Migilo te Siavuan bangin kizemin zatosung kapgawp, mi 30 si in 50 liam

Migilo te Siavuan bangin kizemin zatosung kapgawp, mi 30 si in 50 liam

Afghanistan, Kabul khuasung aom Military Hospital alianpenpen munah migilo te Siavuan bangdanin kizemin lut uh a, mi phialkapgawp cih AFP leh BBC News pan kiza hi. Wednesday ni in Sardar Daud Khan Hospital ah thupiang hi a, mi 30 kikaplum in adangzong mi 50 liam kici hi.

Hih buaina apiangsak thautawh akapgawp te pen Islamic State (IS) te ii gamtatna hi ci’n amaumah in genkhia uhhi. Zato sungteng apuakkham agingtawh, thaukikap agingtawh, meikhuzong vandawn ah khuto ngengngang hi.

Hospital Staff khatin migilo te’n abuluhlam atheih ciangin amah ii Facebook tungah laigelh a, “Thautawi migilo te zato sungah honglut uhhi. Thu hong ngetsak un” ci’n suahkhia hi.

Local Television te’nzong Video Footage pawlkhat suakkhiasak uh a, Hospital atungdawn lamah mipawlkhat awkcip uh cihi.

Hospital Administrators te genkhiatna ah hih zato sungah migilo te alut laitak in Laboratory Coats puankang silh uh a, thautawi mi 3 lutmasa cihi. Suicide Bomber khatzong kihel a, anunglam Entrance kongkhak geiah ki puakkhamsak cihi.

Hospital Nurse khat ahi Abdul Qadeer ii genna ah AK-47 thau atawikhat Doctor bangkek in kizem a, inndawl 3 na ah cina leh Guards te kapgawp cimawk hi. Ka lawmte thautawh kapgawp in, keipen ka suaktathei bilbel cihi.

Kumpi galkapte zong Helicopter tawh Hospital atungdawn ah kumsuk uh a, tawlpikhat akikapkap khit uh ciangin migilo te 4 kaplumthei uh cihi.

President Ashraf Ghani in agenna ah hih Sardar Daud Khan Hospital pen lupna 400 apha zato hi a, hihbang in zato sung akapgawp uhpen Afghanistan gambuk hong bawlsiatna uhhi ci’n genkhia hi.

2016 July khasung inzong hih Kabul khuasung mahah Suicide Bomb khat puakkham a, mi 80 takin sihlawh hi.

Tuazawh khathum khitciang in Ashura Religious Festival ah kikapna piangin mi 30 in sihlawh hi. 2016 November khasungin Kabul aom Mosque khatah kikapna piangleuleu in mi 30 mahin sihlawh leuleu hi.

Kabul’s Supreme Court sung ahzong nungkhasung in IS te’n Suicide Bomb puakkhamsak leuleu uh a, mi 22 in sihlawh hi.

Hih IS te gamtatna zong sinkhelvai mahmahsam veh aw mate, athukkik zoloding cina in zato alum te thautawh vakapgawp cihbang zawzen….. ZD Sawltak #zomidaily