Kum 18 na phakkhitleh

Kum 18 na phakkhitleh

1. Ihmut ciimtak in ihmu in: Nitak luphakluat leh zingsang ni sankhit ciangin thopan cihte nusia ta in. Nai 8 sung ihmut sawm den in. Zan 11 ma limlim in lum in.

2. Cidamna thupi ngaihsut in: Zingsang thobaih in lamsiau, khatguak a hiaa, lawmte tawh a hizong lamsiau in. Annek ki deklua kei inla tamlua zong ne kei in. A thaulua lo, a ngawnglua lo dingin kikem in.

3. A hoihlam in ngaihsun in: Na khatpeuhpeuh a hoihlam in ngaihsutsiam ding kisin in. Mi dang mawhsak kei inla phunphun kei in. A hoihlo nate enen kei inla a hoihlo nate semnawn kei in. ‘A hang’ theih ding hanciam in.

4. Zingan ne hamtang in: Anhuan manlo a hizong, nasep tamlua a hizong zingan nelo in omkei in. Na huan mankei, na nekman kei phial lehzong tuilum leh moh beek ne hamtangin. Moh leisa in koihkhol pah in.

5. Thaza ne in: Khatveivei ciangin nekledawn in hong thadim sak zo nawnlo thei hi. Nasep na gim mahmah hun, na lungzin hun ciangin vitamim A,B,D cihbang a hizong ne in. Siavuan te tawh kikum in.

6. Khualzin khia in: Nangguak zin in. Na lawmte tawh zin in. Pawlpi pan, sangpan paina a omleh zong zui in. Mundangah na sum na beisak sangin khualzinna dingin khol in. Ki lungnumsak inla midangte nuntakzia theihpih sawm in.

7. Om mawkmawk kei in: Ka neulai hite phamawh kei e, ka sepsep hi na cihte tuabangin sem nawn kei in. Kum 18 phakhin na hihmanin a thukzaw, a tangzai zaw in sep sawm in. Na nuntakna a mannei dingin gel kipan in.

8. Na puansilh kilamdangsak in: Kum 18 na phakleh na puansilh zong kam a pau hita hi. Inn ah na ompih puantawh pawilak ah vak kei inla mite muhna ah a etlawm dingin silhleten ki puahsiam in.

9. Na innsung siangsak in: Na neulai a bangin ci nin, puannin leh buan peuhtawh ki mawlnawn kei in. Tuabek hilo in na omna na innkhan sung siangsak sitset in. A hoihlote hemkhia in paihding a kisam te paikhia lel in.

10. Sin in: Anhuan, puansawp cihte na nu leh na sanggam te bekbek semsak kei inla sin kipan in. Pasal na hiaa numei na hizong siamna si in. Pau sin in. Tintan te kah inla pilna zong in. Banghanghiamcihleh nang naupang hilo in kum 18 phakhin ta hi vecin. Siamsin Library