ZAM Thupuak
ZAM :: Zomi Association of Malaysia
Lungdamkoh Ni (Thanksgiving Day)
Lungdamkoh Ni (Thanksgiving Day) pen USA gamah zumkhak (Holiday) minthang mahmah te lakah khat ahi hi. Ngeina, zatdan in cileng pen hi ni-in American te innkuan ki muhkhop ni, ankuang umkhop ni-in zangin, Turkey (Vatawt namkhat cimai ni eipau in) pen a an/meh bulpi khat hi. A tangthu ong piakkhiat na ahang ensuk ni.
Kuate in hih Lungdamkoh Ni bawl (celebrate) masa hiam cih leh, England gam a biakna hang a bawlsiat na thuak, galtai (the Pilgrims) te hi. 1609 kumin (a group of pilgrim) te in biakna suahtakna dingin, England panin taikhia in Holland gam zuanin pemta in om uh hi. Kum tawmkhat khit ciangin a naupangte un Dutch pau leh ngeina zia leh tong, dante sin/zui-in ong om uh ciangin, Dutch te in amau ngeina thupi simsaklo in, amau zialehtong a tate uh a sinsak ciangin, hih pen hoihlo, deihlo uh ahih manin Holland pan taikhiat ding ong sawmuh hi. Tua ahih manin, gamthak (New World) zuatding ong khensat uh a, hih a khualzinna ding uh pen Mangkang sumbawl pawlkhat in ameetlak a sum leitawi dingin, ki thukim in, amau tua sumbawl te adingin, kum 7 sung nasepsak ding ci-in ong ki thukim uh hi.
6 Sept,1620 tak ciangin Mayflower Tembaw tawh New world (USA) zuan dingin, ong zinkhia ta uh hi. Plymouth, England pan mi 44, amau leh amau misiangthote (Siants) a kici leh midang 66 (Strangers) a ci aa asap uh tuateng ong zinkhia uh hi. A khuazinna lampi uh pen votmahmah leh lauhuaina tam mahmah, haksa mahmah ahih manin ni 65 sungtak ong sawt hi. Bekthamlo in, a Tembaw uh pen singtawh kibawl ahih manin, akaat ding lauhuai mahmah leh a an nek ding uh pen votmahmah ta leh tuamah a nek uh ong kul mawk hi. Leitang cih amuh ni November 10 ni-in tua kualzin mite cina mangin mikhat ong sipah hi.
Khualzinna hun saulua mahmah leh amau (Saints leh Strangers) kikal ah ki thukim lohna, ki thu tuahlohna ong omta lailai hi. Leitang amuh khit uh teh ki muhkhopna khat ong nei uh a, a ki thu tuahlohna, a ki thu kimlohna teng uh ong ki kumkhawm in ong lemtang kik uh hi. Tua ki muhkhopna pen “Mayflower Compact” cikhat, sakhat cihna hi-in, khat le khat kikim, kibang hihang ci-in ong ki thukim uh in, Saints leh Strangers cih te om nawnlo in ” the Pilgrims” ong kici ta uh hi.
Cape Cod ki cihna mun ong tungmasa uh hi. Ahi zongin, Plymouth, atun masiah uh, tengsuak nailo uh hi. Hih Plymouth pen a Captain John Smith in 1614 amin vawh hi. Hih Plymouth ki cihna munpen munhoih mahmah leh gamhoih mahmah hi-in luite luangin ngasa tam mahmah na mun zong ahi hi. The Pilgrim te lung himawh penpen a hihleh tualmi te Native American Indians te simgawp khak ding hi pipen hi. Aihhang, amau na tuacilo bilbel in limtakin, na zindo bilbel zaw uh hi.
Phalbi (winter) votlua mahmah ahih manin cina in tampi in sihlawh uh hi. England pan a zinkhia mi 110 lak pan 50 bek nungta lai uh hi. March 16, 1621 ni ciangin thupi mahmah thukhat ongpiang hi. Tua in banghiam cih leh Indian mihangsan te Plymouth ah vapai uh a, Pilgrim te in nalau mahmah uh a, lawmte’n welcome a na cih bilbel ciangun, alau nateng uh bei hi.
