Bank mai ah mihon omkhawmte kiliau saklo

Bank mai ah mihon omkhawmte kiliau saklo

Social distance cih thu azui lo pawl pen sum kiliau sak in, pawl khat pen thukhenzum ah thu kibawl hi. Ahi zongin bank tuamtuamte mai ah miksi bangin kiphul ziahziah na pi uh a, bangmahmah kilamdang tuan lo hi.

Myanmar gam pen banking lam ah sum tam ngah nai lo in, banking business lam pen gamdang tawh tehna in, kiniam mahmah lai hi.

Tu laitak in leitung bup ah covid19 puul natna tawh a kibuai laitak in, bank ah sum koih/la khia nuamte pen mi (5) ta cihdanin bek in lutsak hi. Tua ahih manin bank pua lam ah, hizahin khuakhal a, ni sa mahmah nuai ah mite kiphul gawp uh hi. Bank sungah mi 5 panin 10 ta cihdanin a lut ding kihal sak a, bank pua ah ahih leh khawlkhawm ngeingai uh hi.

Bank sungah a lut ding pen hidanin ciangtanh in, a lut leh a pusuak kikhel sak ahih manin zekai tuam mahmah hi. Hun kihawm thawh mahmah a, bank hon hun hong khanto dingin a kilam-et laitakin bank hon hun hong khiam zaw bilbel uh hi.

Laibu leh thuthang tuamtuam tungtawnin ka theih pen gamdangte in a bank pawl uh pen Myanmar gam sangin sawt hong zaw uh hi. (Gtn: 8:00 a.m panin 4:00 p.m kikal bank honhun etc). Tua ban ah Saturday zong zingsang lam leh Sinday nitak lam a hong zong om ci hi.

Saturday leh Sunday a hong kei zongin hidanin hun siat laitak in bank hon hun khanto zaw in, asemte zong khasum pia thuah deuh leh lunggulh huai hi. Khuapi-khuata ah mi tampite in volunteer sem ziahziah buang uh ahih teh bank nasemte lakpanin zong volunteer sepna danin asem nuam tampi om ngel dingin um ingh. Phualva Lungtuak Media