Cingno kiang a laikhak (2) ~ Tg. Kham Khual

Cingno kiang a laikhak (2) ~ Tg. Kham Khual

Lia Cingno aw, Tuni Gamkha ni khat, kum tulnih leh sawm le giat, nitak nai sagih in ka puanhoih pente silh in limlang maiah ka dingding pong hi, koi pen a hoih tam ci in nang tawh a kimu takpi ding bang ka kisa hi, lamdangsa mai ing, a bang ci kai’ tam aw-telsiam keng. Ka khedap deih pen ka it mahmah ka uino in na keisia lailai (dihdih tei aw maw), koi pen bulh zaw ding ka hi tam ci in zong hun peuh ka beisak hi (pasal khat buang ding in zong sawt kithawi tak ei na ci maw?), hun tomno khit teh ka laikung leh gelhlo lai tawh ‘Niangtui leh moh sum buuk’ a kici munah na thelnah ding gelhin na pai ing ( hong muh hi lecin hoih hong sa lua niteh, eh, ka zuau, hoih na hong sa tam hi zaw ei).

Na siang a thelnah tawh ka hong leel tongdam na hong thuh-kik na ngak man nawnlo in, Topa Thupha tawh kawlgam- ah i Zomi pihte kiangah Sianmang tong luan ding in vailo na kuan ning. Tua ahih manin aki zom in nasim ding in hih lai ka hong at leuleu hi, ‘Ka Galdot Zolia’ aw…

Na hong laikhak kik pen ka siang hong tung nailo hi, a nungciang in ka sim theih dingin, ka Tuunu kiang na tung ding hi, tua vai ah na lungkhamloh ding zong ka hong kun nuam hi.

Ka Tuunu in na mu in, na sim kha ding hi, ahizongin tua bel phammoh kei lua mate, Zolia Cingno leh Tg. Thangno buang, nu leh pate hong theipih loh, theihsak ngamloh ding in thusia leh thusim leel lo photphot ding hi ung, na ci ing, na hong thukim zo tam maw?

Kawlgam paiding ka hihlam ka theih phetphet in ka lungsim ah thu tampi hong ki lo hi. Zogam a Sangmang masa pen Carson Topa leh Tonute, Zolai hong bawlsak Cope Topa leh Tonute ka lungsim mitkha-ah hong ki lang uh hi. Amaute in Zolia khat le Tangpa , Zolai toh gamla pek pan laikhak in tong kisang thei, cih bang za kha le uh bang a ngaihsun uh tam maw, Topa Lungdam ung a ci kha ngel uh tam maw…, Sianmang tongdam ki luan lai dep uh e, kici le e, ‘Halleluijah’ a ci uh tam maw.

Carson tonu kham ha(golden tooth) Zomite in muh nop salua in a lawn sak lai,Carson tonu in ‘tuani in Zomite ading in ka ha pen Museum suak hi ‘acih lai bang ka phok liang hi. Tedim khua a i Pi le Pute in Cope Topa a zahkona un “Mang hai” a cih uh ciangin Sangmangpa zong “ ka sangkah lai in a hai pawl ka hi ngei kei hi” a cih ziau zel lai in i Pi le Pute in “Sangkah” cih bang a khiatna takpi a thei uh tam? Tuin Zomite sangkah lo la ki tawm mahmah ta mate, Topa hoih lua sa mai ing.

Zomite pen gal le sa a uk mi, mihing lutang a bengte-gallu mante, phu ki la in sisan a kingen tangtang te, Topa hang in hih ciangtan i tun theih i manghilh khak ding ka laulua hi. Ko kiang ah ka theih ngei innkuan khat om e, tuate pen hun khat lai in hong hau mahmah in zong ni khan viu veumai uh hi, a neih alam uh ki behlap in khang hanhan uh hi.

Ahizong amaute in hong cih thei pian uh teh,ki deih khop in, thupha a pia Pasian manghilh in zu le sa, numei le paai zekna ah hong thu maan nawnlo uh a, tate zong pen donloh kep loh in om in, innkuan tamkham hong suak ziau uh e, tuun le zua kha pham lo buang von sanggah tang ci in ‘ngaih ang lai mah’ a la ki sa bang ka phok vat hi. Tu in amaute i khut mahmah tawh a lamsa innte pen midang in tangta mawk. A piangsa thute pan in i sin theih leh ei tuah kul lo in i pilding hi- i sin thei kei le ki mangthang peelmawh ding hi, Cingno aw.