Samoset, Abnaki leh Squanto te in mangpau tawmtawm nathei in Pilgrim te khuasak ziading, khaici ciin dan ding teng limtak in hilh uh hi. Bang lopa, sing kungte gui (poison) bang, bang te nek dingin hoih hiamcih te leh khauhun zui aa khaici ciin dingte limtak hilh ahih manin, Squanto’ huhna omlo in pilgrimte nungta zolo ding hi ci uh hi.
Anlak nasep teng October kha in zo in, an, singteh/gah, sa leh ngasa pen Phalbi sung khamkhop mahmah ding ong kaikhawm thei in lungdam mahmah uh hi. Innkhawng ong lam in, aveng, apamte tawh nuamtakin ong tengkhawmin nuamsa mahmah leh pawi khawng ong kham ziahziah ta uh hi.
Pilgrim te Governor William Bradford in Lungdamkoh Ni pen Colonists te leh Native American te tawh zangkhawm, nekhawm dingin ong tangko khia hi. Squanto leh adang Indian te zong amau tawh kipawl khawm dingin sam uh a, a hausa pa cidiam aw Massasoit leh adang mihangsan 90 te in pilgrim te tawh Lungdamkoh Ni na khamkhawm in hih hun pen ni 3 sung sawt hi. Kimawlna tuamtuam, tai kidem, drum tumna cih bang in kimawl uh hi. Indian te in amau siamna thalkap khawng lakin, pilgrim te in amau siamna thaukap khawng lak uh hi. Hih ni pen tuani lian hi cih bel kitheilo himahta leh October kha kimkhen sungteng hi ding hi cih ki ummawh hi.
A kumkik ciang pilgrim te an ong haulo, a khawh,a vulh uh ong lawhcinglo in, ong giautau mahmah kik uh hi. Tua bangin ong om uh ciangin, a neizaw deuh te in, annei nawnlo te hawmin a neih bangbang uh ong neikhawm uh hi.
A kum 3 na khal ciangin ni ongsa mahmah in khaici teng ong vulmang mawk hi. Governor Bradford in antang thunget ding hanthawn in a sawtlo in guah ong zuu pah mawk hi. Tua ciangin lungdam lua in, November 29 ni pen Lungdamkoh Ni dingin ong tangko kia uh hi. Hih ni pen tuhun, Lungdamkoh Ni ki patkhiat ni taktak hi ci’n ki um hi.
1817 kumin New York state in Lungdamkoh Ni ong zangta uh hi. 19th century tak ciangin state dang te’n zong ong zangta uh hi. 1863 kum tak teh President Abraham Lincoln in “National day of Thanksgiving Day” dingin ong ciamteh hi. Tua aki panin US President khempeuh in ong tangko leh ong zangtoto in, November Fourth Thursday nita zumkhak (Holiday) dingin ong kipsak uh hi.
Lungdamkoh Ni “Thanksgiving Day” pen ei aa dingin cileng i Khuado tawh kibang mahmah mai cih ding hi. Pasian’ tungah lungdamkohna leh itna ankuang umkhopna hun/ni himai hi. Tukum Lungdamkoh Ni na bang cizat sawm hiam? Laisim mimal kim Topa’n thupha ong piata hen.
Happy Thanksgiving Day
Thang Suan Piang UAS (Former ZEC-Talalla)
Source : ESL Thanksgiving Tradition
Theihding: Global Zomi Alliance President Rev. Dr. S. Pau Khan En hong vaikhak mah bangin Malaysia aom Zomi ahi theih zahin zong Global Zomi Alliance Ni & Leitungbup Zomi te Lungdamkoh Ni aki bawl ahi hi.
United States Ngeina le Dan Thusinna Khutzat Laibu : ZOMI (Azom)
America Gam Tunna
American gamah vanleng atuk ciangin khualzin midangte tawh vanleng tungpan kum khawm ding hi. Vanleng tungpan nakumma in na vante sit inla na kiangah koih in. IOM nasem te in hongmu ding uh a gampeem te sittelna (Immigration) thunei te kiang hong paipih ding uh hi.
