Leitung pasal khempeuh lakah akumtam penpen in akiciamteh Japan papikhat sita (kum 113)
Leitungbup pasal khempeuh lakah akum atampenpen in aciamteh ahi Japan papikhat sita cih CNN te’n pulakkhia uhhi. Tua leitung ah akum atampenpen in akiciamtehpa ii aminpen Masazo Nonaka kici a, ama ii akum phazah pen kum 113 ahihi.
Masazo Nonaka pen 2018 April khasung in Guinness World Records te’n leitung ah anungtalai pasal khempeuh lakpanin akum atampenpen hi ci’n apulakkhiat uh ahihi. Ahi zongin Masazo Nonaka pen Sunday ni in sita hi ci’n Japanese Public Service Broadcaster NHK te’n genkhia uhhi.
Masazo Nonaka pen Japan gamsung aom tuikulhkhat ahi Hokkaido Island khua ah apiang, ateeng hi a, 25 July 1905 kumin asuak ahihi.
Masazo Nonaka pen Sunday ni in a innkuanpih te’n anak nawnlo in aomlam mukhia uhhi. Tuaciang in amazat Doctor kizasak in, tua Doctor inzong Masazo Nonaka pen sita hi ci’n gencianna neikhia hi. Masazo Nonaka pen Saturday ni in bangmah cinailo, acidamlai hi a, ahi zongin Sunday ni ciangin nakzo nawnlo in asiziau ahihi.
Masazo Nonaka pen abeisa April 2018 kumin Guiness World Records te’n leitung ah pasal anungtalai lakpan akum atam penpen in ciaptehna apiak uh hi a, tuahun laitak in amahpen kum 112 leh ni 259 aphaklaitak in pahtawina apiak uh ahihi.
Masazo Nonaka pen kumtampi bangci danin nungtahiam cihtawh kisai in amahpen nasep akhawlzawh Retirement khitciang in nisim in Newspaper simzel, Sweets leh Cakes khawng nezel, TV enzel, SUMO Wrestling cihte enzel cihbangin ahun beisak in nungta hi ci’n Guinness World Records te’n genkhia uhhi.
More: Japan gamsung misipuah kidemna kibawl in numei khatin akhatna ngah
Abeisa in leitungbup pasal khempeuh lakpan in akum atampenpen in akiciamteh pen Jiroemon Kimura hi a, amahpen kum 116 leh ni 54 nungta hi. Tuapa pen abeisa June 2013 kumin hong nusiakhin a, tuakhitzawh Masazo Nonaka pen leitung pasal khempeuh lakpan in akum atampenpen in akiciamteh ahihi. Sawltak #zomidaily
Comment piaknop aomleh...