Athupi mahmah Vantung Thungetna

Athupi Mahmah Vantung Thungetna

Vantung thungetna ih cih (The Lord’s Prayer) pen biakna pawlpi ki deidanna omlo in Pasian’ thuzui Pasian a um khempeuh in ih zat khat ahi hi.

Hih Vantung Thungetna lungngai in tawm tha lakhawm ni e maw.

1. Vantunga om kote’ Pa aw, na min siangtho kizahtak hen.

Pasian phatna leh pahtawina tawh kipan lianmawk hi. Leitung ah apahtak huai, apahtawi huai leh aphat huai na tampi a om phial zong in tuateng khempeuh sang in Pasian mah pahtawi huai leh phathuai masapen zaw hi.

2. Na gam hong piang ta hen

Pasian in hih leitung ah tapa khat bek aneih sun ahi Zeisu piakkhiatna tawh agam aphut ahi hi. Zeisu honpa leh gumpa in na san kei leh na nuntakna ah Pasian’ Gam apiang nailo ahi hi. Pasian’ Gam apianna ding leh tua gammi na hih theihna ding in Zeisu Khazih pen honpa leh tanhpa in na san kul hi.

3. Vantung ah na deihna akicin mah bangin leitungah zong kicingta hen.

Topa Zeisu pen honpa leh gumpa in ih san khit ciang in Ama’ deihna bang a gamtat luhek kullai hi. Ama’ deihna ih zuih ciang bek in vantung ah Pasian’ deihna akicin mah bang in ei’ tung ah kicing theipan ding hi.

4. Nisim khamkhop ding an hong pia in.

Kha thu ah huaiham theih omlo hi. Israel te sehnel gam ah apai lai un Pasian in a an ding uh vantung pan in Manna moh khiat hi. Tua Manna moh pen nikhat ai bek kila thei hi. Tua kan ih lak leh muat in ki nethei tuanlo hi. Tua mah bang in kha an pen nisim nekdet kul hi. Khat vei nek a kum 10 kimang cih bang om theilo hi. ( Vantung pan a akia Manna pen Van innnuam pan a hong kumsuk Zeisu’ lim lahna zong hi)

5. Kote tungah a hong mawhte ka maisak mah bangun ko’ mawhna zong hong maisak in.

“Na vawh bang in na at ding hi” acih pen hih lai mun ah zong kimang pah hi. Mi’ mawhna maisak zolopi a ei’ mawhna hong kimaisak ding lam et ding hilo hi. “Leitung a na khihte vantung ah zong kikhih ding” ci hi. Nang hong kimaisak ding na ut leh mi na maisak masak ding; mi na hehpih masak photphot ding cihna hi.

6. Ze-etna lian hong thuaksak ke’n. Gilopa’ kiang pan hong honkhia in

Pasian tawh ih tonkhop det a amah tawh hoih tak ih kilawmtak det kei leh satan in hong balzan nuam a hong gem den ahi hi. Ze-etnate kantan zawhna ding pen Pasian’ kiang pan a hong pai kha tha bek tawh ki kantanzo ding hi. Satan’ khutsung pan hong gumkhiazo pen Pasian bek mah ahi hi.

7. Ukzawhna, vangliatna, minthanna, nei tawntung ta in. Amen.

Phatna tawh akipat mah bang in phatna mahtawh tawp hi. Pasian’ Min bangzah ta in phat huai hiam cih hong phawksak hi.

Atom thei pen ding a kong gelh hi. Na sim kawmkawm in Khasiangtho’ lawnna ngahngiat inla thathak na ngah ngiat ta in. Amen !

Note’ itna sung ah
Mung Laan Thang
Zangkong