Tua gampeem mite sittelna ah nang America ah thuman a alut na hihna zum na semte in na I-94 card ciaptehna hong khensat ding hi. Na ngah ding I-94 card pen lai thupi te lakah khat ahi hi. Hoihtak in kem in. Tua khit ciang khualzin kipat a vanleng tual a na ap 23 kilogram a gik na ip gol na thoh kik ding hi. Tua khit phiangsiah zum (customs) ah kumpi phalloh van leh nate pua maw pualo cih na van hongvel sak ding uh hi. Tua vante pen mihing in ahi zongin, a gim tawh athei siam ui, lim a ki langsak setvan daatmaan (scanners) sette zangin sit ding uh hi. Tua ahih manin puak ding aki phallo van peuh mah sim puak ding hanciam kei in. Theih ding khat ah a zenzen in puakding a kiphallo van zongin amuh uh leh $250 hong gaam ding uh hi. (OR) Anung thu haksa mahmah na thuak ding hi. Hih bang sep khakna te in nai tampi sawtsak thei ahih lam thei in.
Khualzin tawpna (America inn thak ah)
Galtai atam zaw America gam lutna vanleng tual a tun khit uh ciang khuapi tuamtuam ah khat vei vanleng tuan kikkul ding hi. Tua vai tawh kisai in IOM nasem te in vanleng khat vei tuankik ding leh gamsung vanleng letmat na ngahna dingin hong vai hawmpih ding hi. IOM pan a kibawl galtai card ngawngawh zong IOM na sem te in hongpia ding hi (Innkuan khat ah mi khat). Tua card sungah IOM phone nambat leh a kitang sam thu leh la te kihel hi. Tua card pen saphuuklai ip sung kikoih na khual zin hun sung khempeuh ngawng a awh ding ahi hi. Tua saphuklai ip sungah na dang bang mah guang ken. A zenzen in na khualzin lai nading ah haksatna na tuah khak leh na ngawngawh card a phone nambat leh a thu leh la te tungtawn in van lengtual nasem, palik, thu kizakna phualte a laisim thei peuh mah in IOM nasemte tawh kizopna hong bawlsak na ding huhna kingen thei hi. Tua khit ciangin IOM na semte in na ki tangsap huh nate hong vaihawmsak thei ding uh hi.
Na khualzin tawpna ding ah na paina dingin kilogram 23 a gik na ip te khat vei ap kik ding hi. Vanleng tuankikna dingin hun saupi ngakkha ding hi. A zenzen in hunsawt ngak kha ding na hih leh IOM nasemte in annekna ding card hongpia kha thei dinga, tua letmat tawh vanleng tual sungah an man piak kullo in kine thei hi. Na phawk ding khat in gamsung khualzinna ah an khawnkhong ki hawmlo hi. Hih na man lak card omlo in vanleng tual sungah lutkik ding haksatna om thei ahih manin na khualzin tawpna ding mun natunma in vanleng tual pualam ah pusuak khavet kei in.
America gam sung a na manawhna khualzin tawpna ding mun natun na dingin a nih veina van leng khek in tuangkik kha thei ding hi. A zenzen in tua bang ahih khak leh hong huh ding IOM nasemte na om nawnlo ding hi. Vanleng tual nasem te tungah huhna nget ding kihta kei in. Vanleng tual a nai hoihtak en in hun kilam dan na teltak in ciamteh in. Vanleng tual khat natun simin a diakdiak in na tuankik ding vanleng i a hun/nai kantel huai hi. Vanleng tung ahunlap a tunding thupi hi.
Na manawhna khualzin tawpna dingmun ah teenna ding mun thak vai hawmsakna kipawlna panin tangmi (or) lawm leh gual (or) meltheihte tanau te in nang hongdawn ding uh hi. Awlno tak a hong kitheihna dingin na IOM ip leh ngawngawh card a kilang thei thei dingin koih in.
Angtanpihna
America gamsunga na innthak ah tun na tungta hi.
Zopzop lai ding…
Tukal Palaai te buaipih diak teng
Suan Sian Lian (Kapteel), Kam Sian Khual (Kaptel), Tual Khup (Kapteel) te Shah Alam lockup ah a ki buaipih laitak.
Thian Lian Khai (Taakkhawl) Damansara palik zum ah a ki buaipih laitak.
En Muan thang (Zozaang) Ampang pan a kiman pen Phone pan hopihna tawh hong suakta pah thei.
Kam Lian Kham, Kuata Baru thongah ki buaipih.
Kam Sian Kham (Suangzang) Jinjang lockup ah kibuaipih hi.
