Zomi Innkuan USA
Executive Committee
Dahna Pulakna: Mangpha Andrew Nang Lian Tuang
New York State, Buffalo khuapi a teng, Zogam pan Haupi/Thangkhal khuami, Kawlpi khua a khangkhia, Gualnam suan, Tg. Andrew Nang Lian Tuang (Nautuang) in Oct. 27, 2014 ni in a ten’na inn phualzang panin lam-etlohpi in a leitung nuntakna hong nusia hi. Andrew Nautuang in hong nusiat laitak in kum (26) phapan a, khangno tangvallai khat ahih manin, na kisa mahmah in kidah mahmah hi. Tuaban ah, Kawlpi a teng a nu leh pa ahi, Pa Nang Lam Tuang leh Nu Kham Lian Cing-te’n tapa nih a neih sung pan tapa upa pen hi a, nutha patha dawn ding a kithawipan ahih manin, kikhasia phadiak hi.
Tg. Andrew Nang Lian Tuang hong nusiat manin adah akap a om, a nu a pa, a sanggam pa leh Maryland State sung a om a nite innkuan a 
kipan a meeltheih tanaute, a khua a tui leh a pawlpi mipihte, leh Zomi Innkuan Buffalo kipawlna tawh a kibang in Zomi Innkuan USA Executive Committee pawlzong kidah mahmah hi.
Andrew Nautuang pen US gam ah ahong peemtak zawh kum (3) khawngbek cingpan a, a khangto gam a nuntak khuasak zia a kisinsan laitak in abawlpa Pasian in a hun tungsak ahih manin a beidan anuam in inn phualzang pan hong nusia hiding in kihehnem hi. Andrew Nautuang hong nusiat manin ZIUSA kipawlna in dahna lahna in Paakkual tawh mangpha kikhak ding hi. Andrew Nau Tuang tawh hun nunung pen Nov. 01, 2014 (Saturday) ni in RC Pawlpi ngeina tawh kibawl ding a, hanmual ah kikha ding hi.
Tg. Andrew Nang Lian Tuang hong nusiatna hangin adah akap lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante kalsuan in, thupha tawh thathak ahong guatkikna dingin thu ka ngen uhhi.
Dahna tawh;
Executive Committee
Zomi Innkuan USA, Inc.
Tulsa, OK
October 30, 2014
Comment piaknop aomleh...