi.

Khuapi neu khat sungah vanzuak tawh nuntakna a’ding nekkhop a mu ciamciam mi khat om hi. A vanzuak khawngkei leh an nekding a haksa hipah hi. Nisim in heater mai ah radio khat ngai kawmsa in vanleidingin hongpai ding mithak ngak in om den hi.

Na ki ngaihsutna sangin a zahnih a hoihzaw in na sem thei hi cihthu hong za aa tuathu a lungsim sungah teng cip pah hi. A kimlepam a khuadak leh a khantoh theih nading tampi hong mupah hi.

A kongvangno te man a kitam them vive hiaa a kilaih loh zawh sawt mahmah ta hi. A vanzuakna voucher te tungah nin leh leivui a om lam hong mupah hi. A masa pen in nisim in a tuttutna tutphah hemkhia hi. A zom ah a van le na te etlawm tak in hong gual sitset hi. Tuaciangin a saisung khempeuh siangsak sitset in ninkhempeuh paikhia hi.

A kongvang neute a hithei zah in laih in et lawmtak in puah hi. Hih mipa a mah le a mah a kingaihsutna sangin a zahnih in hoih zaw takpi thei ding hiam? A zah guk in hong hoihzaw, hong khangto zaw mawk hi. Mi ngak in suntha pai tu hithiat nawnlo in a saizuak pih ding mi cial nuam liang aa sun an ne ding nangawn in ciah man nawnlo hi.

Koicibangin na sumlut khangsak ding

‘Na kingaihsutna sangin a zahnih na pilzaw hi’ cih a umzolo te in ‘sep sangin kamtawh gen baihzaw mah e’ hong ci ding uh hi. Tuabang a ci mi pen a hihtheihna taktak a lak khia ngamlo mi a hihi.

Hih laimunah a piang na leh a piangsak (cause and effect) thu i tel phot ding kisam hi. Sumlut tam pi i ngahpen a piangsak hilo aa hong piangthu ahihi. Tua leh, a piangsak bang hiam? Sumlut tampi a piangsak pen ngaihsut hoih (good idea) a hihi. Ngaihsut hoih thu tawm kikum beh lai ding hihang.

Ngaihsutna hoih pen gualzawhna ii tawhtang lianpi ahihi. Nasepna lianpipi te, sumtampipi ngahtheihna nasep te, kumpi leh gamlianpipi te zongh ngaihsutna bek mah tawh a kipan uh a hihi. Sum tawh na lei van khempeuh mikhat ii ngaihsutna a hihi. Ngaihsutna hoih khatpen ki neumuh thei lo hi. Ahizongin mi a tamzawte in a ma sungaa om idea neu muh in umzo mahmah lo mawk uh hi.

‘Hi bang ngaihsutna ki zangthei ding hileh midang tampi in na theikhin lel uh lo dia’ cihpen i zakzak a hihi. Ataktak in tu ni ciangciang leitungah a lawhcing mi khempeuh in tuabang aa a neuno idea khat, mi theih theih sa idea te mah tawh hong lawhcing uh hilel hi.

Papi khat in a khua sungah vanzuakna sai no khat bawl hi. A khua pen inn tawm mahmah a hihmanin a hanciam mahmah zongin khantoh theih nading omlo hi ci in thei hi. Ni khat ni ciangin ngaihsutna thakkhat nei hi. A nasep a neu mahmah hangin ki pawlna tawh na semkhawm dingcih hong ngaihsun hi. Bangcih sepding cih a theihloh hangin a sunglam pilna kiang hongtun ciangin a sepding zia hong thei hi. Pai pah vingvengin a khua veng tai 50 (50 miles) ciangciang ah mi te ii min leh omna (address) teng va kai khawm hi.