Sumbuk nei nu in Coffee hong bawl hi, tua coffee pen kam khat ka dawn khit ciang in coffee ahih lam mangnghilh ka hih manin ka lungsim ah, Zolia Cingno in niang hong awm hi leh khum mah ding hi ven maw… cikha liang ing, a khum takpi mah tam maw, ahih kei leh niang zong a tanglote pawl in ka pang khatam, cih lung ngai dide in hun tomno khat ka om hi.

Sia. Hau Za Cin in “ Niangtui tangban pawl ka hi tam, ahih kei leh ‘tuni bawngnawi zong na nei kei ve ung e’ cih pawl ka om zaw tam” a cih bang pian khat na ngaihsun dide ing…Kawlgam a bangtan vei om ding, Visa lo tawh pai ding hilailai kai teh, thong peuh ka va kia khatam ci in zong lungngai ka hih manin, ka hong gen nop hong ki behlap hi. Sau na salua tam ahih kei leh kei gelh peuhpeuh ahih man in sim nuamna sa tam cih khong zong lungsim a om veh e…heee

Cingno aw, Laisiangtho mah nasim tangtang in maw, a ki gelh pua lam ah na pial kei in maw (korin masa 4:6). Khemna tam a, kineih khem zong tam hi. Jesu zong mite in a tuamtuam nei ta uh hi. Che Guvera (singnuaimi minthang) tawh a kisun thau a tawi Jesu peuh, a muk ah zatep a ki tep viuveu Jesu cih bang, a sam tom leh a sam sau, a tha hoih leh a tha neu Jesu cih bang zong omsak in nei uh ahih man in Laisiangtho mah na sim in ‘Laisiangtho Pasian thu Bu ka neih manpha pen’ i Jesu mah na zui in maw. Kisikna (kihei, kikhel na) omlo in mawhmai sakna-forgiveness without repentence cih khong a gen om mawk hi Laisiangtho mah na en in maw ( Luka 24: 47 – “mawhmai sak na ding in kisik na Jesu min in minam khempeuh kiangah ki gen ding hi”).

Kideihkhop in mi neu et in kam a pau, mi thusimlohna leh ciamnuih thanghuaite ngai in- pawlpi mite lungdam in nui zuaizuai ta mawk hi, Peter masa 5:5 : “Pasian in a kiphasak mite nial a, a kiniamkhiat mite a hehpih hi”; Efesa 5:4 : ”A kilawm lo a kampauna, leh ciamnuih hoih lo cihte zong na zang kei un la, Pasian tungah lungdam kohna kam na pau zaw un”. I neih manpha pen Laisiangtho Pasian thu bu mah na len kip in maw, Cingno…

Topa in dam na hong pia hen la, amah it in, ngaih cih tak ngai in nisim Amah tawh na kikholh ding hong deihsak lua ing, Topa tawh nisim kikhawl in kalsuan khangnote enhuai nasa kei maw? Ut huai na sa kei maw? Amaute in mihingte haksat tuahte mah atuak hi napi haksatna omlo hilo a, haksatna ki zo thei ci in I tualsuak late sa in nuihmai thei uh hi ven.

Na thelnah ka siang hong tun ding hun, Zomi lasiam Zam Dal tawh “ kangmei bangsa ka sinlai zaw, thelnah daitui in vawt sak e, sawlbang vulsa ka duangnem zaw thelnah heisa tawh paal khawm e…” ci in ka awih ding hun haibang ngak in Galkhua na daak ing e….. Na thelnah vai hong tun mateng, sunni a tum theilo ding bang e.., Oh, Cingno….. Lennupa ah ka hong na ngaktam? Thaangmual dung ah ‘ honuam zaideih khau bang i sut zaw tam.’

More: Cingno kiang a laikhak (1) ~ Tg. Kham Khual

Zo Taang khat in ka pian buang, Zo la khat hong paih ve ning e, hih kong la paih ding na telsiam kei leh na Zuapa na dong in maw “Meel ka muh loh tongdam naubang naubang sang ing e, lungzuan maimiit sing mawh, taikhua val ing e. Zan khawsawt a maimit si’n mawhna dinng in, ngaih aw na gimsi hong nam, se ei mah e”.

Deihsakna tawh
Tg. Thangno