I Pasian hoih hi ~ Dong Mung

I Pasian hoih hi ~ Dong Mung

I Pasian pen eite aa dingin ahoih Pasian hi-a, eite siatna ding geelna a nei ngeilo Pasian ahi hi. I tungah dahna, kahna, lungkham mangbatna le khasiat muisiatna hong piang phial zongin eite aa ding ahoih tawntung Pasian hi-a, thupha thuapnih hong pia nuamzaw Pasian ahi hi. Job nuntakna pan tha la ni!

I Pasian pen a hoih Pasian ahi hi. I nuntakna ah hanciam mahmah napi i hanciam bangin ma i tutloh ciang lungkia thanem lamet bei in i om zongin eite aa ding ahoihpen geelna a nei Pasian hi. Joseph nuntakna pan tha la ni.

I Pasian pen ahoih Pasian ahi hi. I itpen, i ngaihpente’n hong nusia in hong paisan in, hong taisan hun ciang zong ama’n hong nusia ngeilo a, hong ompih tawntung ahoih a citak Pasian ahi hi. Samaritan numeinu nuntakna pan tha la ni.

I Pasian pen ahoih Pasian ahi hi. Mite’n hong simmawh, hong zahko, hong mawhsak, hong langpan hunin eilam ah hong pangin i mawhnate hong maisak den Pasian ahi hi. Pasal tawh a mawh lai manin suang tawh detlup a sawm uh numeinu nuntakna pan tha la ni.

Abraham Pasian zong eima Pasian hi-a, Abraham thupha apiak bangin hong pia thei Pasian ahi hi.

Solomon Pasian zong eima Pasian hi-a, Solomon pilna a piak bangin hong pia thei Pasian ahi hi.

Joshua Pasian zong emai Pasian hi-a, Joshua gualzawhna a piak bangin hong pia thei Pasian ahi hi.

Peter Pasian zong eima Pasian hi-a, Peter a zat bangin hong zang thei Pasian ahi hi.

Pawlu Pasian zong eima Pasian hi-a, Pawlu a zat bangin hong zang thei Pasian ahi hi.

DL Moody, Charles Spurgeon, Billy Graham, Yonggi Cho-te leh Pasian mizat minthang tampite Pasian’ zong eima Pasian ahih manin amaute bangin hong zang thei lua, hong lamsang thei lua Pasian ahi hi.

I Pasian hoih hi…Umkhial muang khial kei ni. Ama deihna bang a sem dingin hong teltuam eite aa dingin na khempeuh ahoihlam in piangsak hi. I PASIAN HOIH HI – Dong Mung