Nupa kaal theihding ~ David Tuang

Nupa kaal theihding ~ David Tuang

Nupa kaal kizopna a cidam lohna a hang tampite’ lakah i phawk khak khol loh khat om hi. Zumna mel theilo a nu leh pa vai (sex lam tawh kisai) khawng a val lua a gengen mite’ nupa kaal kizopna-ah kuama theihpih loh buaina leh lem lohna tampitak om thei hi.

Tua banga zumna mel theilo a hai ciakciak zel khat na hih khak leh, na nupa kaal kizopna a tuamtuamte limtakin na enkik in. Mi kiangah na genkhiat ngam loh hangin na nupa kaal kizopna-ah dam lohna leh lem lohna tampitak om ding hi.

Nupa kaal kizopna cidam in, ettehhuai innkuan nuam na suah nop takpi leh a uanglua, a vallua kampau ginalo peuhmah kidawm in la pel den in. A vallua, a uang lua ciamnuih hoihlo pen Lai Siangtho in zong kham hi. (Pasian’ thu um ing, piangthak ing ci-a hi banga a vallua a ihai ciakciak leh bel a kisam khat om lai kha ding hi).

Satan in nupa kaal cidamnate hi bang nengneng khawng tawh hong susiasia ahih lamtak phawk gige in. Nupa kaal kizopna a lem melloh ding khawng na ut leh bel na hai ciakciak lai lel in. Nang leh na innkuan in suplawh/buailawh lel ding hi uh teh!

*Kiim leh paam khuadakna pan muhkhak/theihkhakna tungtawnin i kihop sawn ahi hi. Lungdam! Khazih sungah, David Tuang

Nupate’ theih ding kilawm

(1) Nupa kaal-ah thusim a om nak leh nupa kaal kizopna cidam thei lo ahih manin, nupa kaal-ah thusim omsak hetloh ding ahi hi.

(2) Nupa(pumkhat) hikhin ihih nung sang, sum tuam kep/neih cihte i zat loh ding thupi hi.

Nasem tuaktuak ihih leh zong i neihsa khempeuh gawmkhop liailiai ding ahi hi(Nupa tampitakte’ ii buaina leh kilem lohna pen sum tuam kep/neihna hang na hi gige hi).

(3) Nupa cih pen, ki maisak thei-in, ki telsiam theih ding thupi mahmah hi.

Ahi zong ki maisak/telsiam zawh loh ding zah dongin, mawhna, khialhna i bawl khak hetloh ding thupi zaw lai ahih manin kikep siam mahmah kul ding hi. Itna leh deihsakna lianpi tawh, Khazih sungah, David Tuang