Singlamteh: Good Friday leh Easter’ thuzung ~ Rev. Mang Tungg Thang

Singlamteh: Good Friday leh Easter’ thuzung ~ Rev. Mang Tungg Thang

Lai Siangtho bulphuh: Kolose 1:20-Pasian in a Tapa zangin na khempeuh ama kiangah a kaihkik ding a sehsa ahi hi. Tua ahih manin singlamteh tungah a Tapa a sihna hangin amah tawh kilemkik theihna ding hong omsak ahih manin, leitung, vantunga om khempeuh ama kiangah a hong tunkik ahi hi.

Thupatna

Tukum Ningani-pha (Good Friday) leh Thawhkikni (Easter) tawh kisai-a I lungngaih khop dingin Singlamteh thukong teel hi. Singlamteh icih pen thu-um mi khat ciat in ineu lai-a kipan izak/theih ahihi. Ahi zongin tuni-in ‘Nang’ Singlamteh bangci bangin tel na hiam?’ cih kidongh nuam masa hi hang. Leitung mi khempeuh gumkhia dingin Topa Jesuh hong sihna Singlamteh in tuni eite’ tungah bang hong gen nuamin, bang hong laklai ahiam? cih I lungngaih ding ahihi. A beisa hun-a a lipkhaphuai bel Singlamteh tungah Topa Jesuh hong sih manin tu-in mitampi’ pahtak Singlamteh hong suakin leitung tangthu hong lumlet ahihi. Kum simin Good Friday leh Easter Sunday I bawlna ah bangtan phattuamna ngahin man nei a hiam? Singlamteh ii vangliatna nasep lianpi I mumu lai mah hiam?

Tangthu sunga Singlamteh

Tangthu sungah singlamteh pen nam nga in kigen hi: (1) ‘The Greek Cross’ pen ‘The Equilateral Cross’ zong kici-in “+”lim ahihi. Assyria te pasian ‘Anu’ ciaptehna lim ahihi; (2) ‘St. Andrew’s Cross’ pen ‘Crux dessussata’ zongkici-a “Ï” lim hi-in Scotland mi St. Andrew a kibawlsiat lai-a a kithahna ahihi; (3) ‘The Latin Cross’ pen ‘Crux immissa’ kici-a lim hi-in Jesuh hong pai ma-in a kizangh lim khat ahihi; (4) ‘The Handled Cross’ pen ‘the Cross potencee’ zong kici-a pasian khut in a letna lim gen nuam hi; (5) ‘The Gammate Cross’ cih pen Greekte’ laimal gamma li a kilemtuah hi-in, India-te in Swastika a cih Buddha khekhap tawh a kibang ahihi. Tutun Christian cross pen Latin cross tawh a kibang pen ahihi. Singlamteh pen a kiphut suk ahi Pasian leh mihing kizopna (a tunglam=vertical) leh a paiphei ahi mihing leh mihing kizopna (a pheilam=horizontal) a kikilh khawm lim ahihi. Tua hi-in Singlamteh tawh kisai thu tampi om lakah thu li sutsuk ni:

1. Singlamteh pen Mi-ngongtatte’ Kithahna (Execution of the Evils)

Thuciam Lui hun sung Moses hun lai-in migilote sing tungah na khai-in, kithahna-in na zangh uhhi (Gamlak 25:4). Bekthamlo tua a kikhai mi luang pen zan thapai khailo-in phum pah ding ci hi (Thuhilhkik 21:22-23; John 19:31). Tua banah mignalote khuapi pua lamah na that ding uhhi (1Kumpi 21:13) kici hi. Singlamteh tunga kithahna pen a maizumhuai pen leh a siapen thukhen daan piakna ahihi. Tangthu sungah singlamteh tung-a kithahna pen Phoenician mite in a zat masakin kiciamteh hi. Tua panin Greekte, Romte cih bangin hong zangh toto uhhi. Greek tangthu siam Herodotus (485-426BC) in Persia te’n singlamteh tunga thahna pen thukhenna tawh thahna-in zangh cih thu na gen hi. 314 BC pawl-in Alexander in a langpang ulian 30 singlamteh tungah a thahna a kum a kiciamteh masa pawl ahihi.

2. Singlamteh pen Nisim Puakding (Must take Each day)

Thuciam Thak sungah Topa Jesuh in, “Mi khatpeuh ka nungzui a suahnop leh ama deihna bangin gamta nawnloin a singlamteh kisuanin hong zui ding hi” (Mark 8:34) na ci hi. Hih tawh kisai-in ngaihsun lehang Jesuh nungzui a suak nuam mi in Singlamteh pen nisim a phawk ding bek hilo-in puak ngiat dingin na gen hi. I phawk gige ding pen Topa’ tha tawh kipua zo bek ding cih ahihi. Ei mihingte’ tha bek tawh cikmah-a puak zawh ding hingei lo hi. Tua manin nungzui a suak dingte in Jesuh piak, ama hong guat singlamteh nei ciat hi cih a phawkhuai ahihi.

