Zomi Kip ~ Cin Lian Khai

Zomi Kip ~ Cin Lian Khai

Dear Zomi, 2014 a, Milip simna ah 914 Zomi ci-in ih gelh pen na hoih mahmah hi. Kawlgam tangthu ah Zomi a kip hita hi. Nungmah in milip simna pen aman takin hong suaksak ngamloh uh ahang hong gen khinzo uh hi. Milip kisim khit phet Pu Cin Sian Thang leh UNFPI thusaite kihona zong “Zomi pen Minam khat in cing hi, hong lungdam pih ungh, ahizong in ahang khat om in, Milip kisimna pen a code zui in hong suak paklo ding hi”.

Hihthu pen anih veina Zosuan Tuailai khawmpi ah zong gen ingh. Zosuan Tuailai khawmpi pan 914 Zomi result out nang ngen ni acih uh ciang, ngen kei ni, hihbang thu omhi ci ingh. Pu Hang Khan Lian in “ih lunggulh pen ahihman in ngen veve ni ” ci hi.

Pu Kam Lian, Milip kisimna vai tawh 2015 in, Naypaytaw pan hong ciah in, hihthu hong gen leuleu hi. “17 Century lai in, Kawlgam ah nasem ding hong pai, Pati minam te tamlua mahmah in, nidang in anna tawh ki kalsuan ahihman in, amau Kawl ah amin uh khum uh hi. Amau bek hilo Mon, Zakhai, Kayin, Dawei etc ten Kawl ah amin uh khum uh hi.

Ei nangawn zong tampi in hong khen uh hi, ahihhang 2014 Milip kisim pen suahtatak in Ih Minam ciat ah kigelh thei ahihman in, mikhempeuh a Innpi vuah ciahkik uh hi. Ei zong Zomi ah aki khum thei pan suak hi. Immigration Minister pan 914 te na lungkham kei un ci-in hong gen ci hi. Tua laitak in 914 a khum mitampi tak ka om khop lai uh hi” ci hi.

Shan Gam tukum nihvei ka paina ah, anihveina ah tuahpha kisa ingh. Ka zaknop mahmah thu zakha ing. Politician, ko bel Ko Ye Min Paing ci ungh. “Ko Zomi aw, nobel Chin State ah Lu leh Liang (Head and Shoulder) hi uh teh, CNF te bang kimu le ungh, ko Laimi hi ungh ci uh hi. Ahihhang Milip simna ah Laimi ci-in khumlo ahihman un Kum 30 angak kul uh hi.

Zomite nashia mahmah uh teh, Zomi Party lah gualzo, Milip kisimna ah Zomi ah khum, ZRO/A E in zong bangbang hileh NCA laphot unla, tuapan galkap leh van kaikhawm un, ko Kayin ten zong tua bangmah in ahih hi ungh. Milip kisimna ah Zomi cih nagelh uh pen Zomi akip cihna hi. A lem hun khat ciang, hong ki tangko ding hi. Result ngak in, lunggim kei un, milip simna ah Zomi akigelh nak leh cikmah hun in kikhel theilo hi” ci in thu mantak hong gen hi.

Zomi Mainawt Ni!

Lungdam
Cin Lian Khai (Zogamkhaino)
Ka khualzinna Singgam pan ka mipihte hong gal hopih ingh