ZYA le ZCRC zinna Report ~ Lian Tuang

ZYA le ZCRC zinna Report ~ Lian Tuang

1) Tedim zato vai, mei vai, tui vaite tawh kisai gam makaipite kamciamsa tuamtuamte amanlang theithei in ong taksuak zawh nadingin khat vei tawsawn kik ding

2) COVID-19 vai ah Cikha siavuan/mahte, kumpi nasemte, khangnote le mipi mahmah in bit takin ma a pan manin tuni ciang dong India lam pan natna ong kizel lo banah amaute thasanna hangin Zogam bek hilo Myanma gambup nangawn abit sak ahi hi kici thei hi. Hih zah a thupi nasemte agim atawlte va hopihin va kimuhpih limlim ding

3) Amaute nasepna a thupit zia mipi theih ding le amau mahmah in kitel semsem in a angtan semsem na dingin hanciam dih ni cih ngiahsutna tawh Cikha pai ding kigel hi. Mawtaw nih tawh mi 9 kipai hi.

Tedim le Tonzang ah hun zatna

29/8/20 9:00 am ZYA Hq Kawlpi pan kidingkhia hi. 12:00pm in Tedim tungin ZYA Tedim in zingan ong vak hi.

1:15 pm in TYF zum ah Tedim CSO makaite tawh COVID-19 hun sung nasepna le mailam kalsuanzia ding kamkupna kinei hi.

3:30-4:30 pm sung IPRD Tedim zum ah Chin Resourse Centre ( CRC ) le IPRD mapan khopna tawh a tolhkik (second wave) COVID-19 ading cih thulu tawh kamkupna kinei hi.

Tua hun sungah Tedim Siavuanpi pa,Tedim AD, TYF GS le ZCRC pan President kihel hi. Hih hun sungah ICU vai, zatopi vai, tui vai, mei vai te COVID-19 tawh kizomin nakpi in kigen hi. Live zong kikhah hi.

Tua khit ciangin siavuanpi pa makaihna tawh zatopi ah kihawh hi. Positive kikemte vehna le thungetsakna zong kinei thei hi. 6:00 pm in Tonzang ah kipaito hi.

8:30-11:00 pm in ZYA Tongzang, ZYA Tuitum, ZYA Tungtuang te tawh ZYA Tonzang Secretary Pu pu Thang innpi ah COVID-19 vai, ZYA mailam kalsuanzia ding vai kamkupna thupi takin kinei hi. Pu pu Thang inn ah nuam takin kitawlnga hi.

Cikha hun zatna

30/8/20 (6:00 AM) Tonzang pan dingkhia in Mualkawi khua ZYA phual ah kiallap kizang in makaite tawh holimna kinei thei hi. 10:00 AM in Cikha kitung hi.

Zingan nek khit phet in ZOLAWKTA hall ah khua sung makaite le Cikha kim a ZYA makaite, Cikha siavuanpipa le Cikha Myo-uk pa kimuh khopna kinei hi.

ZCRC panin COVID-19 vai ah hangsan tak le citak takin amapang Cikha a om a kuama peuh tungah zahtakna thupitak kigen a, FQ ading van kisamte piakna kinei hi.

Siavuanpipa le Myo-uk pa in amau nasepzia a hanciamzia a thasanzia le a hamsatziate banah mailam kalsuanzia ding cih thu tampi suakta takin gen ziahziah in nuam kisa mahmah hi.

Tua khit ciangin siavuanpipa le Cikha Myo-uk pa, ZYA Cikha makaipipa, zoto siamahpinu le ZRCR pan President tawh Cikha IPRD zum ah kamkupna khat kinei leuleu hi.

News tuamtuamah akizang thei dingin vedio record lim tak kibawl a asawt loin ong kikhah ding hi. Chin Resourse Centre ( CRC ), IPRD Cikha le ZCRC mapan khopna khat mah ahi hi.

Tua hun sungmah in Zolawkta hall ah ZYA mailam kalsuanzia kikupna nakpi takin kinei hi.

4:00 PM in Cikha pan ciah kik in Tuikhiang ah Tuikhiang Khua upa le ZYA te tawh kimu in nitak an kizang khawm hi. Tuikhiang pan meide in kipai suk hi. Kawlpi zankim (12:00 ) in kitung kik hi.

Lungdam kohna

I gelna bangin lem toto ahih manin I Pa Pasian tungah i lungdam mahmah hi. Khualzinna ding in sun an ong guan Pu Pau Lun ( Minister ) le Pu Vum Nang tungah lungdam mahmah hi.

Khualzinna ding mawtaw phal takin ong zang sak U Gopu le ZYA makaite tungah lungdam mahmah hi.

Cikha a piakding van kisam khempeuh ong piakhai U Gopu le U khupboih tungah lungdam mahmah hi.

Ama inn ah khualum le tawldam takin zin ong tung sak ZYA Tonzang Secretary Pu pu Thang tungah lungdam mahmah hi.

An ong vak 1) ZYA Tedim 2) ZYA Tonzang 3)ZYA Cikha 4) ZYA Tuikhiang 5) ZYA Mualkawi te tungah lungdam mahmah hi. Pa Liantuang (President, Zomi COVID-19 Response Committee (ZCRC) August 31, 2020