Amau cih amau vai hiven

Amau cih amau vai hiven

Amaute’n nang hong muh ciang, nang sunga om hihtheihna le thahatnate mulo uh ahih manin hong hawmthawh in hong gensia kha ding uh hi. Khasiat lak ken… Amau cih amau vai hiven…

Nang bel nang sunga om hihtheihna, thahatnate zangin mailam ah gualzawh lawhcinna a ngah ding mi khat naive… Banghang khasia mawk ding….

Amaute’n hong muh ciang, khialhna pan pilna kisin ahihlam theilo uh ahih manin a beisa na khialhkhakna, na siamloh khaknate siksan in hong zahko, hong engbawl kha ding hi. Khasiat lak ken… Amau cih amau vai hiven…

Nang na hihleh a beisa na khialhna, na siamlohnate pan pilna tampi sinin, picinna in na nei a, mailam ah a gualzo a lawhcing dingin a kithawithawi na hizaw hi.

Amaute’n hong muh ciangin gina hong salo, citak hong salo, hau hong salo, nei hong salo in hong nawlkhin kha ding uh hi. Khasiat lak kha ken! Amau cih amau vai hiven…

Mihing hihna tawh ginat zawhlohna, vai tuamtuam hangin cihtak zawhlohna le ei ut thu hilo a i dinmun in hau nailo ihih manin thanem ding hilo hi. Ahi zongin ginat zawhlohna, cihtak zawhlohna, zawnna pan hauhna lam manawh in a gualzo a lawhcing mi khat ahi dingin a hanciam na hi hi.

Amaute’n bangzah takin hong telsiam loin, hong langbawl phial zongin khasia lua ken…

Amaute’n bangzah takin hong nawlkhin in hong pampaih zongin khasia lua ken…

Amaute’n bangzah takin hong simmawh in hong neumuh zongin khasia lua ken…

• Amaute’n hong muhpih loh,
• Amaute’n hong theihpih loh,
• Amaute’b hong phawkpih loh…
• Hihtheihna,
• Siamna,
• Pilna,
• Thahatna,
• Lungsim hangsanna,
• Lungkiatlohna,
• Ahoihlam ngaihsutna
• A nungta Pasian muannate

Nang sungah om gige hi.

Tua hi-a, khasiat luat ding hilo hi. Amau cih amau vai hiven…amau ei thupitna mulo hiven…
Ei mi mawkmawk hilo, mi thupi khat…

Hanciam, thasan, mainawt, lungkia lo… Pasian tawh kalsuan khawm… Gualzawh lawhcinna ei ading hi….

Lungdam
Dong Mung