Dal Kop Mung (Sawbua), Sian Lian Sung (Sawbua), Khup San Muan (Sawbua) Kajang thongah kiveh thei.
Kham Khen Pau (Tuitawh) 24-25 November in HKL zatopi ah ki buaipih.
Dim San Mang (Heilei) 26 November ni-in Cheras Clinic ah ki buaipih.
Kam Sian Muang (Pyidawta) 27 November ni-in Cheras Clinic ah kibuai pih.
UNHCR-CDU makaihna tawh makaihna tawh kisai thusinna
UNHCR-CDU makaihna tawh kumsim a kibawlden,“Makaihna kisai thusina”/11/2014 ni in UNHCR hall ah kinei hi. Malaysia gamsung a om Zomi te omna a vengveng pan makai pawlkhat leh Zomi zumpi panin mimal 12 kihel thei a, namdang te sangin tam alut thei penpen ih hihi.thusinna ah adiakin midangte tawh kizopna (Communication) cih bulphuh in thusinna hong nei sak uhhi. Tua hi a, hih makai thusinna thu te tawh kisai in nomau Pawlpi, nomau veng ciat ah hopsawn kik ding lunggulhna a om leh Pawlpi min (or) vengmin in Zomi zumpi nong zaksak uh leh hong kipai in hop sawnna hong kinei kik ding hi. Tua pen UNHCR-CDU te lunggulhna zong ahi hi.
HEI te in gambel mite lungsim noptuam na neihpih
Ei gambel mite hong lung hihmawh pih den kipawlna khat ahi, HEI te makaihna tawh Gambel mite sungah thanem, lungkia lametna a beisuah nupi, tagah naupang te adingin lungsim noptuam na leh lam-et na hoih apiangsak thei “kineih siamte kineihna “Movie” hoih mahmah te Golden Screen Cinema–Midvilley Mega Mall ah 22/11/2014 ni-in hong kineih pih aa tua mun ah Zomi zumpi min tawh mimal 16 hong paipih thei uhhi. Hi bang Cinema lianpipi te ah eima sum tawh kipai ding hi leh kipai zolo ahiphial zongin sum tampi bei a hong deihsak HEI te tungah zong ki lungdam mahmah hi.
Lungdampihna
ZAM paninLamthang in UNHCR leh Harvest sangte vaihawmna tawh a kibawl Teachers’ Training Course hong zo a, 21 November 2014 in Harvest sangpi panin gualzawhna laidalpi hong ngah thei ahih manin ki lungdampih mahmah hi.
Nausuakna lai ladingte theih ding
Nupa nauno nei nausuakna lai (Birth Certificate) la ding peuhmah in na zi te uh bek paisaklo in nang (a pasal) ngiat in napaipih kei leh na nausuahna lai tungah nang min hong kihel kei leh na ta uh pen zawlta in hong ki ciapteh sak ding a, a nu UN ngah nailo ahih leh zong nanau uh UN hong piaksaklo ding uh hi. Abawl bek silo in apian khit zawh ciang zong vai khempeuh nasep tohtoh hong kullai ding hi.
Zomi Cup 2015 min sazian piakna kikhak ding hita
Zomi Cup 2015 khua min tawh kimawl ding team khempeuh sazian pen November 30 nitak nai 5pm ciang dong kisang lai ding hi.
Zomi Cup 2015 kihel ding sazian pia khua khempeuh in December 1 ni ZAM hall ah nai 1pm in kimuh khopna kinei ding ahih manin Team khat pan a tawmpen makai khatta nong kihel kimciat nading un kong zasak uh hi.
KLIA Camp ah December 10 ni thong kiate kiveh ding
December 10 ni ciangin Zomi thongkia KLIA camp a omte kiveh ding ahih manin KLIA camp a meltheih thongkia anei te’n vaikhaknop, sum khaknop na neih uh leh amin leh body numbat ZAM zumpi ah hong pia un.
Numei te cidamna velcianna “Women’s Health Screening” ki neiding
UNHCR–IAD Department pan vaihawmna tawh hongtungding 30 November 2014 ni in Tzu Chi Clinic ah numei cidamna velcianna ciding hiam“Womens’ Health Screening” kinei dinghi.
OG Specialists te ngiat in numei te cidamna hong velcian sakding a, Family Planning tawh kisai thuhilhna zong hong neihpihding uhhi.