Pawl khat in a genna ah nisim singlamteh pua cih pen nisim Jesuh tawh sihkhopna cih lungsim khat I puak ding a genna ci hi. Thu dang khatin gen lehang tua pen ama cilehsa’ deihloh, gamtat noploh thu/na khat ahihi. Tua pen nusiat theih hilo-in la phuak siampa George Bennard (1873-1958) in, The Old Rugged Cross cih la sungah, ‘Tua singlamteh khahlo lenlen ning, … Kham lukhu ka khekna ni mateng’ a cih pen ahihi.

Tua singlamteh khah suah mawkin, pua kei kha leng Pasian hong gelsak thupha a kipan thaman ding pen in na ngak lo-in a omlo ding hita hi. Tua manin tua singlamteh in kipawl/selpih imuh theihloh tampi nei hi cih hong musak hi. I puak den ding pen Pasian tawh kizopna a bulpi om masa-in tua panin mihingte leh mihing kizopna in a zuih ding, a kikhen theilo thu guipi (principle) ahihi.

3. Singlamteh pen Miphapen Jesuh Kigawhna (Sacrifice of the Holiest)

Pasian ii Tapa ahi Topa Jesuh pen a siangtho pen hi-in a vanglian pen zong ahihna hangin a ninpen (mawhpen) leh a niampen (neupen) cih mun hong lazo bek ahihi. Tua calvary singlamteh tunga kigo teng in na khempeuh a huamkim ahihi – hoihna (Jesuh), siatna, phatna (pha a kisa mihingte), mawhna, gitlohna khempeuh a vekpi-in Jesuh tungah Pasian in a suat tak ciangin a lipkhaphuai, a muhdahhuai pen Jesuh hongsuak-a tua singlamteh tungah a om laitak Pasian in taisan-in, Jesuh tawh mawhna khempeuh Singlamteh tungah a kigo khawm ahihi.

Leitung mawhna khempeuh a puakhia Pasian tuuno ci-in Johan in a gen mah bangin tua bang siatna, natna, gitlohna, mawhna citeng a vekpi lianlua, giklua ahih manin leitung in pua zolo-in hong kiliing gawpin, sun nipi in zong na nung ngatin khua hong mial hi. Hih singlamteh a pua dingin hong pai bek hilo-in a tunga si ding cih Jesuh’ kung hi. Jesuh calvary mual ah mi tampi mai-ah kisaangkhai to-in mi khempeuh, na khempeuh muh dingin singlamteh tung a kikhai ahihi.

Singlamteh tunga Mi phapen Jesuh in mi mawhpen mun hong la-a, a hatpen in a guallelpen, a saangpen in a niampen mun hong lakna ahihi (Fil 2:6-8). Pasian in hih calvary mual tungah sihna, mawhna, gitlohna, natna cihte thatin a go ahihi. Tuate hangin amah a um mite in hotkhiatna a ngah nading ahihi. Roman Emperor Constantine the Great (AD 274-337) in galdo ding a kuan lai-in a mang sungah Singlamteh vaang taang vantung ah mu-a, ‘hih lim tawh zo ding’ cih kammal hangin galzo takpi-a Nipi ni biakpiakna ni-in hong ciamteh hi. Tua hun-a kipan tawl khat sung a Empire ah nopsakna, daihna om a, Christian te’n zong bawlsiatna panin biakna lam suahtakna hong ngah hi. Hih pen Jesuh Singlamteh in lamdang takin leitung tangthu a khelna ahihi. St. Augustine in, ‘Jesuh singlamteh tung ah nang ading a pumpi kibulh zo, tu-in na kha adingin hong kibulh zo lai ding hi’ ci hi.

4. Singlamteh pen Na Khempeuh Kimuhtuahna (Convergence of All)

Leitung-a mihoihpen/migipente, migilopente, leh Pasian’ Tapa Jesuh Calvary mual tungah hong kimutuah ngeingai uhhi. Kolose sunga Paul gen ahi, na khempeuh Calvary mual tunga Singlamteh ah hong kituah-a, tua hun laitak-in ni in zong en zolo-in a vaang hong mial-a, leitung in zong thuak zolo-in hong liing hi. Efesa 2:16 sungah, Singlamteh tungah a sihna tawh Khrih in kilangneihna beisak a, tua Singlamteh hangin minam nihte pawlkhat suahin Pasian kiang a tun’pih hi, ci-in kigelh hi.

