Mawh maisakna thupha ~ Sia Do Khup

Mawh maisakna thupha ~ Sia Do Khup

MAWH MAISAKNA THUPHA

“Mi’ khialhna a maisakte midangte in itin lawm hau uh a, mi’ khialhna ciaptehna pen lawm taanna ahi hi.” PAUNAK 17:9 TDB

MAISAKNA KHIT TEH HAU DING

“Job in a lawm thumte a’ ding thu a ngetsak khit ciangin, Topa in Job citheisakkik a, nidanga a neih ngeizah nihin neihsa lamsa a guan hi.” JOB 42:10 TDB

“Kote tungah a hong mawhte mawh maisakna ka neih bangun ko’ mawhna zong hong maisak in.” MATTHAI 6:12 TDB

MI’ MAWHNA ZONGTE SATAN

“Bang hang hiam cih leh a sun a zanin eite’ Pasian’ mai-ah dingin i sanggamte mawhsakna a gen tawntungpa, tu-in vantung panin kilawnkhia khinta hi.” MAANGMUHNA 12:10 TDB

PASIAN’ MI NAHIH MAN HIZAW

“Topa in maang hong musak a, Topa’ vantungmi mai-ah siampi lianpen pa Joshua’ mawhna a zong dingin a kiangah Satan zong a om ka mu hi.” ZEKHARIAH 3:1 TDB

“Mi a mudahte bek in zuauthu gen a, mi a gensiate mihai ahi hi.” PAUNAK 10:18 TDB

MAWHSAKNA TAM THUPHA TAM

Josef numei tawh a kidaisak khit teh kumpi innsung tung zo pan. Mordekai minsiat nading bekbek a kizon khit teh zakhang, galveng zo pan. Shadrak, Meshak, Abednego meiphual sung a kidenna vial leh Pasian tawh kinai semsem zaw.

NANG HAMPHA ZAW

Bangmah sem lo a, mi’ sepsa teng gensia den keei nahih sangin nasepna na lawhcinna hong haza a ha gawigawi a om pen hoihzaw hi.

NANG SANGA LAWHCINGZAWTE

Nang sang a lawhcingzawte thuhilhna mang inla, bangmah sem lote thuhilhna, ngaihsut piakna mang kha kei in. Mang kha zui kha lecin amah bangin mi lawhcing lo na suak ding hi.

NANG PEN NANG BEKMAH HITEH

Pasian in nang ding nih leh thum bawl lo a, nang bekbek mah hong neih tiuteu nahih manin na manphatna, na pammaihna phawk inla, ama na bek sem in, na nung lam a Satan bel heh lua-in a ha gawi guapguap den ding hi.

“Migilo in hih thu mu-in a heh suak mahmah a, a ha gawigawi-in a tuimang hi. Migilote’ lametna a mawkna a suakta hi.” ‭‭Late‬ ‭112:10‬ ‭TDB‬‬

Topa in thupha hong pia kim ciat ta hen. Evan. Langh Do Khup (Khuata mipa)