Zomi Nam Ni 2017 etkikna ~ Rev. Thang Van Lian

Zomi Nam Ni 2017 etkikna ~ Rev. Thang Van Lian

Kum 69 Cinna Zomi Nam Ni pen gamsung gampua ah kibawl kawikawi hi. Khuahun zui-in a kibawl theih loh hun tampi na om ngei a, ahi zongin tua kawmkal pan tukum ciang Zomi Nam Ni pen kum 69 a cing ta ahi hi.

Myanmar, Thailand, India, Malaysia, US, Australia, Europe cih bang leitung gam 30 val a akitheh thang Zomite khuamuhna zai semsemin minam veina mel kithei toto ta ahih manin amau’ hih theihna ciat ah gam leh minam vai limlim pan theihna bangbang hanciam toto ta uh hi. Tulai takin gam 14 ah Zomi Innkuan Kipawlna (LZI) a akizom Zomi Innkuan 65 om khin ta hi. USA gamsung bekbek ah zong Zomi Innkuan 49 gina takin ding khin, cih Pu Go Sawm Khup, General Secretary, ZIUSA in gen hi.

Tukum Zomi Nam Ni zong Zomi Innkuan khempeuh in amau’ omna ciatah nuamtak bawl thei ciat uh, cih kiza hi. Puanzakpi tungah Zomi National Day, ci-in Chin cih kammal zang loin kibawl kawikawi zaw ta ahi hi. Gamsungah zong Kawllai ahi a, Manglai ahi zongin Chin ci loin Zomi mah tawh kizang kawikawi ta hi. Tedim khuapi ah zong Kawllai tawh Chin, Zolai tawh ZOMI, ci-in kigelh ta hi. Hih pen mi’ hong piak tawm min CHIN hi lo, ZOMI min mah i minam min aman pen hi, a citilteel diakte zat dan hi diak phot lai hi. Mindat khuapi ah zong amau’ lai tawh “K’Cho” ci-in suang veva uh hi!

Tua bangmah in Chin National Day, ci-in Hakha leh Nay Pyi Taw khuapite ah tulaitak a kumpite tawh maingal suakta takin kibawl kawikawi a, amakaipite zong Zomite mah na hi kawikawi ahih manin Zomite kicing kawikawi hi, kici hi. Pawlkhat in a siat lak mah bangin pawlkhat in hoih lak bilbel uh hi. ZOMI min a zangte in sanggam dangte langpan nopna tawh abawl uh hi zenzen lo a, eima hihna a dinpih hi hang, ci-in gen uh hi. Chin min zang diakte in zong tu tadih hih min tawh leitung in hong thei ahih manin i minam min mah hi, ci uh hi. Kinialna bel veng thei nai lo a, zong a veng thei pak ding hih tuak lo hi.

Min a mawk phuah zanzan lo, hamphatna khat maw, ol zaw cih ciang peuh tawh mi’ hong piak min CHIN tawh alungkim sawm lo Zomi khanlawhna bel a so vilvil suak hi. Zosuante sungah Mizote in Lushai min nusia-in minam min aman na zang thei khin uh a, India kumpi leh leitungbup in Lushai ci nawn loin Mizo ci uh hi.

Pau kibanglo sanggamte cih gen loh pau kibatpih, beh le phung kibatpih, gam leilupzia kikhen thei kilkel lo thei gige a CHIN zang nuam teitei sanggamte tawh kizop kihona ah picing lungsim, uzaw lungsim puak kul ding a, pau kibatpih lo sanggam dangte in a tel theih nadingun lungduai takin genpih tohtoh lai kul ding hi.

Mailam hunah Zomi Nam Ni bawl zia program-te mipi’ cimtaak loh dingin geelkholhna kician neih ding, sum zong dong tawm biangbuang lo a budget geel kholh ding, namdang i pawl i gualte (Kumpi ulian, biakna makai, company ulian, NGO/INGO ulian, media adt.) zawn a lengla zahtaak leh zinmangpi zong nei thei ciat leng deih huai ka sa hi. Sponsor ngah ciang a bawl henhan, sponsor om loh ciang a bawl nawn lo, cih dan ahih loh ding bel thupi ding hi.

Minam hihna identity pen ahun lemin lem ta kei leh a dinpih tintente ihi hi. Kuamah langpan nopna hi zenzen lo ahih manin kisuan huai peuhmah lo a, kisuan nading thu zong om zenzen lo hi. Hun lem ngak ding hi lo a, bawl ding hi zaw hi. Mite’ hong theihna hi masa lo zaw ding a, mite’ hong theih nadingin ihihna i dinpih leh i pholaak khiat loh aphamawh ahi hi.

Cope topa kum za cin pawi lai a kiciamna bangin leh GZA in a cih mah bangin i omna ciatah Zomi Nam Ni hanciam ciat ding mangngilh kei ni. Rev. Thang Van Lian (The Tedim Post)