Leitung ah akumtam penpen in akiciamteh Sumatran Orang Utan zawngkuhpi sita (kum 62)

Leitung ah akumtam penpen in akiciamteh Sumatran Orang Utan zawngkuhpi sita (kum 62)

Leitungbup ah akumtam penpen in akiciamteh “World’s Oldest” zawngkuhpi khat sita hi ci’n AFP News te’n pulakkhia uhhi. Tua zawngkuhpi pen kum 62 phakhinta a, anuntaksung in amasungpiang ta 11 nei a, tuate sungpanin akizom suaksuak tusawn tasawn 54 nei kici hi.

Tua zawngkuhpi pen Sumatran Orang Utan zawngnamte hi a, ahi zongin Australia gamsung aom Perth khuapi ah akikhawi ahihi. Aminpen “Puan” kici a, nupi zahtakte akisapna “Lady” cihtawh akibang ahihi.

Tua zawngkuhpi Puan pen Monday ni in akikepna, aki khawina Perth Zoo sungah asi ahihi ci’n Australian Zoo Officials te’n genkhia uhhi. Hih zawngkuhpi pen Malaysia te’n 1968 kumin Australia te letsong “Gift” in apiak uh ahihi.

Hih zawngkuhpi in Perth Zoo adingin amanpha mahmah ganhingkhat hi a, tu leh ta tampitak nusia in hong sihsan hi ci’n Primate Supervisor Holly Thompson in genkhia hi.

Tua zawngkuhpi in ta 11 nei in, tusawn tasawn 54 aneihte pen United States, Europe, Australasia, Sumatra cih leitung gamtuamtuam ah kithehzak in kikem kawikawi hi.

More: Japan puteek kum 112 apha khinkhat leitung ah pasal kumtampen in ki ciamteh

Puan kici zawngkuhpi pen 1956 kumin asuak hi a, Guinness Book of Records te’nzong leitung ah anungta Sumatran Orang Utan lakah akum atampenpen in ciaptehna apiak uh ahihi. Ataktak in Orang Utan anu tepen kum 50 val anuntakding hamsa mahmah himahleh, hih Puan kici zawngkuhpi pen kum 62 tak nungta hi.

Tulaitak Perth Zoo ganhing khawina sungah Puan kici zawngkuhpi ii atanu 2, atu 4 leh atusawn 1 nusia in asi ahihi. Sawltak #zomidaily