Ka kiginna na neu lai mawk. USA pan hong ciah ka nau Kai Za Mung ka va dawn hi. Yangon pan 24 April 2017 Monday 12:30 PM Myanmar National Airlines tawh direct Kalaymyo ah leng to. Tuksuk kuan ding teh mei tam lua guah tam lua Mandalay ah kileh kik. A nihveina Mandalay pan Kalaymyo lengto kik leuleu. Tunkuan teh mei tam lua. Vanleng kilok deldel. Kia suk duaiduai. Meilumpi bek zing gemgam bangmah kimu lo. Ke-suk ke-suk mual te guamte nehsuk hut-hut.
Vanleng gin khawng hong kidang hiai-hiai. Dipkua pukpuk. Dai dide ki-en giaugiau tek. Thu ngen khikhe. Topa hih meilumte hih huihte hih nuntaknate na khu sungah om hi. Kiging nai keng. Cidam takin inn lum hong tungsakin ci litlit. Vanleng tuangtuang sam napi tutung-a pen ngaihsutna tampi tawh dip hong kua mawk. Tua kawmkal ah vanleng’ tanu te’n na kawng gak uh na kawng gak uh cici ta lai. A sawt loin bang thu hong ging sak lai zen tam maw cih bekbek tawh dip ngek van-a khai hong bang thong.
Bang lo khat hong hi peuhmah leh ut nai kei sing cih le Nihna ah ka innkuanpihte cih bekbek hong kilo-in LST kammal mun nih hong suak den keei mawk hi.
Khatna ah Paul in Filippi 1:21na ah a gen “Ka nuntak leh Khrih ading ka sih leh metzaw lai (For to me to live is Christ and to die is gain)” a cih pen hi. Topa adingin ka kipumpiakna kihawmthawh lai lua ka hih manin Paul bangin sihna tuak-a Khrih tawh maan ding (aneu 23) utzaw ing ka cih ding hong hamsa pian mawk hiau zen hi. Rev Dr. Kam Khua Thang kiging khin lua kisa a kisi nuam lua ta hi a cih khawng ngaihsut pi hong suak zen dih mawk.
Nihna ah Matthai 10:37-39na hi. Ka nu ka pa ka u ka nau ka zi ka ta a cihte mah nambat khat ah omom lai khong. Khrih ading cih thu ah ka kihawmthawhna hong lian semsem. Innkuanpihte tungah lungkimzah ding-a itna lak kisa nai lo cihte le it ding hunte taan nuam nai kei sing ka kici ci. Khrih ading supna sangin cilesa ading zonna a sah mahmah lam ka sungah nial theih lohin hong suaksuak hi.
Hih thute hangin Khrih tawh maitang kituah nading (Readiness) taktak khauhpai nai lo ka hi ve maw ka cici hi.
Ki-ginna a piang sak LST simna; siantho-na hun la-a thu nget zelzel ding le lungdamna thu (the gospel) pen innkuanpihte mah pan pan-a lungkim tak-a nuntakpih a kulna le hun manphate mawkna a bei sak loin Khrih adingin a zang thei ka hih nading Kha tha hong guan Topa’ hong hopihna hi ci-in ka muang hi.
Thungetna hong dawng-in hih bang-a Topa in hong phawksak thute tu-in a nuntak pih thei dingin inn lum lo lum cidamin hong tung sak-a kiginna a thak-a neih hun hong ngah sak kik Topa’ min ka phat hi.
Evan. Suangh Dal
Comment piaknop aomleh...