Tuunnu’ Itna ~ David Tuang
Ka neu lai-in, ka nu pen zingsang nai 4/5 pawl in tho den in, lam nawl khat ah, mehteh mehgah zuak in tu den ahih lam ka phawkkikkik hi. A vanzuak te zong ko neihsa sum tawh lei-in a zuakkik hilo a, mi’ kiangah batlak phot in, a met nengneng teng a lawhtaak zel bek ahi hi. Zingtung, a van zuak khit ciang, inn ah hong ciah in zing an hong huan a, annek khit ciangin nitha nasepna khawngah sum thalawh in va kuan kawikawi hi.
Sunsiah gina zong pua zo ngei lo pimah in sun thapaii na va sem zel a, khatveivei ciang bangin nitak khuamial khit lam ciangin inn hong tungkik pan zel hi. Ka nu zingsang tho baih den in, sun thapaii na va sem den kawmkal-ah an lim tui lim zong ne zolo lai ahih manin tha leh ngal zong neizo nawn loin hong gawng phinphian ta a, a thahatna zong hong kiam semsem hi. Himah ta leh, hibang pipi mah tawh kei hong khual manin ama nisim nasep ngei teng mah hong sem toto in hun leh ni te hong beitoto hi.
Ka kum, kum(6)hong cing ta ahih manin ka nu in boih aw, bangmah i neih loh zenzen hangin na khangual te na bat zawh nadingin sang va kah in la pilna va sin in, ci-in hong sawl hi. Kei zong ka nu’ hong sawlna bangin sang ka va kah hi. Sangkah cih pen mihau(sum leh paii nei-in, a ut bangbang a silh zo, a teeng zo) te adingin noptuak napi-in, ei…mite’ silh leh teen bang zong silh zolo, teeng zo loin, nisim in i silh i teen khat bekmah a silh den, a teeng dente’ adingin bel sangkah khawng nuam hetlo hi.
Tua bangin nuam i sak hetloh kawmkal-ah mizawng daipamte ci-in lawm leh gualte’ kona leh simmawh, pampaihnate nisim in ka thuak den hi. Sang a, hong ki bawl dan teng a nop loh zia leh thuak hak kasakziate, inn ah ka nu kiangah ka gen zel a, boih aw, lungkia thanem peuhmah kei in, ka meh teh meh gah zuakte hoihtak khawng thei-in ka nitha nasepnate hong hoih semsem ciang na kisapnate leh na lunggulhte hong leisak ning na sang lai bekmah hanciam in, ci-in kanu in tha hong pia den hi.
Hi bang haksatna tuamtuam teng kantan in tan khat khit tan khat ka zo toto a, tan sawm ciang dong kazo to hi. Ka nu pen a kum zong tamta himah ta leh kei ading a ngaihsutna bekbek tawh gimpi tawlpi-in tha saan tentan in tansawm ka zawh dong mah ama nasep ngei teng sem in, hong khoi hong vaak toto a, hi ciang dinmun gualzawhna dongah hong tunpih zo mawk hi. Kei adingin ka nu pen galhang pen khat leh galzopen khat in ka ciamteh hi.
Tan sawm ka zawh khit ciangin ka nu gim lua mahmah ta, sa ka hih manin, na sep zon ding ka kipan a, kumpi nasep khat ngah in khasum sang thei dinmun ka tung ta hi. Ka nu in nidang bangin na sem zo nawn lo ahih manin keimah in kem in khoi in ka vaak a, ama’ lunggulh khat peuhpeuh ka hihsak zawh nading hanciam in ka hih zawh zahin ka kep/khoi nate ka nu in hong muh ciangin, a mit panin lungdamna khitui taakkhia kelhkelh zel hi.
Ka nu vaak thei ding ciang dinmun ka tun ciangin, ka nu teek lua mahmah ta ahih manin, ka vaak hun ding, ka kep, ka khoi hun ding leh ama adingin na khatpeuhpeuh kasepsak hun ding hong toi lua mahmah ta ahih manin ka kisik hun hong tun ma, ka nu’ ading ka sep/hih man lai ahih khak leh ci-in ka nu’ tungah thupha bawl in ama lungkim theihtheih nadingin ka hanciam den hi. Ka nu in ahih leh a gil sungah hong paii tungg a kipan tuni ciang dong hong gimpih/tawlpih nate pen kei ii hihzawhna maimai te tawh tehtheih, tehzawh ding hi deklo hi.
Kei ka hih leh ka hih zawh zah val kantan in ka hihsak zo ngei kei a, ka nu in ahih leh ahih zawh zah val kantan in, guhtui kangzo zah dongin hong kep, hong vaaknate ka lungngaihkik ciangin, sim lei tungah tehpih theih ding a omlo, tung Siammang’ itna tawh teh kim theih ding itna pen, “TUUNNU’ ITNA” bekmah hi, cih tel takin ka mu khia hi.
“A hun om lai-in, na Nu’ hong itnate thupha tawh thukkik in la, na Nu’ khasiat theih nading sem kha, bawl kha, pau kha kei in. Na Nu’ lungkim, lungdam nading semin bawl in la, na Nu’ tungah thupha dawh siam in. Na Nu’ ading thasial kha kei in la, na Nu’ itna thusim loin om kha kei in. Na Nu’ hong itna bang itna hih simlei tungah omlo a, na Nu’ thuakzah in nang adingin (gimna, tawlna leh gentheih haksatnate) hong thuaksak simlei tungah kuamah dang om peuhmah lo hi.”
Tuunnu’ itna a telcian thei dingin laisim mimal kim Topa’n thupha hong pia hen la, nu khempeuh tungah cidamna leh khansauna om ta hen. Amen .
Ngaihsutna kiukhat pan,
Taangthu gelh ✍️ David Tuang
Comment piaknop aomleh...