A sisa hong thokik “Zomi”

A sisa hong thokik “Zomi”

Leitungah milian mihau, mi minthangte pen a kipatna uh na en kik le hang, (Bottom level) a hihna tatak uh pan a kipan kik vive na hihi. Cih nopna ah a hihna maan uh kitel in tua pan bulkip hong nei in hong khangto te na hi uhhi. (Every good transformation must begin with identity level). I hihna tatak kitel lopi in i din mun i kitel ngeikei ding hi. Tua ahih man in, “ka hihna tatak bang hiam????” cih kikan tel in nasep kipan ni, tua hi leh a bul ki loklok nawnlo in a kip a kho hong hiding aa, tua pan in i khangcing thei pan ding hi. “Identity Crisis” i cih hihna kitel lo mite pen a kizanglo set (khawl) tawh kibang hi.

A hihna diktak kitel lo ahih man in a (Potential) a sepzawhna tha neih zahding kitel lo pah uhhi. Tua ahih man in a manphatna kimu theilo in a kizat nading ah kizang theilo ahih man in a hihtheih tawp suah in kizang khia theilo hi. Tua pen paamaih mahmah hi. Zomi mimasa te zong i hawmthawhna hilo napi in i hihna dik tak tawh na ding lo uh ahih man un hun sawtpi bulkip neilo in i om aa, Zomite khantoh nading vai tampi ah haksatna i tuak hi. I sepsa teng zong a mawkna hilo napi in minam leh gam adingin mualsuang a kip a kho omlo hiam cih zah ding phial in mun khempeuh ah min tuamtuam tawh na kisem ciat ahih man in muibunlo, tawntun lo in bui a phak kuan a tawp bang den keei hi.

Tu in ahih leh ei i hihna diktak “ZOMI” tawh kiding theita hi. Lunghiang nawnlo in masuan theita ding cihna hi. I hih theih tawp suah in Zogam le Zomi ading sep kipan tading hihang. Zomi ten i hihna pen lei ah i kiatsuah khin aa, a hi zongin tu-in leipan hong poto in hong dawnsuangta hi. Kum khat kumnih sung bebek in leitung level UNO dongah hiangkha in a sawtlo in hong pak dinga, a gah kinei thei tading hi. A hangin, i hihna diktak ah bulkha in akip akho dinmun ah dingto in i kipat man ahihi. I din mun maan ta ahih man in Kum khat sung bebek in Zomite omna khempeuh ah ZYA kipawlna sim le mal, sak le khang ah hong om hi.

Hih ZYA pen leitung level NGO khat in i din suah ding kisam lai kha ding hi. Zomi khangno te pen Leitung bup ading nasem ding te i hihi. Ki neu sek kei ni. Zomi Innkuan USA Makipipa in hong tangko mah bangin, leitung bup Zomi kipawlna khempeuh hong huai henla, a nasia mahmah in kizopna, zumvai kivai puakna akipan, kipawlna khat i suah zawh nadingin mimal luvom simnate a kipan, sumbawlna, leh Politics ah hong makaih ding zong lunggulh huai mahmah hi. Leitungbup Zomi khempeuh kipawlna khat nuai ah om zolo ding kici theilo hi. UNO nuai ah gam hizahta om thei lel hi. Tua hi aa, i dinna maan a hih teh, makaite nong maigal ding uh leh nong sep ngam ding uh kisam hi.

Tulai tak Zomi huihpi pen Myanmar, India hita leh mun tuamtuam ah a khauh mahmah laitak ahih mah bangin, sep tuak te i sep mengmeng ding kisam hi. Myanmar Constituation kikhek ding khawng i gak niloh leh hong vaikai lua kha ding hi. Representative ah kiguang ding cih na ah zong Kachin, Kaya, Kayin, Rakhine, Shan, Mon, Burma leh Zomi a lut nading hanciam ding kisam hi. Kalthak lakna pepeuh ah langpan denkei sangin NLD a lut leh ei zong i lut zawh nading hanciam ni. A hoih pen lam en in a siapen ding kigin ding hitawn tung hi. Thangsiah pa khat in thang tampi a siah mah bangin khat ah hong pai kei leh khat ah cih dan in Zomi te i minam vai gel ni. Leitung bup Zomi kipawlna khat, Party khat, Civil Society tampi leh Organs tampi kiguan ding thupi ding hi.
—
Na khempeuh a semthei Pasian a nei mi in lungneu kei ta hen.
(He who trusts in the Lord shall not be disappointed).

Philipkhaipu

For so long our minds have rested
Blinded and unaware
We have been deceived by our own
Yet, from our slumber we shall arise
One by one, we awaken
That sleeping beast none could tame
Shall once again rule Zogam