A khuasung sai ngei ah ahihleh mawtaw a khawltheih nading khawlmun (parking) lian pipi omsak hi. Naupangte ki mawlna ding tuamtuam te zongh koih hi. Mi te a maitai sak thei ding limetlawm tuamtuam te koih zihziah hi. Naupangte ki mawlna ah banglo khat a tuah uh leh a don pahlian ding mi zongh omsak se hi. Kum khat hong cin khitciangin mitampi te in a masai vive ah van hong lei ziahziah ta mawk uh hi. Bangthu hong piangtam? Kumkhat sung in a sumlut $300,000 dong khang hi. A lungsim sungaa idea om bangin a gamtatna hang ahihi.

Leitungah hauhna leh sepkhiatna lianpipi te khempeuh khuakbu sungaa idea no khat panin hong kipan vive hilel hi. Nasep lianpi septheih nading phalna ngahin leitung ah a minthang makai te ii nasep na zongh naupangno khat ii ngaihsutna peuh na hilel thei hi.

Kumsim in mawtaw company te in mawtaw bawl ziahziah uhaa a hizongin kha sim in mawtaw kilamdang toto den lel hi. Radio zongh kibawl aa a kibawl sa te tawh kibang cih ding hamsa hi. TV channel zongh ki behlap, ki behlap hi den lel hi. ‘Bawl theih ding beita in teh’ cihpen a tampi bawlsemsem theihna lim hizaw hi. Khantoh nading hong lak hi zaw hi.

Mi khat in thawlsin hon ding haksa sa mahmah hi. A kamtawh pet zel, a khut tawh hanciam zel aa haksa sa mahmah hi. Tua leh ‘tawlhu honna khat ki bawl leh e’ ci in hong ngaihsun hi. A ma a’dingin zongh nuam mahmah ding midangte a’dingin zongh nop tuamna tampi pia thei ding cih mu hi. Tua ciangin tu a mi khempeuh leh sai khempeuh ah a kizangh tawlhuhonna tuamtuam te hong piang a hihi. Ngaihsutna neuno khat pen nalianpi sep theihna ding ii kipatna lampi a hihi.

Mite ii idea neuno khat tungpan a bawlkhinsa nate na muding hi. Nasepna khempeuh, na puansilh, na tenna inn, na hawl mawtaw- idea vive pan hong kipan ahihi. Na sungaa idea neuno khat in thatang hanciam thutawh na lawhcin zawhloh laitak in hong panpih thei hi.

Haksatna khuamial na saklai tak in na sungaa idea in gualzawhna leh lungdamna khuavak hong taangsak thei hi. Idea hoih ngah nading kum kiciangtan omlo hi. Kum 60-70 a pha khinte nangawn in a nuntakna a kikhelsak, a beisa hunkhempeuh aa a neihloh idea (lungsim sungaa ngaihsutna hoih) te nei kiksan thei uh hi.

Kei (lai at pa) mahmah pen kum 50 ka phak khit ciangin a lawhcing mi ka hihi. Kumtamna i cihpen phat tuamna khat a hihi. A theihkhak thu khempeuh sungpan in ahoihpen ngaihsutna a lungsim sungah om hi. Tua ahihmanin idea hoih khat na ngahtheih nadingin na lungsim puahpha in. Midang tampi a’ding phattuamna a pia thei dingleh nanga’dingin zongh noptuamna hong pia ding idea te ngaihsun in.

Hih a nuai aa thu 3 te bangin na sepleh na sunglam pilna in nanga’ding aa a hoihpen idea hong theisak ding hi. Tua in nangpen na ki ngaihsutna sangin a zahnih in na hoihzaw cih hong laktel ding hi.

Thu masa: Nang le nang suakta tak in na ut bangin na ki bawltheihna mun pen na sunglam hi cihthu na thei khin hi. Idea hoih neihtheih na dingpen idea hoih a neipa bangin sunglam ah kimuh ding kisam hi. ‘Ka lungsim ngaihsutna hoih hi, ka lungsim sungah idea hoih tuamtuam te hong piang khia hi’ ci in pulak khiatding thupi hi. Na sunglam mi bangzah tak in a pil hangin na pualam thupiakna tawh nasem zaw hi.

