Playmaker – Zomite playmaker kisam

Playmaker – Zomite playmaker kisam

Bawlung a kisuih ciang team khatpeuhpeuh ah a team ading in playmaker khat kisam den hi. Playmaker a semthei ding a omkei phial leh zong manager (or) coach in playmaker ding khat peuhmah pantah tawm, kisinsak tawm phial leh a teambup i teamwork pen tua playmaker panmun a zatsiamna in tampi bawlhoih thei ahi hi.

Gentehna in, Real Madrid FC pen a siam mahmah vive, Ronaldo, Marcelo, Ramos, Pepe, Bale, Benzema… cihte Real Madrid top player bek hilo Leitung bup a top playerte ahi hi. Ahih hang playmaker hih hi cih omlian taktak phalo mawk a, a kituah uh ciang hoih mahmah in, kituak diamdiam kha kei leh vaikuang hetlo thei zel hi.

Playmaker pa pen ama’ siamna bek hilo in, a kimawlpih a teampihte in playmaker, a team ii a centre a a koih siam uh leh amau khatciat ii munlak ana siamdan in thu tam sai peuhmah hi. Ahi zong in, playmakerpa in a teampihte’n amah a bawlung pia-tah ci in, aman hawmkhia, piakhia, pass nawnlo in amah bek in goal khupsawm zel leh hithei lo, zo ngeilo ding hi. Playmaker in a lawmte goal khupna ding a anoplian tak a apiak theih ding kisam mahmah zel hi.

Teamwork kisam kimawlna bek hilo, nasepna khempeuh ah playmaker a omding leh tua playmaker in vai, nasep, panmun a zeek ahawm siam ding kisam mahmah hi. Na khempeuh, thu khempeuh ama’ kiang kitun ding deih napi, a zeekkhiat, a hawmkhiat a siam kei leh tua team pen a mimal khatciat siamna zah tawh kituak in mazang ngeilo hi. Goal khumlo, gualzo lo hi. Real Madrid team bang in siam mahmah napi playmaker a om mello team leh pilthei mahmah siamthei mahmah napi playmaker a om mello mapanna ii maban kibang hi.

Khatveivei playmaker pen asiampen ahatpen cihbang zong hikhin khollo lel hi. Playmaker a tamzawte alai ah kimawl a, amai leh anung pha kawikawi in a teambup i tha leh siamna kizom dimdiam sak hi.

Zomi team zong i game kimawlna ah playmaker kisam peuhmah hihang. Field sung tung khempeuh playmaker i ut mawk leh mimal in bangzahtak i pil a i siam hang a kilawm zah in gualzawhna ngahlo ding hihang.

I maban enkawm in playmaker neihzia ding khuadak hun mahmah ta hi. Playmaker neihsiam in, opening lak siamding hanciam ni. Pau Khat Suan