Gam aki halhal nawnloh hunciang ~ Tuang Za Khai

Gam aki halhal nawnloh hunciang ~ Tuang Za Khai

1. Eite’ hangin Pasian bawlsa nate kisia

Pasian bawlsa nate a ngeina bang leh a om ding bangin om nawnlo in, daihna pan lam pialin buaina sungah mihingte in kilut pihpih kha khinta cih thu, kiim le paam kepcingna tawh kisai thukhun (National Environmental Policy Act) a kibawl hun 1950-1970 pek panin a ki thei khinta ahi hi.

2017 kumin tua buaina pen World Economic Forum in buaina lianpen (1#na) in ciamteh uh hi. Tua kiim le pam buaina sungah, khua hun suksia, nisa lua, gam keu, acid guah, guahtui hun maanlo, tuiciin, Ozone layer kisiatna, ziin liinna tuamtuam, huih niin etc. cihte kihel in, i zakzak leh i theihtheih buainate hong suak bilbel hi. Hih buainate dung zui-in mihingte’ tungah natna lamdang tuamtuam zongh hong piang zelzel ahihna zongh milip (mikim) in a kithei khin leh a kiphu khakha-ahi hi. Gentehna in: Cancer tuamtuam, Tohkui (dengue), Ngetphia, SARS, Ebola natnate leh kiim le pam a ki zom dimdiam ahi hi.

2. Buaina zungpi khat

Hih buaina-apianna zungpite sung ah, khat pen, huih (i dik huih siangtho, Oxygen, O2) sungah huih niin (carbon dioxide,CO2) a om ding zah sangin a tamzaw a omna hang ahi hi. Huih sungah CO2 a om ding zah pen 300-350 ppm (parts per million) ci-in mipilte in ciamteh uh hi. A kiteh ciangin 1960 kumin 317.3 ppm hi aa, tukum (2020) February kha ciang 414.11 ppm tak phato khinta hi. Kum khatin 1.9 ppm kiimta bangh a khang toto cihna ahi hi.

Hih huih niin pianna bulpite sung leuleu ah, mihingte’ bawl set tuamtuam leh gam halna (zolo halna, an sing ding halna a kipan singkungte mawk phuktan gawpna etc.) pan apiang meikhute kihel leuleu hi. Ei a dingin Set tawh kisai ah lung hihmawh huai nailo na pi’n, gam halna, lo halnate leh sing phuknate ah lung hihmawh huai simta hi. Tua zongh itheihtheih sa mah hi leuleu hi.

3. Singkung lopate thupina

Singkung lopate’ thupina tampite sung pan abulpi khat tungtawnin tua lung hihmawh huai ci aa i theihtheihsa thu ngaihsun kik pak lehang, singkung lopate in photosynthesis ci-in, eite’ a ding alauhuai huihniinte (CO2) zangh tumin, eite’ a dingin a kisam penpen huih siangtho (O2) khah khia hi. Gammang tulak hectare khat in kumkhat in huihniin (CO2) 65 tonnes bangh zangh tum thei-in, huih siangtho (O2) 3.5 pan 5 tonnes kikaal bangh khahkhia zo hi.

Hih thu ngaihsun pakleeng, lungmuan huai ding tawh kibangh napi, kumsim in lo thak zuanin, lo ahal tampi ki omlai aa, tua mah bangin, lono sel khat leh kum khat sung peuh sabetna-anuam ding lungulhna ciang lel tawh gam kihal lualua den ahih manin, Zogam ah gammang tulak cih theih ding mun tawm mahmah in, mun khem peuh keu vengvung kawikawi ta hi. Tua ahih manin, singkung lopate’ ii photosynthesis nasepna-a tunga bang lian thei ding mun tawm mahmah hi.

4. Lungmuan huailo

A langkhat lampan en lehang, mihingte leh ganhingte in idiik suk idiiktoh leh sepna bawlna leh a ngeina tuamtuam pan apiang thu tuamtuamte hangin second khat in huih siangtho (O2) a tawm penpen 10,000 tonnes kizang tum den leuleu hi. Tua mah bangin, zatloh a phamawh van tuamtuamte (Plastic bags leh Smartphone a kipan) zatna hangin, second khat in huih niin (CO2) 2.4 million pounds bang kikhah khia den lailai hi. Hih dungzui-in, a ki ngaihsut ciangin huih sunga, singkung lopate’ khahkhiat huih siangtho (O2) khempeuh pen tuma kum 3000 kiim sungin a kizang tum (bei) khin ding ahi hi.

5. I kamphatna citciat khat

Ahi zongin, I kaamphatna citciat khat ah, a kikim citciat tissue nih: zattumna (cellular respiration tissue) leh hawmkhiatna (photosynthesis) a kituat ciang, singkung lopate ii tissue khat in huih siangtho (O2) a hawmkhiat zawhna tha pen a kikimpih zattumna tissue khat ii zattum zawhna tha tungah a zah 30 bang hatzaw kiau bilbel hi. Hih vilvel in hong huh huh ahi hi.

6. Gam ihal nawnloh uhciang

Tua-ahih manin, singkung lopate it bawlin, suanbeh, keem khoi-in, gammang tulak mun tampi ah a om theih ding hanciamin, gam halhal nawnlo in hile hang, kiim le paam hong nosuak-kik in, huih hong siangtho kik dinga, khua hun hong hoih in, gamsate’ hong innteek kik in, kiim le paam daihna pan lungsim pumpi nopna leh damna lamah hong manawh to kik-kik ding ahi hi. 1 Acre = 2.47 Hectare Tuang Za Khai Ref: 1. D.O. Hall & K.K.Rao, 1994: Photosynthesis (Fifth edition), 2. IPCC, 2019: Climate Change and Land (Special report).