A lunglut Zomi numei khempeuh ki paithei hi cih kong zasaksawn uhhi.
Amun : Tzu Chi Clinic
Ani : 30 November 2014
Ahun : 9am–1pm
Numei te cidamna tawh kisai OG Specialists Doctor te ngiat in hilhcianna hong nei ding ahih manin, Zomi numei te atam theithei apaitheih nading in tha piaciat ni.
ZEC-Talalla & Maharajalela Sangtuak
pawi lungdamkohna nuamtak kizo
2014 kum khat sung tawntung hong gualzawhpih Pasian tung lungdamkohna leh pahtawina tuam-tuam ZAM Hall pi ah November 24, 2014 (Monday) ni zingsang nai 10 pan sun nai khat ciang nopci takin kibawl a Sia/sianu (gammi & Zomi), nulepa leh sangnaupang kigawm mipi 150 kiim kipha in ZAM hall kidim zihziah hi. Mipi khempeuh Sang panin Mohhenkha tawh kivak hi. Pawi hun sungah kum khat sung lai hong hilhsak sia/sianu khempeuh leh sponsor te tung Pahtawina Laipi kipia a, Laivuanna ah laitan zui a khatna, nihna, thumna ngah sang naupangte leh etteh taak cing pen sang naupang ZEC-T lah ZEC-M pan numei 1 leh pasal 1 tuak, Late 23 manglai a lotgen kidemna a khatna, nihna thumna ngahte Pattawina laipi leh letsong tuam-tuam piakna kinei hi.
ZEC Talalla & Maharajalela min in abuai khempeuh tungah lungdam kongko uh hi. ZEC nasepna tha ong pia a, hong huh hong panpih, thu hong ngetsak a kua mapeuh tung Tung Pasian in thupha azah tampi in hong thukkik sakta hen. ZEC-T&M
ZEC-Cheras Lukhuneelkai piakna leh Sangkhak pawi nuamtak kizo
November 26 ni-in ZEC-Cheras siamsin naupangte Lukhuneelkai piakna leh sangkhak pawi nopci takin ki bawl thei hi. Pawi hun sungah kum khat sung lai hong hilhsak sia/sianu khempeuh, PTA te, Lengla zahtakte leh sponsor te tung Pahtawina kipia a, Laivuanna ah laitan zui a khatna, nihna, thumna ngah sang naupangte leh etteh taak cing pen sang naupang ZEC-Cheras pan numei 1 leh pasal 1 tuak pahtawina kipia hi.
ZAM pan dahpihna
Haiciin khuami, Munsuangh beh Pu Gin Thuam leh Pi Khup Khua Dim te’ tapa,PaTuang Khen Thang (Kum 47)pen Pahang State, Raub khua a nasepna munah zan zun thakna mun panin tukin, a it mahmah a zi, a tate leh pianpih sanggamte nusia in leitung nuntak haksatna panin tawlngakna gamah hong ciahsan ta hi. Khuavak ciangin a lawmte in lawmpa om loh lam a phawk ciangun zong uh a, zun thakna munah lawmpa na bei khin ta hi. Sanggampa luang hantan theih nangin vai khempeuh a kizawh khitteh 25/11/2014 ni-in Khua makaite, meltheih tanau te, Pawlpi te leh ZAM zumpi panin ahi theizah kikuan aa, Raub khua Hanmual ah Pa Thang’ luanghawm vuina kinei thei hi. Pa Thang tungtang ah adah akap lungzuang khuangai khempeuh tawh kibangin Zomi zumpi panin ih dah khawm hi. Topa’ hehnepna in adah akap khempeuh tungah hong tung kimta hen.
Lungdam kohna
Paan Khup (Sakollam) RM50, Gin Khan Mung (Ngalbual) RM50, Kam Lem Thang (Tuimang) RM50 leh Suan Cin (Buanli) A4 laidaal 900 cih bangin tukal Thupuak bawlna ding piakkhiatna hong nei uh ahih manin ki lungdam mahmah hi.
December 5 ni UNHCR zum kikhak ding
Hong tungding December 5 ni UNHCR zumpi kikhak ding a ZAM zum kikhak tuanlo ding hi.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: zomiassociationmls@gmail.com
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...