China, Beijing aom Public Toilet te ah eklai deihzahzah zat kiphallo

China, Beijing aom Public Toilet te ah eklai deihzahzah zat kiphallo

Beijing khuasung aom Public Toilet te ah pawlkhat in eklaiding in akoih Tissue Paper tepen tampipi zialkhiagawp thei uhhi. Tuabang danin Tissue Paper aki laktheihloh nadingin “Facial Recognition Technology” khat kipanthak uh a, eklai utzahzah guktheihloh dingin bawl uh cih South China Morning Post te’n genkhia uhhi.

Beijing khuasung veve lakah “Temple of Heaven” akicihna munpen gamsung gampua panin khualzin Tourists atam phadiakna munkhat ahihi. Tuamun aom Public Toilet te ah dailenbuk zatma in amai ah Tissue Paper lakmasak kulsak uhhi.

Tissue Paper lakding ciangin Tissue Box maiah dinkul a, “Facial Recognition Technology” akithuah ahih manin, maitangbup Scan bawlsak masa hi. Tuakhit ciangin Tissue Paper pen setsung panin paikhia sakpan uhhi.

Tulaitak Setting abawl uhpen mikhat ciangin Tissue Paper asauna 60cm bek ngahsak uhhi. Tuapen Tissue Paper khatvei alakkhitleh Minute 9 sungin aki lakbeh theinawnloding in Setting abawl uh ahihi.

Khualzinmi bekthamlo, tua vengkim vengpam aom te’nzong Tissue Paper pen tampipi zialkhia gawp uh a, inn ah zatkikding in tawi uh cimawk hi. Tuabang in utzahzah laktheihloh dingin Technology pilna tawh akhakcip uh ahihi.

Azenzen in gilsung hoihlo in, sungpai te’n dailenbuk azatkikpah nopleh Customer Service Counter panin Tissue Paper ki ngenkikthei bel cisam uhhi. Hihbang in maitang Scan phot tadih akulsak pen Social Media tungtawn in pawlkhat in diksalo uh a, phun ngeingai uhhi.

Ahi zongin pawlkhat, adiakdiak in piteek puteek pawlkhat in dailenbuk sungah Tissue Paper kikoihleh aomzahzah ciahpihthei uh cimawk hi. Tissue Paper ziallompi khat, Roll khatbang athak akikoih hangin Minute khatsung in beiziauthei ci’n Temple of Heaven nasem te’n genkhia uhhi.

Tuabang in aki gukkhiat ziauziau ciangin anungsang ah deilenbuk azangding tezong cimawhtuam in, nawngkaisak mahmah uh ahih manin, hihbangin Technology tawh guktheihloh dingin akhakcip uhpen hoih asa zong tammahmah hi.

Japan gam leuleu ah Train Station leh Shopping Mall sung aom Public Toilet tepen koimun ah akizanglo, a awng omhiam cih Mobile Phone panin ettheih dingin Technology tawh vaihawm uh cimawk hi.

More: Japan gamah Phone panin dailenbuk a awng zontheihna Service ki panding

Tua Tourists te Zogam hongzinle uh dailenbuk lah tamkuamteng hipheipah a, Tissue Paper ngakngak kullo, ciangkang deihzahzah khiakziauziau theih hiven mate 🙂 Ih khantohzia kikhailua in, khasiat luatman hizaw ei 🙁 ZD Sawltak #zomidaily