2 veina kasuahtaak’ Oprasi ~ Lengtong Pauno

2 veina kasuahtaak’ Oprasi ~ Lengtong Pauno

2003 Limau Manis khuakhung gamlak ahgiak, Putra Jaya construction ah general worker vive, Burma, Chin State pan mihing 400 val kapha uhi. Ko’ buk mihing 10 kapha uhi. Vaikuanna tai 3 gamla a, nai 1 lampaikul ahihmanin, nai 8am lap dingin, nai 7am a kuankhiat kul hi. Zingtho anhuan ding, zingkhatta in kaki laih diamdiam uha, nitak anpen atungmasa peuhin huan hi. Thadah ki zangtheilo hi.

Kei’ thawhding zingsangkhatpen ngapmeello kahihmanin lawmpakhat kiangah azannitakin, “Zingsangteh kei’taangin zing hong thove, nang’ hunteh kei’ hong tho ning” ci in kaki thawhlawmh uhi. Zingthoding peuhin nitakin sunsiahmehding aksa ka kangminkhol uha, zingsangteh ka satsuahziau uhi.

Tuidawn ding zong buhbeelpi in ka huanminkhol uha, akhin’ ciangin 1500ml thawl khatciatding thawl 10 thunsa in akikoihsak sitset ahi hi. Zingsang lawmte’ thawhma nai 6:30 ma a, an le meh thoh 10 tuunsitsetsa a koih, lawmte hongtho maiphiat hanawt kithawi, anthoh leh tuithawl ciat la a, nai 7am a lo kikuan ziahziah ahi hi.

Ka zingthawhding zingsang, keizong zingsang nai 3am a tho, ka lukhungah ka Nokia phone, kanai (watch), Holy Bible nusia in, sungteen’zong teenglo, puanteen’teeng kawmin meitawh, buhhuan nadingtui suangin, phelkhai 2 leh tuikotna ciangtawh tuitawi dingin ka paikhia hi. Damdamin tuidim in, tuiphel 2 kot a ka ciahtoh leh, ko’ buklolam mual tunglampan 10 taangding mi hon’khat hong paisuk damdam mawk hi.

Video: Lengtong Pauno ~ Nimna dildial @ Zomi Nam Ni 2017 Malaysia

https://www.youtube.com/watch?v=7AyI9wu1cFo

Khuavakmama’ a kua hipeuhmah ding ahia? ci in ka ngakbawl hi. Ka gei hongtun’ ciangin Oprasi amapaisakte uh hi, cih tel kahihmanin, ka bukpih lawmte gending a kabuklamah ka paisawm leh hong phallo uha, mualpanglam ah keibek ataidingin paulo phunlo in action tawh hongsawl hi.

Keizong, puanlah silhlo, liangkhaibek tawh, sungteen’ teenglo, kawlpuanteen’bek teeng, sumlah pualo kahihmanin, kapu Lailote’ buk katawn a, anikapuan asum apaaitawh amau tengtawh katai hi. Ka giahna kuam uh ka galet a nai 9am pawlin, ka bukteng uh hal hidi’ ven, meikhu muaimuai hi.

A lorry pi teng uh apaikhiat khitciangin, ko zong kaciah uha, ka buk uh ahal hangin na kaangtum lo hi. Ka Nokia phone leh kanai nala uha, ka Laisiangtho (KKT) pen, na om litlet lai hi. Halelu-jah!!!

Oprasi pan Topa’ hongkepna anihveina hi.

Ka lungdam, Mubkhai’pa