Pa ~ Dr. Hau Za Cin

Pa kinei ciat hi. Pa kisam ciat hi hang. Nu leh pa sung pan a pianglo mihing omlo a, piancil huna i pianna vantunga Pa zong i pa mah ahi hi. Amah bel pa khempeuhte Pa ahih manin ama mun kuamah in khek theilo, luah theilo hi.

A khangto ding khempeuh in pa kisam hi. Pa hoih neite in khantohna kicing nei uh hi. Tapa hoih a kici tampi pen a pa na hoih ahih manin a tapa in etteh ding pa hoih na nei hi.

Zomi Nurse te makaihna tawh Zangkong ah cidamna lam thusinna, adiak in numeite ading kinei ding cih ka zak ciang Zomi Nurse te pen Zomi numei te adingin ‘pa’ dinmun a luah, pa tavuan a semkhia hi in ka ngaihsun hi. Pa dinmun hi ka cihna ahang in makaihna, pattahna, sinsakna, laptohna nasep sem ahih man hi. Nu dinmun hileh itna laka zuun, huai, kem, khoi hi ding hi. Hih mun ah Zomi Nurse te pen numei leh cidamna thusinna ah akihel khempeuh adingin Pa dinmun a luah uh hi.

ZOFA CUP ah Zomi Football Association te in kimawlna makaih ahih manin leitunga kimawlna siangtho leh etnop pen football ah Zomi te adingin ZOFA in pa dinmun la in na hong sem uh, hong pattah uh ahi hi. Zomi Siamsin te in Zomi te mailam ding ngaihsutna tawh thumuh ding, thu theih ding, ngaihsut kholh ding cihte a kikup uh, Seminar nei a a ngaihsutna uh a genkhop, a kupkhop uh ciang Zomi te mailam adingin pa dinmun ah om in pa tavuan hong semkhia uh ahi hi. Zomi politician te in (e.g. ZNC) Zomi te politics ah mailam khantohna ding leh maban gelkholh dingte a ngaihsutkhop, gelna nei a policy tuamtuam a gel kholh uh ciang politics lam ah Zomi te adingin pa dinmun ah tu in pa nasep tavuan hong semkhia uh ahi hi.

Gamdang tung tampi te pen inn lamah a omlai innkuanpihte, khua leh tui te, gam leh nam adingin kingakna leh makaihna hoih a pia thei pa dinmun ah a ding ahi hi. Thumuhna zaizaw, khuadakna zaizaw, pilna siamna sinna khangto zaw cih bang ahih leh inn lam ah tuate puak in hilh in pia sawn lehang inn lama omte adingin pa dinmun ah a ding cihna hi ding hi. Gentehna in Zomi Engineers te bang Korea, Singapore, USA, etc gam pan inn lam ciah in i khualzin pak, i hawh pak sung bek in zong gamdangah i nasep dan, mite nasep dan cihte gen in pulak in thusinna, Seminar and Consultation cih bang neihpih leng inn lama omte adingin pa dinmun ah a kiding hiding cihna hi. Tua mah bangin khuapi zaw ah a omte in khuata ah i zin ciang, i ciah ciang, i pai ciangin i muh i phawk, i theihte genpih, genpih, hilhsawn, pia sawn lehang amaute adingin pa dinmun ah aki ding cihna hi ding hi.

USA pan khua lam na ciah pak ciang inn lam a omte adingin a phatuam hun zatpih inla, amaute adingin mitvakna leh thu theihna a behlap leh a pattah pa dinmun ah va dingin. Japan pan na ciah ciang, Korea pan na ciah ciang, Singapore pan na ciah ciang, Malaysia pan na ciah ciang… nangma sepna lam, na siamna lam, na theihna lam tua bangin va hawmsawn in; tua pen pa dinmun ah na dinna khat ahi hi. Mite in phattuampih dinga, meetna leh hamphatna ngah ding uh hi.

Nurse na hih leh gamdanga nurse sep dan, engineer na hih leh gamdanga engineer sep dan, cihte hilh in genpih kuppih, theisak, hanthawn in hawmsawn lecin inn lamte in na phattuampih ding hi. Tua manin nangma nuntakna tungtawn in mite in hamphatna a ngah theih ding leh kidek hetlo, kisial hetlo in semkhia in.

Mite adingin pa dinmun ah a ding theite mi hampha khat in ka tuat hi. Banghang hiam cih leh mite in amah mangngilhlo in phawk ding uh a, ama gen kammal khat a phattuampihte in zong phawk den ding uh hi.

Na nuntakna leh na theih, na pil, na siamna te midangte ading ‘thupha’ hita hen.

Hau Za Cin
Phuitong Liim