Tuni-in thu tuamtuam hanga piang buainate kilem kikna ding, Pasian tawh ahizongin, mipawl leh midang kikal ahizong, mimal kikal ahizongin kilem kikna tua Singlamteh in a sepsa hi-a, singlamteh’ nasep tuni dong igen, isepsep lai ding a kisam ahih lam hong lak toto-in thu hong sutsut lai hi. Tua banah mailam ah zong lak toto lai ding-a, tatsat lo-in gen toto lai ding hi.

Tua calvary mual ah galkapte ahi tei leh namsau tawite, mihonpite, nungzuite, mihoih, misia, mi kiphasak cihte namkimtak-a a kituahna mun ah Satan zong na kihelin, “Pasian Tapa na hih takpi leh Singlamteh tung panin hong kumsuk in”(Mt. 27:40) cisak-a, Jesuh ni sawmli antangin a omlai Dawimangpa in “Pasian’ Tapa na hih takpi leh hih suangte anlum a suahna dingin thu pia in” a cih mah bangin a pau ahihi. Tulai mi tampite hi leh Thu-um mi (Khami) na hih leh ci-in hong kito leh lawptak-a a gamtapah tampi om kha ding hi.

A hizongin Topa Jesuh in lawpna leh mite’ lamdangsak dingin na sem lo-in Pasian deihna a tun nadingin thuak ngiungeu hi. Tua calvary mual tungah Pasian itna, mawhmaisakna (Pa aw, amaute in a sep uh theilo ahih manin a mawhna uh maisak in), thuakzawhna cihte leh alang khatah gitlohna ahi sisan luanga kithahna, mawhlopi mawhsakna cihte na khempeuh tawh a kimutuah liliai uh ahihi. Christian apologist Ravi Zacharias in, “Tangthu sungah, gitlohna, thutang, itna, leh mawhmaisakna hih lite kimuhtuahna Calvary kici mual khat bek om” (There is a hill called Calvary, where evil, justice, love, and forgiveness converged in one place in history). Tua manin a tawpna ah, “Mankhita hi,” (Jn 19:30) cih Jesuh aw hong gingkhia-a, na khempeuh a sep ding zo ahihna a taangko hi-in eite patauh ding thu om nawnlo-in hong khamuang sak hi.

Thu Khupna

Matthai gelhna alian 22 ah, Farisi mite in, Saddusi mite’ thudotna Jesuh in dongkhakin, Saddusi mite in a cihna ding mel uh a theih nawnlohna thu a zak uh ciangin Jesuh kiangah hong pai uhhi. Amau sung panin Thukham hilh sia khat in Jesuh a thangsiahna-in dong a, “Sia aw, thukham khempeuh sung panin bang thukham lianpen ahi hiam?” (22:36). Jesuh in, “Na Topa Pasian na lungsim khempeuh, na nuntakna khempeuh, leh na pilna khempeuh tawh na it ding hi, cihna ahi hi (37, cf. Thuhilhk 6:5). Hih kammal pen Judah biakna ah Thukham sunga Shema a cih lak-a kihel nisim a thungetna uh ahihi.

Hih pen a masapen, a lianpen thukham ahi hi (38). A nihna pen a masa mah tawh kibang a, nangma pumpi na it bangin na vengte na it in, cihna ahi hi (39, cf. Siampi 19:18). Hih thukham nihte tung panin thukham dang khempeuh leh kamsangte’ thuhilhna khempeuh a hong mengkhia ahi hi,”(40). A donghte’ lamet bangin khat bek tawh Jesuh in na dawng lo hi. Banghang cihleh a lianpen a cihteh khat bek a deih uh hi-a, khat bek hileh zuih hak loding ban ah tua tungtawnin Jesuh mawhsak theilai ding uhhi. A neu 37-38 pen Pasian leh mihing kizopna (Itna) hi-a, aneu 39 pen mihingte leh mihing kizopna (ki-itna) ahihi.

Hihte in Singlamteh lim ahi a paisuk (vertical) leh a paiphei (horizontal) in singlamteh a piansak mah bangin thukham lianpen kicingsak zo bek ahihna Jesuh dawnna ahihi. Singlamteh tungah Jesuh tawh I sihkhop leh amah tawh a thokik khawm ding ihihi (Rom 6:5). Singlamteh tunga Jesuh hong Sihna in i mawhna pan hong hotkhiat banah Pasian leh mihingte tawh hong ki-it kiksakin, hong kilemkiksak-a, hong Thawhkik vangliatna tawh amah a sun dingin hong thakbawl den hi (Kol 3:10). Pasian aw, Singlamteh tunga na koih thukham lianpen vanglianin lamdang hi; tua singlamteh a pua zo tawntung dingin tha hong guan inla, na thawhkik vangliatna tha hong dimsak in, na minthanna dingin, Amen. Revd Mang Tungg Thang (Associate Dean,
Myanmar Institute of Theology)