Mi khat peuhpeuh tawh thu na gen ding ciang ‘midang te tawh kiho nuam kasa aa ka lungsim sungaa ka gennop thute zaknop huai takin ka gen khia thei hi’ ci in huntomno sung nanglenang ki pulak lecin na kampau hong nuamzaw tham ding hi.

Thu nihna: Na lungsim tawngaa om idea pen na pualam ngaihsutna sungah khauhtak in hong tun ding kisam hi. Tua hiaa na khempeuh a piangbangbangin lungdam ding kisin masa in. Lungdam theihna, lungkim theihna nei lecin tua in na sunglam idea te khangsak hi. Lungdam in nuam nasak ciangin na sunglam pilna in nasem aa ngaihsutna hoih te tawh lungkim huai tak mah in hong thukkik ding hi.

Thu thumna: Na idea bangin na nasepleh na idea pen a kimuthei hong suak ding hi. Ngaihsutna i cihpen i ngaihsut khak tung laitakin thahat penpen hi. Tua na idea bei kiksak kei in. Laibu sungah ciamteh in. Na lungsim sungaa hoih thei dinghi ci aa na up idea khempeuh beisak kei in. Hoihtak ciamteh in.

A lim in na mikha ah na muthei ding hi. Tua te ahithei zah mahin ciamteh in. Na idea te thupi bawl lecin a hoihzaw a lian zaw hong khangsemsem ding hi. Na lungsim sungah tua na idea te a nuntak nadingin en kik zel en kik zel in. Ni sim in idea thak te hong omom ding aa sepding tampi na thei ding hi.

Sik tungah laikhet a sem mi khat in ni khat in nai 8 sung a nasep pen cimtak mahmah hi. Ngaihsutna kihel lo in thatangbek a zangh kisa hi. Ih nasepna peuh ah idea hoih ki nei thei hi cih a theih khit aa kipan a gamtatdan hong kilamdang hi. A nasep bangci bangin idea hoihtawh khangto sak thei dingcih hong hanciam hi.

A beisa hun ah misawl bek sem hi. Misawl loh a sikval te zong sik company te kiangah a huantui dingin sum tawmno tawh zuak hi. Khantohna ding idea a ngah khitciangin a sikval neuneu te lim hoihnono in hong sek hi. Cimtaknawnlo bek hilo in manlah lua mahmah aa misawl zongh sem manlo liang hi. A sumlut zongh a zahnih sang a tamzaw khang hi. Ngaihsutna mahtawh a kipan ahihi.

Lungdam in

‘Lungdam in’ cih laimal pen laimal tenglakah a thahat pen kammal ahihi. Maigumna in lungsim ngaihsutna susia hi. Na lungdam mahmah hunte ngaihsun kik in. Mun khat peuhpeuh ah pai in na khat peuhpeuh sepnopna lungsim hong nguan hiam?

Lungdam in. Haksatna na tuakzongin lungdam in. Na haksatna in nanghong uk lo dingaa na haksatnate zo ding na hihmanin lungdam in. ‘Lungkham huai mahmah hiven, bangci lungdam theih ding’ cih i zak pahpah kammal a hihi.

Maigumna in hamphatna khatbek hong piak theihlohna leh hong suakta saklo cih i theih hiaa banghangin a hoihzaw i ngahtheih nadingin lungdam sawm lo ding i hihiam? Thuthak ki zaksakna lai te na sim ciangin nang ii din mun ah om uh hileh a lungdam thei ding mi bangzah om hiam cih nasim kha ding hi. Tua hileh thupha a ngah na hihlam na ki thei ding hi. Tua hileh lungdamtak in na haksatna te na zawhtheihna ding idea te na ngaihsun thei zaw ding hi.

A zom ah sum (money) thu i gen ding hi. A masa in hih i gensa thulu sungaa thu ii manphatna a vek in na ngah hiam cih ki dongh in. Ih Mutna leh Hauhna